އިންޑިއާގެ ދެ ހެލިކޮޕްޓަރު މިވަގުތަށް ރާއްޖޭގައި ބާއްވަން ނިންމައިފި ކަމަށް އިންޑިއާގެ ނޫހަކުން ބުނެފި
27 އޯގަސްޓު 2018 | ހޯމަ 07:19ދެ ގައުމުގެ ގުޅުންވަނީ ގޯސްވެފައި
އިންޑިއާ ސަރުކާރުން ދީފައި އޮންނަ ދެ ހެލިކޮޕްޓަރުގެ ތެރެއިން ހެލިކޮޕްޓަރަކުން ބަލިމީހަކު ބާލަނީ
އިންޑިއާ އިން ދިވެހިރާއްޖެއަށް ދީފައިވާ އަސްކަރީ ދެ ހެލިކޮޕްޓަރާއި އެއާ އެކު މަސައްކަތްކުރަން ތިބި 48 ކުރޫ މެމްބަރުންނާއި ސަޕޯޓް ސްޓާފުން ކުރިޔަށް އޮތް މަދު މަސްތަކަކަށް އަދި ރާއްޖޭގައި ތިބޭނެ ކަމަށް ޚާރިޖީ އަދި އަސްކަރީ ދާއިރާގެ މަސްދަރުތަކާ ހަވާލާދީ އިންޑިއާގެ ނޫހަކުން ރިޕޯޓްކޮށްފިއެވެ.
ޓައިމްސް އޮފް އިންޑިއާ އިން ބުނެފައިވާ ގޮތުގައި ދެގައުމުގެ މެދުގައި އެކަމާ ބެހޭ ގޮތުން ދަނީ މަޝްވަރާކުރަމުންނެވެ.
އިންޑިއާ އިން 2013 ވަނަ އަހަރު ރާއްޖެއަށް ދިން ދެ ހެލިކޮޕްޓަރު ރާއްޖޭގައި ބޭއްވުމަށް ނިންމި މުއްދަތު ހަމަވެފައިވާއިރު އެ ހެލިކޮޕްޓަރު އިތުރަށް ރާއްޖޭގައި ބާއްވަން ބޭނުންނުވާ ކަމަށް ރާއްޖެއިން ވަނީ ބުނެފައެވެ. އަދި ޖޫން މަހުގެ ކުރިން ދެ ހެލިކޮޕްޓަރު ގެންދަން ސަރުކާރުން އެންގިއެވެ. ނަމަވެސް މިހާތަނާ ޖެހެންދެން ވެސް ގެންގޮސްފައެއް ނުވެއެވެ.
ޑިޕްލޮމޭޓަކާ ހަވާލާދީ ޕްރެސް ޓްރަސްޓް އޮފް އިންޑިއާގައި ބުނެފައި ވާގޮތުގައި އެތައް ފަހރެއްގެ މަތިން ކުރިޔަށްގެންދިޔަ މަޝްވަރާތަކަށް ފަހު ހެލިކޮޕްޓަރާއި ކްރޫ މެމްބަރުން ބޭތިއްބުމަށް ދިވެހި ސަރުކާރުން ވަނީ އެއްބަސްވެފައެވެ.
ދެފަރާތުގެ މެދުގައި ދެކެވެނު ވާހަކަތަކާ އެކު ރާއްޖޭގެ ފަރާތުން އެކަމަށް އެއްބަސްވާނެ ކަހަލަ ނިޝާނެއް ފެނިފައިވާ ކަމަށާއި ދިގު މުއްދަތަކަށް ބޭއްވުމުގެ ފުރުސަތު އޮތް ކަމަށް ވެސް އެ ނޫހަށް މައުލޫމާތު ދީފައިވާ ފަރާތުން ބުނެފައި ވެއެވެ.
ދެ ހެލިކޮޕްޓަރުގެ ތެރެއިން ކޯސްޓްގާޑުން އޮޕަރޭޓްކުރާ ހެލިކޮޕްޓަރުގެ މުއްދަތު މި އަހަރުގެ ކުރީކޮޅު ހަމަވެފައިވާއިރު އިންޑިއާ ނޭވީ އިން އޮޕަރޭޓްކުރާ ހެލިކޮޕްޓަރުގެ މުއްދަތު ހަމަވެފައި ވަނީ މި އަހަރުގެ ޖޫންމަހުގެ 30 ވަނަ ދުވަހުއެވެ.
ރާއްޖެ އިން ބުނެފައި ވަނީ ދެ ހެލިކޮޕްޓަރު ފޮނުވާލުމަށް ފަހު ރާއްޖެއިން ބޭނުންވަނީ ސާވަޔަލެންސް މަތިންދާބޯޓެކެވެ. ނަމަވެސް އެކަމާ ގުޅޭ ގޮތުން އިންޑިއާ އިން ހުށަހެޅި ހުށަހެޅުމަށް ވެސް ދިވެހި ސަރުކާރުން ޖަވާބެއް ދީފައި ނުވާ ކަމަށް އިންޑިއާގެ އޮފިޝަލުންނާ ހަވާލާދީ މީޑިއާތަކުން ބުނެފައި ވެއެވެ.
ހެލިކޮޕްޓަރު ފޮނުވާލަން ސަރުކާރުން ނިންމި އިރު ރާއްޖެ އާއި ޗައިނާއާ ދެމެދު ގުޅުން އިތުރަށް ބަދަހިކުރަމުން ދިއުމުގެ ސަބަބުން އިންޑިއާ އާއި ރާއްޖޭގެ ގުޅުން ވަރަށް ބޮޑަށް ގޯސްވެފައެވެ.
