ހޯލް އޮފް ފޭމްގެ އެންޓަޓެއިނާ އޮފް ދި އިޔާ އެވޯޑް އަނުޝްކާ އަށް

ހެލޯ މެގަޒިން އިން ދޭ "ހޯލް އޮފް ފޭމް" އެވޯޑްސްގައި އަހަރުގެ އެންމެ ފާހަގަކޮށްލެވޭ ފަންނާނު، އެންޓަޓެއިނާ އޮފް ދި އިޔާގެ އެވޯޑް އަނުޝްކާ ޝަރްމާ އަށް ލިބިއްޖެއެވެ.

އަނުޝްކާ އަށް މި އެވޯޑް ލިބިފައިވާ އިރު އޭނާ ވަނީ މިދިޔަ އަހަރުގެ ތެރޭގައި އެންމެ ބޮޑު އާމްދަނީ ހޯދި ފިލްމްތަކުގައި ހަރަކާތްތެރިވެފައެވެ. އޭގެ ތެރޭގައި "އޭ ދިލްހެ މުޝްކިލްހޭ" އާއި ސުޕަ ސްޓާ ސަލްމާން ޚާންއާ އެކު އޭނާ ފެނިގެން ދިޔަ "ސުލްތާން: ހިމެނެއެވެ.

ލަވަކިޔުންތެރިޔާ އަދި އެކްޓްރެސް ސޯފީ ޗާދަރީ ހުށަހަޅައިދިން މި ހަފްލާގައި ބޮލީވޫޑްގެ މަޝްހޫރު ގިނަ ތަރިންތަކެއް ބައިވެރިވިއެވެ. އޭގެ ތެރޭގައި ސްޕަ ސްޓާ އަމީތާބް ބައްޗަން އާއި ވަރުން ދަވަން، އާލިއާ ބަޓް، ކެޓްރީނާ ކައިފް، ރިތިކް ރޯޝަންގެ އިތުރުން ޕްރޮޑިއުސަރު އަދި ޑައިރެކްޓަރު ކަރަން ޖޯހަރް ހިމެނެއެވެ.

އެވޯޑްތަކަށް ބަލާއިރު ފްރެޝް ފޭސް އޮފް ދި އިޔާ އެވޯޑް ހާސިލްކޮށްފައި ވަނީ "އެމްއެސް ދޯނީ: ދަ އަންޓޯލްޑް ސްޓޯރީ" އިން ފެނިގެން ދިޔަ ދިޝާ ޕަޓާނީއެވެ. ކްރިއޭޓިވް މާވްރިކް އޮފް ދި އިޔާގެ އެވޯޑް ހާސިލްކޮށްފައި ވަނީ އިހްޒަމާނުގެ ލޯބީގެ ވާހަކައެއްގެ މައްޗަށް ބިނާކޮށް ތައްޔާރުކޮށްފައިވާ "މޮހެންޖޯ ދާރޯ" ގެ ތަރި ރިތިކް ރޯޝަންއެވެ.

އިތުރު އެވޯޑްތަކަށް ބަލާއިރު ޕާސަނަލިޓީ އޮފް ދި އިޔާގެ އެވޯޑް ލިބުނީ އަމީތާބް ބައްޗަންއަށެވެ. މިދިޔަ އަހަރުގެ ތެރޭގައި އަމީތާބު ވަނީ ފާހަގަކޮށްލެވޭ ތިން ފިލްމަކުން ފެނިގެން ގޮސްފައެވެ. އޭގެ ތެރޭގައި "ޓީން" އާއި "ޕިންކް" އަދި "ވަޒީރު" ފާހަގަކޮށްލެވެއެވެ.

ގްލެމާ އައިކަންއަކަށް ހޮވިފައި ވަނީ ކެޓްރީނާ ކައިފްއެވެ. ވިޝަނަރީ ވުމަން އޮފް ދި އިޔާގެ އެވޯޑް ޓްވިންކް ކަންނާ އަށް ލިބިގެން ގޮސްފައިވާ އިރު އެހެން ދާއިރާތަކުން ވެސް ފާހަގަކޮށްލެވޭ ފަރާތްތަކަށް އެވޯޑްތައް ދީފައި ވެއެވެ.