ފަހު ވަގުތު ޔާމީނަށް ކުޅެވޭނެ ކުޅިއެއް ނޯންނާނެ: ތޯރިޤް
22 އޯގަސްޓު 2018 | ބުދަ 18:1580 އިންސައްތަ އަށް ވުރެ މަތިން މިލަދޫއިން އިބޫއަށް ވޯޓު ލިބޭނެ
މިލަދޫގައި ބޭއްވި ޖަލްސާގައި ތޯރިޤް ވާހަކަ ދައްކަވަނީ
ރައީސް އަބްދުﷲ ޔާމީން އަބްދުލްޤައްޔޫމް އެންމެ ފަހު ވަގުތު ކޮންމެވެސް 'ކުޅިއެއް' ކުޅުއްވައިގެން އިންތިޚާބު ކާމިޔާބު ކުރައްވާނެ ކަމަށް އެމަނިކުފާނުގެ އަރިހުގައި އުޅުއްވާ ބޭފުޅުން ވިދާޅުވިޔަސް، އެއްވެސް ކުޅިއެއް ނުކުޅެވޭނެ ކަމަށް މަނަދޫ ދާއިރާގެ ކުރީގެ މެމްބަރު މުހައްމަދު ތޯރިޤް ވިދާޅުވެއްޖެއެވެ.
ނ. މިލަދޫގައި ބުދަ ދުވަހުގެރޭ ބޭއްވި ގުޅިފައިވާ ޕާޓީތަކުގެ ޖަލްސާގައި ވާހަކަ ދައްކަވަމުން ތޯރިޤް ވިދާޅުވީ ރައީސް ޔާމީނަށް ވޯޓު އޮޅުވާނުލެވޭނެ ކަަމަށާއި، ރައީސް ޔާމީނަށް ކުޅެވޭނީ "އެހެން ކުޅިއެއް" ކަމަށެވެ. އަދި އެކުޅި ކުޅެގެން ރައީސް ޔާމީނަށް ގެއްލޭނީ ވޯޓު ކަމަށް ވެސް ތޯރިޤް ވިދާޅުވިއެވެ.
މިލަދޫގައި ބޭއްވި ޖަލްސާގައި ވާހަކަ ދައްކަވަމުން ތޯރިޤް ވިދާޅުވީ އެރަށުން އިދިކޮޅު ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އަށް 80 އިންސައްތަ އަށް ވުރެ މަތިން މިފަހަރުގެ އިންތިޚާބުގައި ވޯޓު ލިބޭނެ ކަމަށެވެ. އަދި މުޅި ނ. އަތޮޅަށް ރައީސް ޔާމީނަކީ ކޮން ބޭފުޅެއްކަން އެނގޭ ކަމަށް ވެސް ތޯރިޤް ވިދާޅުވިއެވެ.
އިދިކޮޅު ފަރާތްތަކަށް ތާޢީދުކުރާ ސަރުކާރު މުވައްޒަފުންނަށް ބިރު ދައްކައި، ވަޒީފާއިން ވަކިކުރާ މައްސަލައިގައި ތޯރިޤް ވިދާޅުވީ، ސިޔާސީ ހަރަކާތްތަކުގައި ބައިވެރިވެގެން ވަޒީފާއިން ކަނޑާލާ އެންމެންނަށް ގުޅިފައިވާ ޕާޓީތަކުގެ ވެރިކަމެއްގައި ވަޒީފާ އިޔާދަކޮށްދޭނެ ކަމަށެވެ. އަދި މިހާރު ވެސް ނ. އަތޮޅުގައި ތިބި ސަރުކާރުގެ މުވައްޒަފުން ރަސްމީގަޑީގައި ރަސްމީ މަސައްކަތް ނިންމުމަށް ފަހު އިދިކޮޅު ފަރާތްތަކުން ކުރިއަށް ގެންދާ ސިޔާސީ ހަރަކާތްތަކުގައި ބައިވެރިވުމަށް ތޯރިޤް ވަނީ ދައުވަތު ދެއްވާފައެވެ. އަދި މިލަދޫގެ ރައްޔިތުން އެއަތޮޅު އެހެން ރަށްރަށަށް ވެސް ގޮސް، އިދިކޮޅު ފަރާތްތަކުގެ ކެމްޕެއިން ފުޅާކުރުމަށް ތޯރިޤް ގޮވައިލެއްވިއެވެ.
