ވިލިނގިއްޔާއި ކޫއްޑޫ ބްރިޖަކުން ގުޅާލާނެ ކަމަށް އިބޫ ވިދާޅުވެއްޖެ
ހެޔޮ އަގެއްގައި އެކަން ކުރެވޭނެ ކަމަށް ވިދާޅުވި
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް ގއ. ވިލިނގިލީގައި ވާހަކަފުޅު ދައްކަވަނީ
ގއ. އަތޮޅުގެ ވެރިކަން ކުރާ ވިލިނގިލިއްޔާއި ގއ. ކޫއްޑޫ، ބްރިޖަކުން ގުޅާލައްވާނެ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވައުދުވެވަޑައިގެންފިއެވެ.
ވިލިނގިލިން ފުރައިގެން ލޯންޗެއްގައި ކޫއްޑޫއަށް ދެވެނީ ތިން މިނެޓުންނެވެ. އެއާޕޯޓަކާއި މަސް ފެކްޓްރީއަކާއި ރިސޯޓެއްގެ ގޮތުގެ ގޮތުގައި ވެސް ބޭނުން ކުރާ ކޫއްޑޫ އާއި ވިލިނގިއްޔާ ދެމެދު ގަނޑެއް އޮވެއެވެ. އެ ކަނޑަކީ ކުއްޑޫ މަސް ފެކްޓްރީއަށް މަސް ކިރުވަން ރާއްޖެއިން ބޭރުން އަންނަ އާގު ބޯޓުފަހަރު ދަތުރުކުރާ ކަނޑެކެވެ.
ކޫއްޑޫއަކީ ވިލިނގިއްޔާ ވަރަށް ކައިރީގައި އޮތް ރަށެއްކަން ފާހަގަ ކުރައްވައި، ވިލިނގިލީގައި ބޭއްވި ޖަލްސާގައި އިބޫ ވިދާޅުވީ ވިސްނުމަކަށް ވާންވީ ފަސޭހައިން އެއްތަނުން އަނެއް ތަނަށް ދެވި، ގުޅުވާލެވޭނެ ގޮތެއްވުން ކަމަށެވެ.
އެމްޑީޕީ ވެރިކަމުގައި ހުޅުލެ-މާލެ ގުޅާލެވޭނެ އަގު ބެއްލެވި ކަމަށާއި އެގޮތުން އެފަދަ ބްރިޖަކަށް ހަރަދު ވާނީ 70 މިލިއަން ޑޮލަރު ކަމަށާއި ނަމަވެސް ހުޅުމާލެ-މާލެ ބްރިޖަށް 300 މިލިއަން ޑޮލަރު ހަރުދުވެފައިވާ ކަމަށް އިބޫ ވިދާޅުވިއެވެ.
"ވިލިނގިއްޔާއި ކޫއްޑޫ ގުޅުވާލުމަށް އެހާ ބޮޑު ހަރަދެއް ދާނެ ކަމެއް ނޫން. އިރާދަ ކުރެއްވިއްޔާ އަޅުގަނޑުމެންގެ ވެރިކަމެއްގައި އެކަން ފެނިގެންދާނެ،" ވިލިނގިލީގެ ގިނަ އަދަދެއްގެ ބަޔަކު ބައިވެރިވި ޖަލްސާގައި އިބޫ ވިދާޅުވިއެވެ.
ހުވަދު އަތޮޅަށް މިދިޔަ ހުކުރު ދުވަހު އިބޫ ފެއްޓެވި ދަތުރުފުޅުގައި އާދީއްތަ ދުވަހާ ހަމައަށް އެމަނިކުފާނު ވަނީ 14 ރަށަކަށް ވަޑައިގެންފައެވެ. ހުވަދު އަތޮޅުގައި މީހުން ދިރިއުޅޭ 18 ރަށަކަށް ކުރައްވާ ދަތުރުފުޅު ނިންމަވާލެއްވުމަށްފަހު، އިބޫ މާލެ ވަޑައިގަންނަވާނީ ހޯމަ ދުވަހުގެ ހަވީރުއެވެ.
