ނަޝީދުގެ ވެރިކަމުގައި 300 ރަށް ދޫނުކުރާކަމަށް ޕީޕީއެމްގެ ޓުއަރިޒަމް މިނިސްޓަރ ވަނީ މަޖިލީހުގައި ވިދާޅުވެފައި: މަހްލޫފް

ރައީސް ނަޝީދުގެ ވެރިކަމުގައި ބިޑަކާ ނުލައި 300 ރަށް ދޫނުކުރާކަމަށް ރައްޔިތުންގެ މަޖިލީހުގައި ވިދާޅުވީ އެވެރިކަން ބަދަލުވިފަހުން ހުންނެވި ޓުއަރިޒަމް މިނިސްޓަރ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް ވިދާޅުވެއްޖެއެވެ.

މަހްލޫފް މިހެން ވިދާޅުވީ އެމްޑީޕީގެ ވެރިކަމުގައި ބިޑަކާ ނުލައި 400 ރަށް އާއިލީ މީހުންނަށް ބަހާލާފައިވާކަމަށް ވިދާޅުވެ އިކޮނޮމިކް މިނިސްޓަރ މުހައްމަދު ސައީދު ކުރައްވާފައިވާ ޓްވީޓަކަށް ރައްދު ދެއްވަމުންނެވެ.

Advertisement

ސައީދު ކުރެއްވި ޓްވީޓެއްގައި ވިދާޅުވެފައިވަނީ 400 ރަށް އެމްޑީޕީގެ ވެރިކަމުގައި ވަނީ ބިޑް ކުރުމެއް ހަމައެއް އުސޫލެއްނެތި ޕާޓީގެ އެކްޓިވިސްޓުންނާއި އާއިލީ މީހުންނަށް ބަހާލާފައި ކަމަށެވެ.

ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް ޓެގް ކުރައްވާ ސައީދު ވިދާޅުވީ ދައުލަތަށް އަނބުރާ އިބޫ ހޯދަން ޖެހޭ ފުރަތަމަ މުދަލަކީ އެއީ ކަމަށެވެ. އަދި ކެރޭނެ ބާއޭ ވިދާޅުވެ ހޭޝް ޓެގެއްވެސް ވަނީ އެ ޓްވީޓަށް އެޓޭޗް ކުރައްވާފައެވެ.

ސައީދުގެ މިޓްވީޓަށް ރައްދު ދެއްވައި މަހްލޫފް ކުރެއްވި ޓްވީޓެއްގައި ވިދާޅުވީ އޭރު ލިބުނު މައުލޫމާތު ތަކަށް ބިނާކޮށް އެމްޑީޕީ ސަރުކާރުން 300 ރަށް ދިންކަމަށް ބުނެ ޕްރެސްކޮންފަރެންސެއް ބޭއްވީ މަހްލޫފް ކަމަށެވެ. ނަމަވެސް އެމްޑީޕީ ވެރިކަން ބަދަލުވެ އޭރުގެ ޓުއަރިރިޒަމް މިނިސްޓަރ މަޖިލީހުގައި އެއީ ދޮގެއްކަމަށް ވިދާޅުވެފައިވާ ކަމަށެވެ. އަދި ދީފައި އޮތީ 7 ރަށް ކަމަށް ވިދާޅުވެފައި ކަމަށްވެސް މަހްލޫފް ވިދާޅުވިއެވެ.

މަހްލޫފް ވަނީ ސައީދު އެވިދާޅުވަނީ ހަޤީގަތެއްނަމަ 5 އަހަރު ތެރޭ ތަހުގީގް ނުކުރީ ކީއްވެތޯ ސުވާލު ކުރައްވާފައެވެ.

އޭރު ޓުއަރިޒަމް މިނިސްޓަރަކަށް ހުންނެވީ އޭރުގެ ސަރުކާރުގައި އިސްދައުރެއް އަދާކުރަމުންދިޔަ ޕީޕީއެމްގެ ވަޒީރެކެވެ.

ސައީދުގެ އިތުރުން ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަދި ޕީޕީއެމްގެ ނައިބު ރައީސް ޢަބްދުއް ރަހީމްވެސް ވަނީ ތަކުރާރުކޮށް އެވާހަކަ އެގޮތަށް ދައްކަވާފައެވެ.