ސުބްރަމާނިއަމް ފާޅުކުރެއްވީ އަމިއްލަފުޅު ޚިޔާލެއް: އިންޑިއާ
26 އޯގަސްޓު 2018 | އާދީއްތަ 04:17އިންޑިއާ ސަރުކާރުގެ ސިޔާސަތަކާއި ގުޅުމެއް ނެތް
އިންޑިއާގެ ރާޖަ ސަބާގެ މެމްބަރު ސުބްރަމާނިއަން ސުވާމީ
ސެޕްޓެމްބަރު 23 ގައި ބާއްވާ ރިޔާސީ އިންތިޚާބު އޮޅުވާލައިފި ނަމަ، އިންޑިއާއިން ރާއްޖެ ހިފަން ޖެހޭނެ ކަމަށް ވިދާޅުވެ އިންޑިއާގެ ރާޖަ ސަބާގެ މެމްބަރު ސުބްރަމާނިއަން ސުވާމީ ކުރެއްވި ޓްވީޓަކީ އޭނާގެ އަމިއްލަ ޚިޔާލުފުޅެއް ކަމަށް އިންޑިއާ ސަރުކާރުން ބުނެފިއެވެ.
އިންޑިއާ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަވީޝް ކުމާރާއި ޙަވާލާދީ އެ މިނިސްޓްރީން އާދީއްތަ ދުވަހު އާންމުކުރި ކުރު ބަޔާނެއްގައި ބުނެފައިވަނީ ސުބްރަމާނިއަން ސުވާމީގެ ޓްވީޓަކީ އޭނާގެ އަމިއްލަ ޚިޔާލުފުޅު ކަމަށާއި އެއީ އިންޑިއާ ސަރުކާރުން ދެކޭ ގޮތް ނޫން ކަމަށެވެ.
ހޯމަ ދުވަހު އާންމުކޮށްފައިވާ އެ ބަޔާނުގައި ބުނެފައިވަނީ ސުބްރަމާނިއަންގެ ވާހަކަތަކާއި އިންޑިއާ ސަރުކާރުން ދެކޭ ގޮތާއި އެއްވެސް ގުޅުމެއް ނެތް ކަމަށެވެ.
އިންޑިއާގެ ކުރީގެ ޔުނިއަން މިނިސްޓަރު އަދި ވެރިކަންކުރާ ބީޖޭޕީގެ ނޭޝަނަލް އެގްޒެކްޓިވް ކޮމިޓީގެ މެމްބަރު ރާއްޖެއެމްވީގެ ހަބަރެއްގެ ލިންކާއެކު ކުރެއްވި ޓުވީޓެއްގައި ވިދާޅުވެފައި ވަނީ އިންތިހާބު އޮޅުވާލައިފި ނަމަ އިންޑިއާއިން ރާއްޖެ ހިފަން ޖެހޭނެ ކަމަށެވެ.
ސުޕްރީމް ކޯޓުން ފެބްރުއަރީގައި 1 ގައި ނެރުނު އަމުރު ބާތިލްކޮށް ކުއްލި ނުރައްކަލުގެ ހާލަތު އިއުލާންކުރުމުން އިންޑިއާ އިން އެކަމާ ވަރަށް ބޮޑަށް ނުރުހުންވެ، ދިވެހި ސަރުކާރަށް ފާޑު ކިޔާފައިވެ އެވެ. އަދި އެ މައްސަލައާ ގުޅިގެން ދެ ގައުމު ސިޔާސީ ގުޅުން ވަނީ ވަރަށް ބޮޑަށް ގޯސްވެފަ އެވެ.
ސުބްރަމާނިއަން ސުވާމީގެ ކުރެއްވި ޓްވީޓުގައި ވިދާޅުވެފައިވާ ވާހަކަ ގުޅިފައިވާ ސިޔާސީ ޕާޓީތަކުންވެސް ވަނީ ކުށްވެރިކޮށްފައެވެ.
އެގޮތުން ރިޔާސީ އިންތިޚާބު މިނިވަންކަމާ އެކު ބޭއްވުމަށް ބޭރުގެ ފަރާތްތަކުން މަސައްކަތް ކުރަން ވާނީ ބައިނަލްއަގުވާމީ ހަމަތަކާއި އުސޫލުތަކުގެ ތެރެއިން ކަމަށާއި ރާއްޖޭގެ މިނިވަންކަމަށް ބުރޫއަރާ ފަދަ އެއްވެސް ކަމަކަށް ޖާގަ ނުދެއްވާނެ ކަމަށް އިދިކޮޅު ކޯލިޝަންގެ ރިޔާސީ ކެންޑިޑޭޓް، އިބްރާހިމް މުހައްމަދު ސޯލިހް (އިބޫ) ވިދާޅުވިއެވެ.
އިބޫގެ އިތުރުން ރަނިންގްމޭޓް ފައިސަލް ނަސީމް ވިދާޅުވީ ސުބްރަމާނިއަން ސުވާމީ ވިދާޅުވީ ޒިންމާދާރުކަމެއް ނެތް ވާހަކައެއް ކަމަށާއި އެކަމާ ފާޅުގައި ދެކޮޅު ހައްދަވާ ކަމަށެވެ.
