ނަމާދު ކުރުން ހުއްޓާލާފައިވާ މިސްކިތަކަށް ފައިވާނާއެކު އެރުން އެއީ މައްސަލައެއް ނޫންކަމަށް ދީނީ އިލްމުވެރިޔާ ޝެއިޚް އަލީ ޒައިދު ވިދާޅުވެއްޖެއެވެ.
މިސްކިތެއްގެ މިންބަރަށް ބޫޓާ އެކު އެރުއްވި ކަމަށް ބުނެ، ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ޕީޕީއެމްގެ ފާޑުކިޔުން އަމާޒުވެފައިވަނިކޮށް ޒައިދު ވިދާޅުވީ ނަމާދު ކުރާއިރު ވެސް ފައިވާނާއެކު ނަމާދު ކުރުން އެއީ ހުއްދަ ކަމެއްކަމަށް ސައްހަ ހަދީސްތަކުން ސާބިތުވާކަމަށެވެ. އެހެން ނަމަވެސް ކާޕެޓް އަޅައި ފައިވާނުގައި ނުވަންނަ ތަނަކަށް ފައިވާނުގައި ވަދެގެން ނުވާނެކަމަށް އަލީ ޒައިދު ވިދާޅުވިއެވެ.
ލ. އަތޮޅަށް އިބޫ ކުރެއްވި ދަތުރުފުޅެއްގައި އެ އަތޮޅު ހިތަދޫގައި ބޭނުން ނުކޮށް ވީރާނާވާން ދޫކޮށްލާފައި ހުރި އާސާރީ މިސްކިތަކަށް ކުރެއްވި ޒިޔާރަތުގައި ނަގާފައިވާ ފޮޓޯއަކަށް ސަރުކާރުގެ ޕްރޮޕެގެންޑާ ފަތުރާ ޕީއެސްއެމުން ލިޔެފައިވާ ރިޕޯޓެއްގައި ބުނެފައި ވަނީ ބޫޓާ އެކު މިސްކިތެއްގެ މިންބަރަށް އަރާވަޑައިގެން، އިސްލާމް ދީނަށް އިބޫ މަލާމާތް ކުރައްވާފައިވާ ކަމަށެވެ. އިބޫގެ އެ އަމަލަކީ މިސްކިތުގެ ހުރުމަތް ކެނޑުން ކަމަށް ޕީއެސްއެމުން ވަނީ ބުނެފައެވެ.
