ޝަހީމް އިލްމުވެރިންނަށް: ޔާމީނަށް މަސައްކަތް ކުރަނީ ޣައިރު ދީން ނުފަތުރާތީ
16 ސެޕްޓެމްބަރު 2018 | އާދީއްތަ 07:19ރައީސް ޔާމީންގެ އޮތް އެންމެ ބޮޑު "ކްރެޑިޓް ޕޮއިންޓަކީ" ޣައިރު ދީން ނުފެތުރުން
ޑރ. މުހައްމަދު ޝަހީމް އަލީ ސައީދު
ރައީސް އަބްދުﷲ ޔާމީންގެ ރަނިންމޭޓަކަށް ވެވަޑައިގަތުމުން އެމަނިކުފާނަށް ދީނީ ބައެއް އިލްމުވެރިންގެ ފާޑުކިޔުންތައް އަމާޒުވި ކަމަށާއި އެމަނިކުފާނު ރައީސް ޔާމީންގެ ރަނިންމޭޓަކަށް ވެވަޑައިގެންނެވީ ޣައިރު ދީން ނުފަތުރާތީކަމަށް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޕީޕީއެމުން ވިލިމާލޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޝަހީމް ވިދާޅުވީ ރައީސް ޔާމީންގެ އޮތް އެންމެ ބޮޑު "ކްރެޑިޓް ޕޮއިންޓަކީ" އެމަނިކުފާނުގެ ވެރިކަމުގެ ދުވަސްވަރު އަދި އޭގެ ކުރިންވެސް ޣައިރު ދީން ފެތުރުމަށް މަސައްކަތް ކުރައްވާފައި ނުވާކަމަށެވެ. އަދި ޕީޕީއެމުންވެސް އެކަހަލަ ކަމެއް ކޮށްފައި ނުވާނެކަމަށް ޝަހީމް ވިދާޅުވިއެވެ. ޝަހީމް ވިދާޅުވީ ރާއްޖޭގެ ރައްޔިތުން ރައީސް ޔާމީނަށް ތާއީދު ކުރައްވަންވީ އެސަބަބާ ހެދި ކަމަށެވެ.
" ރާއްޖޭގެ ބައެއް އިލްމުވެރިންނަށް އަޅުގަނޑު ދަންނަވާލަން ބޭނުން ވަނީ އަޅުގަނޑުމެން ރައީސް އަބްދުﷲ ޔާމީން އަބްދުލްގައްޔޫމަށް ތާއީދު ކުރަން ނިންމުމާއި ވިދިގެން އެބޭފުޅުންގެ ފަރާތުން އަންނަ ބައެއް ފާޑުކިޔުންތަކަށް އަޅުގަނޑު ދަންނަވާލަން ބޭނުންވަނީ. ރައީސް އަބްދުﷲ ޔާމީން އަބްދުލްގައްޔޫމަށް އޮތް އެންމެ ބޮޑު ކްރެޑިޓް ޕޮއިންޓަކީ އެމަނިކުފާނަކީ އެމަނިކުފާނުގެ ވެރިކަމުގެ ދުވަސްވަރުގައި ވެސް އަދި އޭގެ ކުރިންވެސް ދިވެހިރާއްޖޭގައި ޣައިރު ދީން ފެތުރުމަށް އެއްވެސް ވަރެއްގެ މަސައްކަތެއް ކުރެއްވި ކަމުގެ ތުހުމަތެއް އެމަނިކުފާނަށް ނެތް ބޭފުޅެއްކަމަށް. އަދި އެމަނިކުފާނު ނިސްބަތްވާ ޕާޓީއަކީ ވެސް އެފަދަ އެއްވެސް ތުހުމަތެއް އެޕާޓީއާމެދު އޮތް ޕާޓީއެއް ނޫނޭ. އެހެން ވީމައޭ އަޅުގަނޑު އެމަނިކުފާނުގެ ފަހަތުގައި މަސައްކަތް މިކުރަނީ. މިނޫން އެހެން ގޮތަކަށް ތިބޭފުޅުން ނިކަން ހުއްޖަތެއް ދައްކާލަބަލާށޭ. އަޅުގަނޑުމެންނާ ޖަދަލުކޮށްބަލާށޭ. އަޅުގަނޑުމެން މިތިބީ ކެރިގެން ތިޔަބޭފުޅުންނާ މިކަމާ ޖަދަލުކުރަން ތައްޔާރަށޭ، " ޝަހީމް ވިދާޅުވިއެވެ.
މިމަހުގެ 8 ވަނަ ދުވަހު ގުޅިފައިވާ ސިޔާސީ ޕާޓީތަކުން ކާނިވާ ސަރަހައްދުގައި ބޭއްވި ޖަލްސާގައި ކެންޑިޑޭޓް އިބްރާހިމް މުހައްމަދު ސޯލިހު(އިބޫ) ދެއްކެވި ވާހަކަތަކަށް ޝަހީމް ވަނީ ހޮނިހިރު ދުވަހުރޭ ބޭއްވި ޖަލްސާގައި ރައްދު ދެއްވާފައެވެ.
ޝަހީމް ވިދާޅުވީ އެ ޖަލްސާގައި "ރާއްޖެ މިވަނީ ބައިނަލްއަގުވާމީ ދުނިޔެއިން އެކަހެރިވެފައޭ" އިބޫ ވިދާޅުވި ނަމަވެސް އެކަންތައްތައް އެނގޭނީ ބައިނަލްއަގުވާމީ މަސްރަހު ދަންނަ ފަރާތްތަކަށް ކަމަށެވެ. މިވެރިކަމުގައި ރާއްޖެ ވަނީ ބޭރުގެ ފަރާތްތަކާއި ގުޅުން ބަދަހިކޮށްފައިކަމަށާއި ބައިނަލްއަގުވާމީ ގައުމުތަކުގެ މެދުގައި ރާއްޖޭގެ ދަރަޖަ އެނގޭނީ އެކަން ދަންނަ މީހުންނަށް ކަމަށް ޝަހީމް ވިދާޅުވިއެވެ.
" އަޅުގަނޑު ދަނަވާނީ ބައިނަލްއަގުވާމީ މަސްރަހގެ ކަންކަން ދަންނަ މީހުންނަށޭ އެނގޭނީ އެގައުމުތަކުގައި ރާއްޖޭގެ މަގާމު. މިދިޔަ 5 އަހަރުގެ ތެރޭގައި މުޅިން އަލަށް އެތަށް ގައުމަކާއި ރާއްއްޖެ ވަނީ ޑިޕްލޮމެޓިކް ގުޅުން ގާއިމްކޮށްފައި. ރާއްޖެއަށް ވަނީ 5 އަހަރުގެ ތެރޭގައި ނާންނަވަރުގެ ބޮޑެތި އިންވެސްޓްމަންޓްތައް އައިސްފައި " ޝަހީމް ވިދާޅުވިއެވެ.
ޝަހީމް މިހެން ވިދާޅުވިއިރު ގަތަރާއި އޮތް ގުޅުން ކަނޑާލާފައި ވަނީ މި ވެރިކަމުގައި 5 ޖޫން 2017 ގައެވެ. އަދި ޒަމާނުއްސުރެ ރާއްޖެއާއި އިންޑިއާއާއި އޮންނަ ގާތްގުޅުން ވަނީ ހީނަރުވެފައެވެ. އަދި އީރާނާއެކު އޮތް ސިޔާސީ ގުޅުންވެސް ވަނީ ކަނޑާލާފައެވެ.
