ކޫއްޑޫއަށް ދިޔަ ފްލައިޓެއްގެ ތެރޭގައި މީހަކު މަރުވެއްޖެ

ވެލާނާ އިންޓަނޭޝަނަލް އެއާޕޯޓުން ފުރައިގެން ކޫއްޑޫއަށް ދަތުރު ކުރި ފްލައިޓެއްގެ ތެރޭގައި ދިވެހި އަންހެނަކު މަރުވެއްޖެއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި، މަރުވެފައިވަނީ ގއ. ކޮލަމާފުށީ އުމުރުން ދުވަސްވީ އަންހެނެކެވެ.

އޭނާ މަރުވެފައިވަނީ ކޫއްޑޫއަށް ދަތުރުކުރި މޯލްޑިވިއަންގެ ފްލައިޓެއްގެ ތެރޭގައެވެ. މޯލްޑިވިއަންގެ މެނޭޖިންގ ޑިރެކްޓަރ އަބުދުﷲ ހާރިސް ވިދާޅުވީ، އެމީހާއަކީ މުސްކުޅިބަލީގައި ގިނަ ދުވަސްތަކެއް ވަންދެން އެނދުމަތިކޮށްފައިވާ މީހެއް ކަމަށާއި، އޭނާ މަރުވީ، އުއްމީދު ކަނޑާލާފައި އޮތުމުގެ ސަބަބުން އާއިލާއިން ބޭނުންވެގެން ރަށަށް ގެންދިއުމަށް ދަތުރު ކުރަމުން ގޮސް ކޫއްޑޫގައި ޖައްސަން ތައްޔާރުވެފައި ވަނިކޮށް ކަމަށެވެ.

މައުލޫމާތު ލިބިފައިވާ ގޮތުގައި، އެމީހާގެ ހަށިގަނޑު ކޫއްޑޫ އެއާޕޯޓްގައި ބޭއްވުމަށް ފަހު މިހާރު، ކޮލަމާފުއްޓަށް ގެންދިއުމަށް ދަނީ މަސައްކަތް ކުރަމުންނެވެ.