ސިނަމާލެ ބުރިޖު އާންމުންނަށް ހުޅުވާލައިފި
ބުރިޖުން ދަތުރު ކުރުމުގެ އަގުތައް އާއްމު ކުރުމަށް ނިންމާފައިވަނީ ރިޔާސީ އިންތިޚާބަށް ފަހު
ަސިނަމާލެ ބުރިޖްމަތިން މީހުންތަކެއް ހިނގާފައި ދަނީ
މާލެއާ ހުޅުލެއާ ދެމެދު އަޅާފައިވާ ސިނަމާލެ ބުރިޖު އާންމުންނަށް ހުޅުވާލައިފިއެވެ.
ހުކުރު ދުވަހު 16:00 އާންމުންނަށް ބުރިޖު ހުޅުވާލުމާއި ގުޅިގެން ގިނަ ބަޔަކު ވަނީ އެސަރަހައްދަށް ޖަމާވެފައެވެ. ބުރިޖު އާއްމުކޮށް ހުޅުވާލާއިރު ބުރިޖުން ދަތުރު ކުރުމުގެ އަގުތައް އާއްމު ކުރުމަށް ނިންމާފައިވަނީ ރިޔާސީ އިންތިހާބަށް ފަހުއެވެ. އަދި ބްރިޖްގެ އަގުތައް އާއްމު ކުރެވެންދެން ބްރިޖުން ދަތުރު ކުރުމަށް އެއްވެސް ފީއެއް ނުނަގާނެކަމަށް ހައުސިން މިނިސްޓްރީން މައުލޫމާތުދެއެވެ.
ސިނަމާލެ ބުރިޖު އޮގަސްޓު މަހުގެ 30 ވަނަ ދުވަހު ރަސްމީކޮށް ހުޅުވާލި ނަމަވެސް އާންމު ދަތުރުފަތުރުތަކަށް ހުޅުވާލާފައެއްނުވެއެވެ. އަދި މިމަހުގެ 6 ވަނަ ދުވަހުގެ ނިޔަލަށް ބުރިޖު މަތީގައި ވަނީ ތަފާތު ހަރަކާތްތައް ބާއްވާފައެވެ.
އެގޮތުން ބްރިޖުމަތީގައި ބޭއްވި އެންމެ ފާހަގަކޮށްލެވޭ ހަރަކާތަކީ ބްރިޖުގެ ކައިވެންޏާއި، ގައުމީ ޔުނިވާސިޓީން ބޭއްވި ދަސްވެނިވުމެވެ. މީގެ އިތުރުން ދުވުންތަކާއި، ބައިސަލް ދުއްވުމާއި، އާންމު ރައްޔިތުންގެ ހިނގާލުމެއް ވެސް ވަނީ ބާއްވާފައެވެ.
ސިނަމާލެ ބްރިޖަށް ޖުމްލަ 200 މިލިއަން ޑޮލަރު ހަރަދުވާއިރު އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ އެވެ. އަދި 72 މިލިއަން ޑޮލަރަކީ ޗައިނާގެ ލޯނު އެހީ އެވެ. ސިނަމާލެ ބުރިޖްގެ މަސައްކަތަށް ދިވެހި ސަރުކާރުން ހަރަދުކުރީ 12 މިލިއަން ޑޮލަރެވެ.
