ޓްރަމްޕްގެ އަގު ވެއްޓޭ ގޮތަށް އާޓިކަލްއެއް ލިޔުއްވީ ނައިބު ރައީސް މައިކް ޕެންސްއެއް ނޫން: ވައިޓް ހައުސް
6 ސެޕްޓެމްބަރު 2018 | ބުރާސްފަތި 14:07އާޓިކަލްގެ ސަބަބުން މަސްރަހު ވަނީ ހޫނުވެފައި
އެމެރިކާގެ ރައީސް ޑޮނަލްޑް ޓްރަމްޕް (ވ) ނައިބު ރައީސް މައިކް ޕެންސް (ކ) އާއިއެކު
އެމެރިކާގެ ރައީސް ޑޮނަލްޑް ޓްރަމްޕްގެ އަގު ވެއްޓޭ ގޮތަށް ނިއުޔޯކް ޓައިމްސްގައި ޝާއިއުކޮށްފައިވާ ކޮލަމް ލިޔުއްވީ ނައިބު ރައީސް މައިކް ޕެންސްކަމަށް ދެކެވޭ ވާހަކަތައް ވައިޓް ހައުސްއިން ދޮގުކޮށްފިއެވެ.
މައިކް ޕެންސްގެ ކޮމިއުނިކޭޝަންސް ޑިރެކްޓަރ އަދި އެމަނިކުފާނުގެ ޑެޕިއުޓީ ޗީފް އޮފް ސްޓާފް ޖެރޮން އާގެން ވިދާޅުވީ ޕެންސް އެއްޗެއް ލިޔުއްވާނަމަ އެމަނިކުފާނުގެ އަމިއްލަފުޅު ނަން ބޭނުންކުރައްވާނެކަމަށެވެ. އަދި އެލިޔުމުގައި ހުރި ވާހަކަތައް އާގެންވެސް ދޮގުކުރެއްވިއެވެ.
ރައީސް ޑޮނަލްޑް ޓްރަމްޕްގެ ފާޑުކިޔުންތައް އެންމެ ބޮޑަށް އަމާޒުވެފައިވާ އެއް މީޑިއާކަމަށްވާ ނިއުޔޯކް ޓައިމްސްގައި ނަން ނުޖަހާ ޝާއިއުކޮށްފައިވާ ކޮލަމްގެ މައްސަލަ ވަނީ ވަރަށް ބޮޑަށް ހޫނުވެފައެވެ. 'އަހަންނަކީ ޓްރަމްޕް ސަރުކާރުގައި ދެކޮޅު ހަދާ މީހުންގެ ތެރެއިން އެކެއް' ކަމަށް ބުނެ ލިޔެފައިވާ ލިޔުމަކީ ޓްރަމްޕްގެ ސަރުކާރުގެ އިސް ފަރާތެއްކަމަށް ނިއުޔޯކް ޓައިމްސްއިން ބުނެއެވެ.
އެލިޔުމުގައިވާ ގޮތުން ޓްރަމްޕް ގެންނަވަން ބޭނުންފުޅުވާ ބައެއް ސިޔާސަތުތަކާއި ޓްރަމްޕްގެ ސަރުކާރުގެ އިސް ބައެއް ބޭފުޅުން ދެކޮޅު ހައްދަވައެވެ. އަދި ޓްރަމްޕްގެ ނާޤާބިލްކަމާއިމެދު އެލިޔުމުގައި ވަރަށް ބޮޑަށް ވާހަކަ ދައްކާފައިވެއެވެ. އަދި ޓްރަމްޕްގެ ވެރިކަމުގެ ޤާބިލްކަން ނެތްނަމަވެސް، އޭނާގެ އަރިހުގައި ވިސްނޭ މީހުން އެބަތިބިކަމަށާއި، ކަންކަން އިސްލާހުކުރުމަށް އެމީހުން މަސައްކަތްކުރަމުންދާކަމަށް ލިޔުމުގައި ބުނެފައިވެއެވެ.
އެލިޔުން ލިޔުއްވީ މައިކް ޕެންސްކަމަށް ތުހުމަތުކުރެވުނީ އެމަނިކުފާނު ބޭނުންފުޅު ކުރައްވާ ބައެއް ބަސްތައް އެލިޔުމުގައި ބޭނުންކޮށްފައިވާތީއެވެ. މައިކް ޕެންސްގެ އިތުރުން ޚާރިޖީ ވަޒީރު މައިކް ޕޮމްޕެއޯއަކީވެސް އެކޮލަމް ލިޔުއްވިކަމަށް ތުހުމަތުކުރެވޭ އެއް ބޭފުޅެކެވެ. ޕޮމްޕެއޯވެސް ވަނީ އެއީ އެމަނިކުފާނުގެ ލިޔުއްވުމެއް ނޫންކަމަށް ވިދާޅުވެ، އެލިޔުނު ފަރާތަކަށް ވަރަށް ބޮޑަށް ފާޑުވިދާޅުވެފައެވެ.
