ގދ.ތިނަދޫގައި ޕީޕީއެމުން ބޭއްވި ވެހިކަލް ބުރުގައި ޕިކަޕަކުން ދޮށީ އުމުރުގެ މީހަކު ވެއްޓި ވަރަށް ބޮޑަށް އަނިޔާވެއްޖެއެވެ.
މިހަރާކާތުގައި ބައިވެރިވި ޒުވާނަކު ރާއްޖެއެމްވީއަށް ބުނީ ކޮންމެ ހޮނިހިރު ދުވަހަކު ރައީސް ޔާމިނަށް ތާއީދުކުރާ މީހުން ވެހިކަލް ބުރު ބާއްވާ ކަމަށެވެ.
އެގޮތުން މިއަދު ހަވީރު ބޭއްވި މިބުރުގައި ޕިކަޕަކުން ދޮށީ އުމުރުފުރާގެ ފިރިހެނަކު ވެއްޓި ވަރަށް ބޮޑަށް އަނިޔާވެފައިވާ ކަމަށާއި، އެމީހާ 3 ފޫޓު ދުރަށް ގޮސްޖެހިފައިވާ ކަމަށެވެ. އަދި ވެއްޓިފައި އޮތީ ތިނަދޫގެ އެމްޑީޕީ މައި ޖަގަހަ ދޮރު މައްޗަށް ކަމަށް ވެސް އެމީހާ ބުންޏެވެ.
އެމީހާ ބުނީ އެޕިކަޕް އެމަގަށް އަޅަމުން ކުއްލިއަކަށް ސްޕީޑް ބާރުކޮށްލި ކަމަށާއި، ޕިކަޕުގައި ގޮޑީގައި އިށީދެން ތިބި މީހުން އަރިއަޅައިގަތް ކަމަށެވެ.
"ޕިކަޕުގައި ތިބޭނީ ސައިކަލު ނުދުއްވޭ މީހުން. އަންހެނުންނާއި، ދޮށީ އުމުރުގެ ފިރިހެނުން. އަހަރުން ތިބީ ފަހަތުގައި. ގޮނޑި ބަހައްޓައިގެން މީހުން ތިބޭނީ. ގޯޅިއަޅަމުން ކުއްލިއަކަށް ސްޕީޑް ހިފާލީ. ވެދާނެ އެމްޑީޕީ ޖަގަހަ އިނީމަ ކަމަށް ވެސް. ދެން އެމީހާއަށް ވެއްޓި އަނިޔާ ވީ. އިތުރު މީހަކަށް އަނިޔާ ނުވޭ އިރާދަކުރެއްވީތީ" މިޒުވާނާ ބުންޏެވެ.
ޕިކަޕުން ވެއްޓުނު މީހާގެ ބޯފަޅައިގެން ގޮސްފައިވާއިރު، އެމީހާގެ ގައިގެ އެތަން މިތަން ވަނީ މަށައިގެން ގޮސްފައެވެ. އެމީހާ މިހާރު ވަނީ ޑރ.އަބްދުއްސަމަދު މެމޯރިއަލް ހޮސްޕިޓަލަށް ގެންގޮސް ފަރުވާދޭން ފަށާއެވެ.
ޕީޕީއެމުން ކޮންމެ ހޮނިހިރު ދުވަހު ބާއްވާ މިވެހިކަލް ބުރުގައި ސައިކަލާއި، ކާރާއި، ޕިކަޕުގެ އިތުރުން ބައިސްކަލްގައި ވެސް ބައެއް މީހުން އުޅެއެވެ.
