ގައުމީ ޔުނިވަސިޓީ އާއި ޕަބްލިކް ސާވިސް މީޑިއާ (ޕީއެސްއެމް) އިން އިންތިޒާމްކޮށްގެން ބާއްވާ ރިޔާސީ ބަހުސްގެ ދައުވަތު، އިދިކޮޅު ކޯލިޝަންގެ ކެންޑިޑޭޓް އިބުރާހިމް މުހައްމަދު ސޯލިހު ގަބޫލުފުޅު ކުރައްވައިފިއެވެ.
މި ބަހުސްގެ ދައުވަތު، އިންތިޚާބުގައި ދެން ވާދަކުރައްވާ، ރައީސް އަބްދުﷲ ޔާމީން ވެސް ވަނީ ގަބޫލުފުޅު ކުރައްވާފައެވެ.
އެމްއެންޔޫ އިން ބުދަ ދުވަހު ކޮށްފައިވާ ޓްވީޓެއްގައި ބުނެފައި ވަނީ އިންތިޚާބީ ދެ ކެނޑިޓޭޓުން ވެސް ދައުވަތު ގަބޫލުކުރައްވާފައި ވާތީ ޝުކުރު އަދާކުރައްވާ ކަމަށެވެ. އަދި ބަހުސްގެ ތަފްސީލް ދާދި އަވަހަށް ހާމަކުރާނެ ކަމަށް ވަނީ ބުނެފައެވެ. އަންނަ މަހުގެ ތެރޭގައި ބަހުސް ބާއްވަން ހަމަޖައްސާފައިވީ ނަމަވެސް ތާރީޚެއް އަދި އާއްމެއް ނުކުރެއެވެ. އެތަނުގެ ވިސްނުމަކީ، މި މަހުގެ ފަހުކޮޅު މެނިފެސްޓޯއާ ގުޅޭ ބަހުސް ބާއްވައި، އަންނަ މަހުގެ ތެރޭގައި ރިޔާސީ ކެންޑިޑޭޓުންގެ ބަހުސް ބޭއްވުން ކަމަށް ވެއެވެ.
ގައުމީ ޔުނިވަސިޓީން، ޕީއެސްއެމާ ގުޅިގެން ބަހުސް ބާއްވާތީ އިދިކޮޅުގެ ހިތްހަމަނުޖެހުންތައް އެބަހުއްޓެވެ. އަދި އިދިކޮޅު ޕާޓީތަކަށް ފުރުސަތު ނުދީ ހަމައެކަނި ރައީސް ޔާމީން ޕްރޮމޯޓްކުރާ ޕީއެސްއެމުން ބާއްވާ ބަހުސެއް ހަމަހަމަކާމާ އެކު ގެންދާނެ ކަމުގެ ޔަގީންކަން ނެތް ކަމަށް ޕާޓީތަކުން ބުނެއެވެ. އެހެން ނަމަވެސް ސުވާލުތަކާއި ބަހުސާ ގުޅޭ މުހިއްމު ކަންކަން ކުރިއަށް ގެންދާނީ ޔުނިވާސިޓީން ކަމަށް އެތަނުން ވަނީ ބުނެފައެވެ.
އެމްއެންޔޫ އާއި ޕީއެސްއެމުން އިންތިޒާމްކުރާ ބަހުސް އިބޫ އާއި ރައީސް ޔާމީން ވެސް ގަބޫލުކުރެއްވިއިރު، ރާއްޖެޓީވީން އިންތިޒާމްކުރާ ރިޔާސީ ބަހުސް ވަގުތު ދެވެން ނެތް ކަމަށް ވިދާޅުވެ، ދައުވަތު ގަބޫލުކުރެވެން ނެތް ކަމަށް ރައީސް އަބުދުﷲ ޔާމީން ވަނީ ބުދަ ދުވަހު ރާއްޖެޓީވީއަށް އަންގަވާފައެވެ.
