ވިރާތަކީ އެންމެ ރަނގަޅު ފިރިމީހާ: އަނުޝްކާ

ބޮލީވުޑްގެ ތަރި އަނުޝްކާ ޝަރުމާ އޭނާގެ ހަޔަތާ ބެހޭ ގޮތުން މިހާތަނަށް އާންމުންގެ ތެރޭގައި ވާހަކަ ދައްކާފައި ވަނީ ވަރަށް މަދުންނެވެ. އިންޑިއާގެ މަޝްހޫރު ކްރިކެޓް ކުޅުންތެރިޔާ ވިރާތު ކޯލީ އާއި އަނުޝްކާ ކައިވެނި ކޮށްފައި ވަނީ މިދިޔަ އަހަރުގެ ޑިސެމްބަރުގައެވެ. އެތައް ބައެއްގެ ސަމާލުކަމެއް އެކައިވެންޏަށް އޭރު އަމާޒުވިއެވެ.

އަނުޝްކާ މިހާރު އުޅެނީ މިމަހުގެ 28 ގައި ސިނަމާތަކަށް އަންނަ ހިންދީ ފިލްމު "ސުއިދާގާ: މޭޑް އިން އިންޑިއާ" ޕްރޮމޯޓް ކުރުމުގެ މަސައްކަތާއިގެން އަވަދި ނެތިއެވެ.

އެ ފިލްމު ޕްރޮމޯޓް ކުރުމަށް ދީފައިވާ އިންޓަވިއުއެއްގެ ތެރެއިން އަނުޝްކާ ވަނީ އޭނާގެ ފިރިމީހާ އަށް ވަރަށް ބޮޑަށް ތައުރީފް ކޮށްފައެވެ. އަނުޝްކާ ބުނީ އޭނާ ކައިވެނިކޮށްގެން އުޅެނީ މި ދުނިޔޭން ވެސް އެންމެ ރަނގަޅު ފިރިހެނާއާ އެކީގައި ކަމަށެވެ.

"ރަބް ނޭ ބަނާދީ ޖޯޅީ" އިން 2008 ވަނަ އަހަރު ފިލްމީ ކެރިއަރ ފެށި އަނުޝްކާ އަންނަނީ ބޮލީވުޑްގައި ފިޔަޖަހަމުންނެވެ. އޭނާ މިހާތަނަށް ކުޅެފައިވާ ގިނަ ފިލްމުތަކަކީ މަގުބޫލު ފިލްމުތަކެވެ. "ސުއިދާގާ: މޭޑްއިން އިންޑިއާ" ގެ އިތުރުން އޭނާ މިއަހަރު ފެނިގެންދާނީ ޑިސެމްބަރު 21 ގައި ރިލީޒް ކުރާ ޝާހްރުކް ޚާންގެ ފިލްމް "ޒީރޯ" އިންނެވެ.