ވަގުތު ދެވެން ނެތްކަމަށް ބުނެ، ރާއްޖެޓީވީގެ ރިޔާސީ ބަހުސްގައި ބައިވެރިވެވެން ނެތްކަމަށް ރައީސް އަބްދުﷲ ޔާމީންގެ ފަރާތުން، ޕީޕީއެމުން ބުނެފި އެވެ.
ރިޔާސީ އިންތިހާބައި ގުޅުވައި، ރާއްޖެޓީވީން ބާއްވާ ބަހުސްގެ ދައުވަތު ވަނީ އިންތިހާބުގައި ވާދަކުރައްވާ ދެ ކެނޑިޑޭޓުންނަށްވެސް ފޮނުވާފަ އެވެ. އޭގެތެރެއިން އިދިކޮޅު ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ބަހުސްގެ ދައުވަތު ގަބޫލުކުރައްވާފައިވެއެވެ.
ބަހުސްގައި ބައިވެރިވުމުގެ ދައުވަތު ދެ ފަހަރެއްގެ މަތިން ރާއްޖެޓީވީން ރައީސް އަބްދުﷲ ޔާމީން ފޮނުވާފައިވާއިރު، ރާއްޖެޓީވީން ފޮނުވި ދައުވަތު ގަބޫލުނުކުރާކަން ހާމަކޮށް ޕީޕީއެމުން ރާއްޖެޓީވީއަށް ފޮނުވި ސިޓީގައި ބުނެފައިވަނީ ޤައުމީ ޔުނިވަރސިޓީން އިންތިޒާމްކުރާ ބަހުސްގެ ދައުވަތު ރައީސް ޔާމީން ގަބޫލުކުރައްވާފައިވާތީއާ އަދި ކެމްޕޭން ހަރަކާތްތައް ހުރިގޮތުން އިތުރު ބަހުސްއެއްގައި ބައިވެރިވެވެން ނެތްކަމަށެވެ. ރައީސް ޔާމީންގެ ރަނިންގމޭޓް ޑރ. މުހައްމަދު ޝަހީމް އަލީ ސައީދަށް ފޮނުވި ދައުވަތުވެސް ޕީޕީއެމުން ގަބޫލުކޮށްފައެއް ނުވެއެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވަނީ ދެ ކެނޑިޑޭޓެކެވެ. އެއީ ވެރިކަމުގައި ހުންނެވި ރައީސް އަބްދުﷲ ޔާމީނާއި، އިދިކޮޅު ކެންޑިޑޭޓް އިބްރާހިމް މުހައްމަދު ސޯލިހް (އިބޫ) އެވެ.
