މިއުޒިކާއެކު "إن شاء الله", ޝަހީމް ޖެއްސެވީ އަތް!
7 ސެޕްޓެމްބަރު 2018 | ހުކުރު 17:31ޕީޕީއެމްއިން ވޯޓު ހޯދުމުގެ ނިޔަތުގައި ދަނީ އިސްލާމް ދީން ހަތިޔާރަކަށް ބޭނުންކުރަމުން
ބުރިޖު ސަޅި ނަމުގައި ޕީޕީއެމްއިން ބޭއްވި ޖަލްސާގެ ތެރެއިން
މިއުޒިކާއި މާތް ﷲ ގެ އިސްމުފުޅާއެކު ރައީސް އަބްދުﷲ ޔާމީންގެ ކެމްޕެއިން ލަވައެއް ރިލީޒް ކޮށްފިއެވެ.
ރިޔާސީ އިންތިހާބަށް ތައްޔާރުވުމަށް "ބުރިޖު ސަޅި" ނަމުގައި ޕީޕީއެމްއިން ބޭއްވި ޖަލްސާގައި އެޕާޓީއިން ވަނީ "إن شاء الله" ގެ ނަމުގައި ލަވައެއް ރިލީޒްކޮށްފައެވެ. މިއުޒިކާއެކު ރިލީޒްކުރި މި ލަވަ ޖަލްސާގެ ބެކް މިއުޒިކެއްގެ ގޮތުގައި ވެސް ވަނީ ބޭނުންކޮށްފަައެވެ.
ރައީސް ޔާމީން ވެސް ބައިވެރިވެވަޑައިގެންނެވި މި ޖަލްސާގައި ޕީޕީއެމްގެ އިސް ބޭފުޅުން ވަނީ ބައިވެރިވެވަޑައިގެންފައެވެ. އެ ލަވަ ރިލީޒް ކުރެވިގެންދިޔުމާއެކު ރައީސް ޔާމީން އަދި އެމަނިކުފާނުގެ ރަނިންގމޭޓް ޑރ. މުހައްމަދު ޝަހީމް އަލީ ސައީދު ވެސް ތިއްބެވީ އަތް ޖައްސަވާށެވެ. މި ބޭފުޅުން ﷲ ގެ އިސްމުފުޅާއެކު ލަވައެއް ރިލީޒް ކުރުމާއެކު ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ހަމައެހެންމެ ރާއްޖޭގެ ދީނީ ޝެއިޚުންނަށް ބޮޑެތި ބަހުގެ ހަމާލަތައް އަމާޒުކުރެއްވުމަށްފަހު އެފަދަ ލަވައެއް ރިލީޒް ކުރެވިގެން ދިޔައިރު ދީނީ އިލްމު އުގެނިވަޑައިގެން ހުންނެވި ޑރ. ޝަހީމް އަތް ޖައްސަވަން ހުންނެވުމާއެކު އެމަނިކުފާނަށް ވެސް ވަނީ ބޮޑު ފާޑުކިޔުންތަކެއް އަމާޒުވެފައެވެ.
ރާއްޖޭގައި އިސްލާމް ދީން ބޭއްވުމަށް ރައީސް ޔާމީނަށް ވޯޓު ދޭން އެދި ޕީޕީއެމްއިން ކެމްޕޭން ކުރަމުންދާއިރު އެޕާޓީއިން މިފަދަ ކަންތައްތައް ކުރުމުން އިސްލާމް ދީން އެޕާޓީއިން ވޯޓު ހޯދުމަށް ހަތިޔާރެއްގެ ގޮތުގައި ބޭނުންކުރާކަން ހާމަވެގެންދާ ކަމަށް ގުޅިފައިވާ ސިޔާސީ ޕާޓީތަކަށް ތާއިދުކުރާ ފަރާތްތަކުން ދަނީ ބުނަމުންނެވެ.
