ބަންދު ކުރި ރާާޅާ އަޅާ ސަރަހައްދު ހުޅުވަނީ
ބްރިޖް އަޅާ ސަރަހައްދުގައި ރާޅާ އެޅުން މަނާކޮށްފައިވަނީ 2016 ވަނަ އަހަރުގެ ތެރޭގައި
ރާއްޖޭގައި ޒުވާން ރާޅާއެޅުންތެރިންތަކެއް ރާޅާއަޅަނީ
މާލެއާއި ހުޅުލެއާއި ދެމެދު އެޅި ސިނަމާލެ ބްރިޖްގެ މަސައްކަތްކުރަމުންދާތީ ބަންދުކުރި ރާޅާ އަޅާ ސަރަހައްދު ބްރިޖް ހުޅުވުމާއެކު ހުޅުވާލައި، އެސަރަހައްދުގައި ރާޅާ އެޅުމަށް ހުއްދަ ދޭނެކަމަށް ހައުސިންގ މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ބްރިޖް ހުޅުވުމާއި ބެހޭ ގޮތުން މައުލޫމާތު ދިނުމަށް ހައުސިންގ މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއިއްޒު ވިދާޅުވީ ރާޅާ އެޅުން އެ ސަރަހައްދުގައި މަނާ ކޮށްފައިވަނީ ސަލާމަތީ ސަބަބުތަކާ ހެދިކަމަށެވެ.
"ރާޅާ އެޅުން މަނާކުރީ ސަލާމަތީ ސަބަބުތަކަށްޓަކާ ދެއްތޯ. އެހެން ވީމަ ބްރިޖް ހުޅުވުމާއެކު ރާޅާ އަޅާ ކުދިން އުފަލާ އެކީ ރާޅާ އަޅަންވީ،" މުއިއްޒު ވިދާޅުވިއެވެ.
ބްރިޖްގެ ސަރަހައްދުގައި ރާޅާ އެޅުން މަނާކޮށް މިނިސްޓްރީން އޭރު ނެރުނު ބަޔާނުގައި ބުނީ، މަޝްރޫއުގެ މަސައްކަތް ކުރުމުގައި މާލޭގެ އިރުމަރީ ފަރާތު ކަނޑުތޮށިގަނޑުން ފެށިގެން ހުޅުލެއާ ދެމެދުގެ ކަނޑުގެ ސަރަހައްދުގައި ބޮޑެތި ބޯޓާއި އެހެނިހެން ބަރު އާލާތްތައް ބޭނުން ކުރަން ހަމަޖައްސާފައިވާތީ، ލޮނު ޒިޔާރަތްކޮޅު ރާޅާ އަޅާ ސަރަހައްދުގެ މޫދަށް އެރި އުޅުމަކީ ރާއްކާތެރި ކަމަކަށް ނޫން ކަމަށެވެ. އެހެންވެ އެ ސަރަހައްދަށް މޫދަށް އެރި އުޅުމުގެ ތެރޭގައި ލިބިދާނެ ބޮޑެތި ގެއްލުމަކުން ރައްކާތެރިވުމަށް ބްރިޖް މަޝްރޫއު ނިމެންދެން އެ ސަރަހައްދަށް މޫދަށް އެރުން މަނާކޮށްފައިވާ ކަމަށެވެ.
ލޮނުޒިޔާރާތްކޮޅުގައި ބްރިޖް އަޅާތީ ރާޅާ އެޅުން މަނާކުރުމުން މީގެ ކުރިން ރާޅާ އަޅާ ޒުވާނުން ވަނީ އެކަމާ ނުރުހުން ފާޅުކޮށް، އެ ސަރަހައްދަށް މޫދަށް އެރިގެންނާއި އެއްގަމުގައި މުޒަހާރާ ކޮށްފައެވެ.
