ފަރަންސޭސިވިލާތުގެ ވެރިރަށް ޕެރިހުގައި ވަޅިއަކާއި ދަގަނޑު ބުރިއެއް ހިފައިގެން އުޅުނު މީހަކު ހަތް މީހުން ޒަޚަމްކޮށްލައިފި ކަމަށް އެގައުމުގެ ފުލުހުން ބުނެފިއެވެ.

އޭގެ ތެރެއިން ހަތަރު މީހެއްގެ ހާލު ސީރިއަސް ކަމަށް ފުލުހުން ބުނެއެވެ.

ހަމަލާދިން ކަމަށް ބުނެވޭ މީހާއަކީ އަފްޣާނިސްތާނުގެ ރައްޔިތެކެވެ. އޭނާ ހައްޔަރުކޮށްފައި ވާއިރު އެ ހަމަލާއަކީ ޓެރެރިސްޓް ހަމަލާއެއް ކަމުގެ ނިޝާނެއް ނުފެނެއެވެ.

ޒަޚަމްވި މީހުންގެ ތެރެއިން ދެ މީިހަކީ އިގިރޭސިވިލާތުގެ ދެ ފަތުރުވެރިން ކަމަށް ރިޕޯޓްތައް ބުނެއެވެ. 

ވެރިރަށުގެ އިރު އުތުރުގައި މި ހަމަލާ ދީފައި ވަނީ ރޭގަނޑު 11 ޖެހުމުގެ ކުޑަ ވަގުތުކޮޅެއް ކުރިންނެވެ.

އެކި މަސްދަރުތަކުން ބުނެފައިވާ ގޮތުގައި ހަމަލާދިން މީހާ އެ މީހުންނަށް ހަމަލާދީފައި ވަނީ ކޮންބައެއްތޯ ބަލައިގެންނެއް ނޫނެވެ. އެންމެ ފުރަތަމަ ވަޅި ޖަހާފައި ވަނީ ދެ ފިރެހެނެކާއި އަންހެނެއްގެ ގަޔަށެވެ.

ހަމަލާދިން މީހާ ހުއްޓުވުމަށްޓަކައި، ސަރަހައްދުގައި ޕިޓާންކް ކުޅެން ތިބި މީހުން ވަނީ އޭނާއާ ދިމާއަށް ބޯޅަ އުކާފައެވެ.