ރައީސް މައުމޫނު ސިއްހީ ހާލުކޮޅުގެ މައްސަލަ އެޗްއާރްސީއެމްއަށް ހުށަހެޅި ނަމަވެސް ވީކަމެއް ހަރާމް: ވަކީލު ފައިސަލް
23 އޯގަސްޓު 2018 | ބުރާސްފަތި 10:38އެޗްއާރްސީއެމްގެ މެންބަރުން ރައްޔިތުންގެ ފައިސާއިން ނަގާ މުސާރަ ހަލާލުވާ ވަރަށް މަސައްކަތް ކުރަންޖެހޭ
ރައީސް މައުމޫނު އޭޑީކޭއިން ފަރުވާ ހޯއްދެވުމަށް ފަހު ވަޑައިގަންނަވަނީ
ކުރީގެ ރައީސް މައުމޫނު އަބްދުލްގައްޔޫމްގެ ސިއްހީ ހާލުކޮޅުގެ މައްސަލަ ތަކުރާރުކޮށް އެޗްއާރްސީއެމްއަށް ހުށަހެޅި ނަމަވެސް ވީކަމެއް ހަރާމް ކަމަށް އެމަނިކުފާނުގެ ދިފާއީ ވަކީލުންގެ ޓީމުގައި އިސްކޮން މަސައްކަތް ކުރައްވަމުން ގެންދަވާ މުހައްމަދު ފައިސަލް ވިދާޅުވެއްޖެއެވެ.
ރައީސް މައުމޫނުގެ ސިއްހީ ހާލުކޮޅާ މެދު ކަންބޮޑުވުންފާޅުކުރައްވައި ފައިސަލް ކުރެއްވި ޓްވީޓެއްގައި ވިދާޅުވީ ރައީސް މައުމޫނުގެ ސިއްހީހާލުކޮޅުގެ މައްސަލަ އެޗްއާރްސީއެމަށް ތަކުރާރުކޮށް މައްސަލަ ހުށަހަޅާފައިވާ ކަމަށެވެ. ނަމަވެސް މިއަދާ ހަމައަށް އެޗްއާރްސީއެމުން މައްސަލަ ބަލަނީ ކަމަށް ބުނެ އޮއްބާލަނީ ކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ ރައީސް މައުމޫނު ޖަލުގައި ބާއްވައިގެން އެކަށީގެންވާ ސިއްހީ ފަރުވާ ނުދެވޭނެ ކަމަށާއި، އެމަނިކުފާނުގެ ސިއްހީ ހާލުކޮޅާމެދު މިސަރުކާރުން އިހުމާލުވަމުން އަންނަ ކަމަށެވެ.
ރައީސް މައުމޫނުގެ ސިއްހީ ހާލުކޮޅު ދުވަހުން ދުވަހަށް ދަށްވަމުންދާކަން ފާހަގަކުރައްވައި ފައިސަލް ވިދާޅުވީ އެމަނިކުފާނަށް ވަކީލު ބައްދަލުވުމަށް ވެސް ވަޑައިގަނެވޭވަރު ނުވާ ކަމަށެވެ. އެހެންކަމުން ކަރެކްޝަނުން ރައީސް މައުމޫނަށް ފަރުވާ ދިނުމަށް ގެއަށް ބަދަލުކުރަންޖެހޭ ކަމަށް ފައިސަލް ވިދާޅުވިއެވެ.
މީގެ އިތުރަށް ފައިސަލް ވިދާޅުވީ އެޗްއާރްސީއެމްގެ މެންބަރުން ރައްޔިތުންގެ ފައިސާއިން ނަގާ މުސާރަ ހަލާލުވާ ވަރަށް މަސައްކަތް ކުރަންޖެހޭ ކަމަށެވެ.
ރައީސް މައުމޫން ހާލުކޮޅު އިތުރަށް ގޯސްވުމާއި ގުޅިގެން އެމަނިކުފާނަށް ފަރުވާ ދިނުމަށް މާލެއިން މާފުށީ ޖަލަށް މިމަހު 21 ވަނަ ދުވަހު ޑޮކްޓަރަކު ވަނީ ގެންގޮސްފައެވެ.
ރައީސް މައުމޫންގެ އާއިލާއިން ބުނާ ގޮތުގައި، އެމަނިކުފާނަށް ވަނީ ވެއްޓިވަޑައިގަތުމުގެ އާލާސްކަންފުޅަކާ ކުރިމަތިވެފަ އެވެ. އެހެންވެ އެމަނިކުފާނު އެކަހެރިކޮށް ނުހުންނެވުމަށް ވެސް ޑޮކްޓަރުން މީގެކުރިން ލަފާ ދީފައެއެވެ.
ރައީސް މައުމޫން ހައްޔަރުކޮށް، ހުކުމެއް އިއްވާފައިވަނީ ފެބްރުއަރީ އެކެއްގައި ސުޕްރީމް ކޯޓުން ނެރުނު އަމުރާއި ގުޅިގެން ކުއްލި ނުރައްކަލުގެ ހާލަތު އިއުލާންކޮށް ހިންގި ތަހުގީގަކަށްފަހުއެވެ. އެ އަމުރާ ގުޅިގެން އެމަނިކުފާނަށް ޓެރަރިޒަމްގެ ދައުވާ ވެސް ދައުލަތުން އުފުލާފައެވެ. އެ ދައުވާގެ އަޑުއެހުންތައް ކޯޓްގައި ތާވަލްކުރި ނަމަވެސް ވަނީ ކެންސަލްކޮށްފަ އެވެ. އަދި ހާލުކޮޅު ހުރިގޮތުން ރައީސް މައުމޫނުގެ ޝަރީއަތްތައް ޣައިރު ހާޒިރުގައި ކުރިއަށް ގެންދިޔުމަށްވެސް އެމަނިކުފާނު ވަނީ އެދިވަޑައިގެންފައެވެ.
ސިއްހީ ހާލަތު ގޯސްވުމުގެ ސަބަބުން ރައީސް މައުމޫން ގެއަށް ބަދަލުކޮށް ދިނުމަށް އާއިލާއިން ކޯޓާއި ސަރުކާރުގައިވެސް އެދިފައިވެ އެވެ.
