ހަނިމާދޫ މަގު ހެދުމުގެ މަސައްކަތުގައި އުޅުނު ބަޔަކު މުސާރައިގެ މައްސަލައިގައި މުޒާހަރާ ކޮށްފި
އެ މީހުން ބުނީ މަހަކާއި 21 ދުވަހު މަސައްކަތް ކުރުވާފައި ދިނީ 18 ދުވަހުގެ މުސާރަ ކަމަށް
މުސާރައިގެ މައްސަލައިގާ ހަނީމާދޫ ޒުވާނުންތަކެއް މުޒާހަރާ ކުރަނީ
ހދ. ހަނިމާދޫގައި މަގު ހެދުމުގެ މަސައްކަތްކުރަމުން ދިޔަ އެ ރަށުގެ ޒުވާނުންތަކެއް މުސާރައިގެ މައްސަލައިގާ މުޒާހަރާ ކޮށްފިއެވެ.
ހުކުރު ދުވަހުގެ ރޭ މުޒާހަރާކޮށްފައި ވަނީ މަގު ހެދުމުގެ މަސައްކަތުގައި ހަނިމާދޫގައި ޤާއިމްކޮށްފައިވާ ހައުސިންގ މިނިސްޓްރީގެ ޕަބްލިކް ވޯކްސް ސަރވިސަސްގެ ހަނިމާދޫ ސައިޓް އޮފީސް ދޮށުގައެވެ.
މުޒާހަރާކުރި މީހުންގެ ތެރެއިން މީހަކު ރާއްޖެ އެމްވީއަށް ބުނީ އެމީހުން އިހުތިޖާޖް ކުރަމުންދަނީ ހަމަ މުސާރަ ނުދިނުމުންނާއި އެތައް އިރަކު މަސައްކަތް ކުރުވާފައި ދޭން ޖެހޭ އިތުރު ގަޑީގެ ފައިސާ ނުދިނުމުން ކަމަށެވެ.
ޒުވާނުން އަޑު އުފުލަނީ
އޭނާ ބުނީ އެ މީހުން ލައްވައި އެއް މަހާއި 21 ދުވަހު މަސައްކަތް ކުރުވާފައި މުސާރަ ދީފައި ވަނީ 18 ވަރަކަށް ދުވަހުގެ މުސާރަ ކަމަށެވެ. އަދި 16 ގަޑިއިރާއި 17 ގަޑިއިރު އިތުރަށް މަސައްކަތް ކުރުވި ކަމަށާއި އެކަމަކު މުސާރައިގެ އިތުރުން އެއްވެސް އެއްޗެއް ދީފައި ނުވާ ކަމަށެވެ.
އޭނާ ބުނީ ފުރަތަމަ ބުނަމުން އައީ މުސާރައިގެ ބާކީބައި ނުދޭނެ ކަމަށާއި ނަމަވެސް ފަހުން އެ ފައިސާ ފަހުން ދޭނެ ކަމަށް ބުނެފައިވާ ކަމަށެވެ. އެކަމަކު އެފައިސާ ދޭނެ ދުވަހެއް ނުބުނެދޭ ކަމަށް އޭނާ ބުންޏެވެ.
ހަނިމާދޫގައި ޒުވާނުން އަޑު އުފުލަނީ
މިރޭ (ހުކުރު ދުވަހުގެރޭ) 9 ޖަހާއިރު އެކަމާ ގުޅޭ ގޮތުން ބައްދަލުވުމެއް ބާއްވަން ހަމަޖައްސާފައި އޮތް ނަމަވެސް އެ އޮފީހުގެ އެއްވެސް މީހަކު ބައްދަލުވުމަށް ނުނިކުންނަ ކަމަށާއި އެންމެން ވެސް ވަނީ ފިލާފައި ކަމަށް އޭނާ ބުންޏެވެ.
މުސާރައިގެ މައްސަލައިގާ އިހުތިޖާޖް ކުރަމުން ދަނީ މުޅިން ވެސް ހަނިމާދޫގެ ޒުވާނުންނެވެ. އެރަށުގެ 22 ވަރަކަށް ޒުވާނުން އޭގެ ތެރޭގައި ހިމެނޭ އިރު "ކުރި މަސައްކަތުގެ ހައްޤު އުޖޫރަ ދިނުމަށް" ގޮވާލައި ބެނާއެއް ވެސް އެ މީހުން ގެންގުޅުނެވެ. އަދި އެތަނާ ހަވާލުވެ އިސްކޮށް ތިބި ބައެއް ފަރާތްތަކުގެ އިސްތިއުފާއަށް ވެސް ވަނީ ގޮވާފައެވެ. އޭގެ ތެރޭގައި އެމަސައްކަތާ އިސްވެ ހަވާލުވެ ހުންނެވި ހައުސިންގ މިނިސްޓްރީގެ މުހައްމަދު ޤާސިމް ވެސް ހިމެނެއެވެ.
ރާއްޖެ އެމްވީން މިކަމާ ގުޅޭ ގޮތުން މުހައްމަދު ޤާސިމަށް ގުޅުމުން ފޯނު ކަނޑުއްވައި ލެއްވީއެވެ. އަދި ފަހުން ގުޅުމުން ވެސް ގެންދެވީ ފޯނު ކަނޑުއްވާލައްވަމުންނެވެ.
