ނޫސްވެރިކަމުގެ މިނިވަންކަމަށް ހުރަސް އެޅޭ ގޮތަށް އަމަލުކުރަމުންދާ އަބުރުގެ ގާނޫނު އުވާލައި ގެއްލުވާލާފައި ނޫސްވެރިޔާ އަހުމަދު ރިލްވާން އަދި އަނިޔާވެރި ގޮތަކަށް މަރާލެވުނު ބްލޮގަރު ޔާމީން ރަޝީދުގެ މައްސަލަ އަލުން ތަހުގީގު ކުރައްވާނެ ކަމަށް ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވައުދުވެވަޑައިގެންފައެވެ.
އިބޫ ކުރެއްވި ޓްވީޓެއްގައި އެމަނިކުފާނު ވަނީ ރިލްވާން ގެއްލުވާލުމުގެ މައްސަލަ އާއި ޔާމީން ރަޝީދުގެ މަރުގެ މައްސަލަ އަލުން ތަހުގީގު ކުރައްވާނެ ކަމަށް ވައުދުވެވަޑައިގެންފައެވެ. ހަމައެހެންމެ އަބުރުގެ ގާނޫނު އުވާލައި ނޫސްވެރިކަމުގެ މިނިވަންކަމަށް ފުރުސަތު ދެއްވާނެ ކަމަށް އިބޫ ވަނީ ވައުދުވެވަޑައިގެންފައެވެ. އެމަނިކުފާނު މިހެން ވިދާޅުވެފައި ވަނީ ނޫސްވެރިކަމުގެ ހައްގު ކަށަވަރުކޮށްދިނުމަށް ބައިނަލްއަގްވާމީ ގޮތުން މަސައްކަތްކުރަމުންދާ ރިޕޯޓަރސް ވިތައުޓް ބޯޑަރސްއިން ގޮވާލެއްވި ގޮވާލެއްވުމަކަށް އިޖާބަ ދެއްވުމުގެ ގޮތުންނެއެވެ.
I pledge to open investigations into journalist Ahmed Rilwan’s disappearance, Yameen Rasheed’s murder, repeal the anti defamation act and ensure press freedom. https://t.co/NSllWXagzj
— Ibrahim Mohamed Solih (@ibusolih) September 15, 2018
ރިޕޯޓަރސް ވިތައުޓް ބޯޑަރސްއިން މި މަހުގެ 12 ވަނަ ދުވަހު ނެރުނު ބަޔާނެއްގައި އެ ޖަމިއްޔާއިން ވަނީ ރާއްޖޭގައި ބާއްވާ ރިޔާސީ އިންތިހާބުގައި ވާދަކުރައްވާ ދެ ކެންޑިޑޭޓުންގެ ފަރާތުން ވެސް ނޫސްވެރިކަމުގެ މިނިވަންކަމަށް އަހަންމިއްޔަތުކަން ދެއްވައި ސިޔާސަތުތަކެއް ކަނޑައެޅުއްވުމަށް އެދިވަޑައިގެންފައެވެ. އެ ބަޔާނުގައި ވަނީ އަބުރުގެ ގާނޫނު އުވާލުމަށާއި ނޫސްވެރިންނަށް ދީފައިވާ ހަމަލާތައް ތަހުގީގުކޮށް ހަމަލާ ދިން ފަރާތްތަކާއި ދެކޮޅަށް ދައުވާ އުފުލުމަށް ދެ ކެންޑިޑޭޓުންނަށް ވެސް ގޮވާލައްވާފައެވެ. ހަމައެހެންމެ ރިލްވާން ގެއްލުވާލި މައްސަލައާއި ޔާމީންގެ މަރުގެ މައްސަލަ އަލުން ތަހުގީގު ކުރުމަށް ގޮވާލާފައެވެ.
ރިޕޯޓަރސް ވިތައުޓް ބޯޑަރސްގެ މި ގޮވާލުމަށް ކޯލިޝަންގެ ކެންޑިޑޭޓް އިޖާބަ ދެއްވާފައިވާއިރު އިންތިހާބުގެ ކެމްޕެއިންގެ ތެރެއިން މިހާތަނަށް އައިއިރު ވެސް ދެން ވާދަކުރައްވާ ކެންޑިޑޭޓް ކަމަށްވާ ރައީސް އަބްދުﷲ ޔާމީން މިފަދަ ވައުދެއް ވެވަޑައިގެންފައެއް ނުވެއެވެ.
ދެހާސް ސޯޅަ ވަނަ އަހަރުގެ އޮގަސްޓް މަހުގެ 11 ވަނަ ދުވަހު ރައީސް ޔާމީން ތަސްދީގު ކުރެއްވި "އަބުރު ރައްކާތެރިކުރުމާއި ޚިޔާލުފާޅުކުރުމުގެ މިނިވަންކަމުގެ ގާނޫނު" ގެ ދަށުން ރާއްޖޭގެ ބައެއް މީޑިއާތަކަށް ޓާގެޓްކޮށް ވަނީ ބޮޑު އަދަދުތަކުން ޖޫރިމަނާ ކޮށްފައެވެ. ރިލްވާން ގެއްލުވާލެވުނުތާ 1499 ދުވަސް ވެގެންދާއިރު މިހާތަނަށް އެ މައްސަލައިގައި ދައުލަތުން ދައުވާ އުފުލި ހ. ހިލްޓަން އާލިފް ރައޫފާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށް އުފުލި ޓެރަރިޒަމްގެ ދައުވާ ސާބިތު ނުވާ ކަމަށް ކްރިމިނަލް ކޯޓުން ހުކުމް ކޮށްފައިވެއެވެ. ހަމައެހެންމެ އަނިޔާވެރި ގޮތަކަށް ޔާމީން މަރާލެވުނުތާ 510 ދުވަސް ވެގެންދާއިރު އަދިވެސް އޭނާގެ ގާތިލުން ހޯދިފައެއް ނުވެއެވެ.
