އަވަހަރާކޮށްލާފައިވާ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް ސިޔާސީ ޕާޓީއެއްގައި ހުންނަވާ ނަމަ ހުންނަވާނީ އެމްޑީޕީގައި ކަމަށް ވިދާޅުވި ކަމަށް ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
އަނިޔާވެރި ގޮތަކަށް އަވަހާރަކޮށްލާފައިވާ ޑރ. އަފްރާޝީމްގެ އުފަން ރަށް، އުނގޫފާރުގައި ހުކުރު ދުވަހު ވަޑައިގެން، ސަޕޯޓަރުންނާ ބައްދަލުކުރައްވައި ދެއްކެވި ވާހަކަފުޅުގައި އިބޫ ވިދާޅުވީ ސިޔާސީ ޕާޓީއެއްގައި ހުންނަވާ ނަމަ ހުންނަވާނީ އެމްޑީޕީގައި ކަމަށް އެމަނިކުފާނުގެ އަރިހުގައި އަފްރާޝީމް ވިދާޅުވީ އެންމެ ފަހުން ބައްދަލުވެ ވާހަކަ ދެކެވުނު ފަހަރު ކަމަށެވެ. އަދި ވިދާޅުވީ އެމަނިފާނު އޭރު ޕީޕީއެމްގައި އަދި އޭގެ ކުރިން ޑީއާރުޕީގައި ހުންނެވީ ވެސް ކުރީގެ ރައީސް މައުމޫނުދެކެވާ ލޯބިފުޅެއްގެ ސަބަބުން ކަމަށް ވެސް އަފްރާޝީމް ވިދާޅުވި ކަމަށެވެ.
ސިޔާސީ ހިޔާލު ތަފާތުވުން އޭރު ހުރި ނަމަވެސް ޑރ. އަފްރާޝީމަކީ ވަރަށް ގާތް އަޚެއް ކަމަށް ވެސ އިބޫ ވިދާޅުވިއެވެ. އަދި ވިދާޅުވީ ޑރ. އަފްރާޝީމަކީ ސައްހަ ދީނީ އަގީދާ ބަޔާންކޮށްދިނުމުގައި ސާބިތުވެ ހުންނެވި ބޭފުޅެއް ކަމަށެވެ.
ފާއިތުވި ހައެއްކަ އަހަރަކީ ރާއްޖެ ދުށް އެންމެ ނާމާން ބިރުވެރި އަހަރުތައް ކަމަށް ފާހަގަ ކުރައްވައި އިބޫ ވިދާޅުވީ ހަގީގަތް ހޯދިފައިވާނުވާ މަރުގެ މައްސަލަތައް ބަލައި އެކަން ހޯދަން މަސައްކަތް ކުރައްވާނެ ކަމަށެވެ.
ޑރ. އަފްރާޝީމްގެ މަރުގެ ހަގީގަތް ހޯދިފައިވާނުވާއިރު އެކަން ހަމައެކަނި އޭރު 18 އަހަރު ވެސް ނުވާ ކުއްޖެއްގެ ބޮލުގައި އަޅުވައި ނިންމާލީ ކަމަށް ވެސް އިބޫ ވިދާޅުވިއެވެ. ޑރ. އަފްރާޝީމްގެ އަވަހާރަ ކޮށްލުމަށް ފަހު ވެސް ގޮތް ނޭނގޭ 31 މަރެއް ހިނގާފައިވާކަން ފާހަގަ ކުރައްވައި އިބޫ ވިދާޅުވީ އެ މައްސަލަތައް ބައްލަވާނެ ކަމަށެވެ.
