ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)ގެ ބޮޑު ޖަލްސާއެއް އަންނަ ސެޕްޓެމްބަރު މަހުގެ 7ގައި ބާއްވަން ހަމަޖެހިފައިވާކަމަށް އެ ޕާޓީން ބުނެފިއެވެ.
ޖަލްސާއާއި ބެހޭގޮތުން ޕީޕީއެމްގެ ފަރާތުން އެ ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕީޕީއެމް ޕާލިމަންޓްރީ ގުރޫޕްގެ ލީޑަރު އަހްމަދު ނިހާނު ހުސައިން މަނިކު ވިދާޅުވީ ސެޕްޓެމްބަރު 7 ވާ ހުކުރުދުވަހުގެރޭ 8:30 ގައި ޕީޕީއެމް ޖަލްސާ އަލިމަސް ކާނިވާ ސަރަހައްދުގައި ކަމަށެވެ.
ނިހާނު ވިދާޅުވީ އެ ޖަލްސާގައި ރައީސް ޔާމީންގެ މެނިފެސްޓޯގެ މުހިއްމު ކަންތައްތައް ހިއްސާ ކުރައްވާނެ ކަމަށާއި އެޖަލްސާގައި ރައީސް ޔާމީން ވާހަކަފުޅު ދައްކަވާނެކަމަށެވެ.
ޕީޕީއެމުން ޖަލްސާއެއް ބާއްވަން ނިންމާފައިވާއިރު ގުޅިފައިވާ ޕާޓީތަކުގެ ބޮޑު ޖަލްސާއެއް ބޭއްވުމަށް ދަރުބާރުގެ ރަންނަބަނޑޭރި މާލަން ދިނުމަށް ހައުސިން މިނިސްޓްރީން ނިންމާފައިވާކަމަށް އެމްޑީޕީއަށް ވަނީ އަންގާފައެވެ. އެހެން ނަމަވެސް ގުޅިފައިވާ ޕާޓީތަކުގެ ބޮޑު ޖަލްސާ ބާއްވާނެ ތާރީޚެއް އަދި ހާމަކޮށްފައެއް ނުވެއެވެ. މިއީ ފަހުގެ ތާރީހެއްގައި ގުޅިފައިވާ ޕާޓީތަކަށް އެފަދަ ހަރަކާތެއް ބޭއްވުމަށް ސަރުކާރުން ތަނެއް ހަމަޖައްސައިދިން ފުރަތަމަ ފަހަރެވެ.
