މިސަރުކާރުން ވަގަށް ނަގާފައިވާ ފައިސާތައް ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ހޯދާނެ: ރައީސް ނަޝީދު
24 އޯގަސްޓު 2018 | ހުކުރު 11:45އެސްޓީއޯގެ ތެލުގެ ވަގު ވިޔަފާރިންނާއި، އެމްއެމްޕީއާރުސީގެ ވައްކަމުން ފައިސާގެ އިތުރުން އެމްއެމްއޭ ތެރެއިން ކަޅުފައިސާ ދައުރުކޮށްގެން ހޯދާފައިވާ ފައިސާ ހޯދާނެ
ކުރީގެ ރައީސް މުހައްމަދު ނަޝީދު ރައްޔިތުންނާއި މުހާތަބު ކުރައްވަނީ
މިސަރުކާރުން ވަގަށް ނަގާފައިވާ ފައިސާތައް ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ހޯދާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ އެސްޓީއޯގެ ތެލުގެ ވަގު ވިޔަފާރިން ހޯދާފައިވާ ފައިސާއާއި އެމް.އެމް.ޕީ.އާރު.ސީގެ ވައްކަމުން ހޯދާފައިވާ ފައިސާގެ އިތުރުން އެމް.އެމް.އޭ ތެރެއިން ކަޅުފައިސާ ދައުރުކޮށްގެން ހޯދާފައިވާ ފައިސާ ފޮރުވާފައިހުރި ތަންތަން އިބްރާހިމް މުހައްމަދު ސޯލިހުގެ ވެރިކަމެއްގައި ހޯދާނެ ކަމަށެވެ.
ރައީސް ޔާމިންގެ ސަރުކާރުގައި ހިނގައިދިޔަ އެމް.އެމް.ޕީ.އާރް.ސީގެ ހިޔާނަތަކީ ރާއްޖޭގެ ތާރީހުން ވެސް ނުދެކޭ ފަދަ ބޮޑު ހިޔާނާތެއް ކަމަށް ގިނަ ބަޔަކު ދަނީ ބުނަމުންނެވެ. ދައުލަތުން ގެއްލިފައިވާ ފައިސާ ހޯދޭނެ ގާބިލުކަން އިދިކޮޅު ފަރާތްތަކުގައި ނެތްކަމަށް ރައީސް އަބްދުﷲ ޔާމީން ވިދާޅުވެފައިކޮށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު ވަނީ އެފައިސާ ހޯދަދޭނެ ކަމަށް ވިދާޅުވެފައެވެ.
މީގެ އިތުރުން އިލެކްޝަންސް ކޮމިޝަނުން ވޯޓު އޮޅުވާލުމަށް ގިނަ މަސައްކަތްތަކެއް ކުރަމުންދާކަން ފާހަގަކުރައްވައި ރައީސް ނަޝީދު ވިދާޅުވީ އިލެކްޝަންސް ކޮމިޝަނަށް ރީރަޖިސްޓްރީ ކުރުމަށް ހުށަހެޅި 6000 އަށްވުރެ ގިނަ ފޯމުގެ އޮޅުވާލުމުގެ އިތުރުން ވޯޓަރސް ލިސްޓުގެ ރީރަޖިސްޓްރޭޝަން ފޯމް ނުފުރާ ކިތަންމެ ބައެއް އެހެން ތަންތަނަށް ރަޖިސްޓްރީ ކޮށްފައިވުމަކީ ބޮޑު މައްސަލައެއް ކަމަށެވެ.
ވޯޓު އޮޅުވާލަން މިސަރުކާރުން މަސައްކަތް ކުރި ނަމަވެސް ބޮޑުތަނުން ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު ކާމިޔާބު ކުރައްވާނެ ކަމަށް ރައީސް ނަޝީދު ވިދާޅުވިއެވެ.
ވޯޓުލުމުގެ ހައްގު ލިބޭ ހުރިހާ ފަރާތްތަކުން ވެސް ވޯޓު ރަޖިސްޓްރީކޮށްފައިވަނީ ރަނގަޅު ތަނަށް ކަމަށް ބެލުމަށް ރައީސް ނަޝީދު ވަނީ އިލްތިމާސް ކުރައްވާފައެވެ.
