ދިވެހި ރައްޔިތުންނަށް ފާއިތުވެގެން ދިޔަ ހަތަރު އަހަރު ކުރިމަތިވި އެންމެ ބޮޑު ނުރައްކަލަކީ ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމް ގާނޫނުތަކަށް ބަދަލު ގެނެސްގެން ހުދުމުހުތާރު ވެރިކަމެއް ކުރުމަށް މަސައްކަތްކުރުން ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމް ވިދާޅުވެއްޖެއެވެ.

ގުޅިފައިވާ ޕާޓީތަކުން ބުދަ ދުވަހުގެ ރޭ މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން އަނާރާ ވިދާޅުވީ ފައިތުވެގެންދިޔަ މިހަތަރު އަހަރުގެ ތެރޭގައި ސަރުކާރުގެ ބާރާއި ނުފޫޒުން ވަރަށް ގިނަ ގާނޫނުތަކަށް ބަދަލު ގެނެސްފައިވާ ކަމަށެވެ. އަދި ހުރިހާ ބާރެއް ވަނީ ރައީސް ޔާމީންގެ މުށުތެރެއަށް ލާފައި ކަމަށެވެ.

އަނާރާ ވިދާޅުވީ ރައްޔިތުންގެ ބަސް ނުވިކޭ ގޮތަށް ގާނޫނުތައް ބަދަލުކުރުމަކީ ދިވެހިން އެދޭ ގޮތެއް ނޫން ކަމަށާއި، ދިވެހިން ބޭނުން ވަނީ ބާރުތައް ވަކިކުރެވިފައިވާ ނިޒާމެއް މިގައުމުގައި އޮންނަން ކަމަށެވެ.

ދިވެހިރާއްޖޭގައި 2500 އަށް އަހަރަށް ވުރެ ދިގު ތާރީހެއް އޮތްކަން ފާހަގަކުރައްވައި އަނާރާ ވިދާޅުވީ ދިވެހިންނަކީ މިނިވަންކަމަށް ލޯބިކުރާ ބައެއް ކަން ތާރީހުން ވެސް އެނގޭ ކަމަށެވެ.

"ރައްޔިތުންގެ ބަހަކީ ވެސް ވިކޭ ބަހެއްގެ ކަމުގައި ވާން. ހަމައެކަނި އެންމެ ފަރުދަކު ބޭނުންވާ ގޮތަށް ހުރިހާ ކަމެއް ނިންމުން އެއީ ތާރީހަށް ބެލިއަސް ދިވެހިން އެދޭ ގޮތެއް ނޫން ގޮތެއްކަން އެނގިގެންދޭ" އަނާރާ ވިދާޅުވިއެވެ.

ރާއްޖޭގައި އިސްލާމްދީން ދެމިއޮންނާނީ ރައީސް ޔާމިން މިފަސް އަހަރަށް ހޮވައިގެން ކަމަށް ސަރުކާރުގެ ބޭފުޅުން ދައްކަވާ ވާހަކަތަކަށް އިޝާރާތް ކުރައްވައި އަނާރާ ވިދާޅުވީ ދިވެހިރާއްޖޭ އިސްލާމްވި ފަހުން 850 އަހަރަށް ވުރެ ގިނަ އަހަރުވެފައިވާ ކަމަށާއި، އޭރު އިސްލާމް ދީން އޮތީ ރައީސް ޔާމިން ހުންނަވައިގެން ނޫން ކަމަށެވެ. 

އަނާރާ ވިދާޅުވީ އިސްލާމް ދީނުގެ ނަޒަރުން ބަލާއިރު ވެރިއެއްގެ ކޮންމެހެން ހުންނަންޖެހޭ ދެ ސިފައަކީ ތެދުވެރިކަމާއި، އަމާނަތްތެރިކަން ކަމަށެވެ. އަދި މި ދެ ސިފަ ފެންނާނީ އިއްތިހާދުގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އާއި ފައިސަލް ނަސީމު ފަރާތްފުޅުން ކަމަށެވެ. މި ދެ ބޭފުޅުންނަކީ ރައްޔިތުންނަށް ހެޔޮ ވެރިކަމެއް ކޮށްދެއްވާނެ ދެ ބޭފުޅުން ކަމަށް ވެސް އަނާރާ ވިދާޅުވިއެވެ. 

އަނާރާ ވިދާޅުވީ މިސަރުކާރުގެ އަނިޔާވެރިކަން ހައްދުފަހަނައަޅައި ގޮސް އެތަކެއް ބަޔަކަށް އަނިޔާ ދީފައިވާ ކަމަށާއި، މިއަހަރުގެ ސެޕްޓެންބަރު 23 ވަނަ ދުވަހަކީ މިހާރު ރައްޔިތުންގެ ތަހައްމަލް ކުރަމުންދާ ހިތްދަތި އިހުސާސް އުފާވެރި އިހުސާސްތަކަށް ހެދުމަށް ރައްޔިތުންނަށް ލިބެންދާ ފުރުސަތެއް ކަމަށެވެ.

އެހެންކަމުން މިފުރުސަތުގެ ބޭނުން ހިފައި އިއްތިހާދުގެ ކެންޑިޑޭޓަށް ވޯޓު ދިނުމަށް ވެސް އަނާރާ ގޮވާލެއްވިއެވެ.