ޕެޕްސިކޯއިން 3.2 ބިލިއަން ޑޮލަރަށް ސޮޑާސްޓްރީމް ގަންނަނީ
22 އޯގަސްޓު 2018 | ބުދަ 01:16މިއީ އިންދްރާ ނޫޔީ ސީއީއޯގެ މަޤާމުން ވަކިވާނެކަން އިއުލާންކުރިފަހުން ޕެޕްސިކޯއިން ގަންނަ ފުރަތަމަ ކުންފުނި
ސޮޑާސްޓްރީމް ގަތުމުން ޕެޕްސިކޯގެ ދަށްވަމުންދާ ވިޔަފާރިތަަކުން ލިބޭ ގެއްލުން ފޫބެއްދޭނެ
އަމިއްލައަށް ފިޒީ ޑްރިންކްތައް ތައްޔާރިކޮށްލެވޭ މެޝިން އުފައްދާ ކުންފުނި ސޮޑާ ސްޓްރީމް ގަންނަން ޕެޕްސިކޯއިން ނިންމައިފިއެވެ.
ޕެޕްސިކޯއިން އިސްރާއީލަށް ނިސްބަތްވާ ސޮޑާސްޓްރީމް ގަންނަނީ 3.2 ބިލިއަން އެމެރިކާ ޑޮލަރަށެވެ. މި ނިންމުމާއިއެކު، ޕެޕްސިކޯގެ ހަކުރު އަޅާފައިވާ ތައްޔާރީ ބުއިންތަކަށް ތަރުހީބު ކުޑަވެގެން ދިޔުމުގެ ސަބަބުން ގެއްލެމުންދާ ބާޒާރުގެ ހިއްސާ އަލުން އަނބުރާ ހޯދުމަށް ފަސޭހަވާނެ ކަމަށް އެކުންފުނިން ދެކެއެވެ.
މިއީ ޕެޕްސިކޯގެ އެންމެ އިސްވެރިއެއްގެ ގޮތުގައި 12 އަހަރު ހޭދަކުރުމަށްފަހު އަންނަ އޮކްޓޯބަރު މަހު ޗީފް އެގްޒެކެޓިވްގެ މަޤާމުން އިސްތިއުފާ ދޭނެކަމަށް އިންދްރާ ނޫޔީ އިއުލާންކުރެއްވި ފަހުން ޕެޕްސިކޯއިން އިއުލާންކުރި ފުރަތަމަ ބޮޑު ވިޔަފާރިއެވެ. ޕެޕްސިކޯއިން ސޮޑާސްޓްރީމްގެ ހިއްސާތައް، ހިއްސާއެއް 144 ޑޮލަރުގެ މަގުން ގަންނަން ނިންމިއިރު، މިއީ މިދިޔަ ހުކުރު ދުވަހު ހިއްސާގެ ބާޒާރުތައް ބަންދުކުރިއިރު ސޮޑާސްޓްރީމްގެ ހިއްސާއެއްގެ އަގު ހުރި މިންވަރަށްވުރެ 11 އިންސައްތަ މަތި އަދަދެކެވެ.
ނޫޔީއަށްފަހު ޕެޕްސިކޯ ހިންގުމާއި ހަވާލުވާ ރަމޯން ލަގުއާރޓާ ބުނީ ސޮޑާ ސްޓްރީމް ގަތުމަކީ ޕެޕްސިކޯގެ ވިޔަފާރީގެ މިސްރާބު ހުރި ދިމާއަށް ދިޔުމަށް މުހިއްމު ނިންމުމަކަށް ވާނެކަމަށެވެ.
ސޮޑާސްޓްރީމް ގަތުމަށް ޕެޕްސިކޯއިން ބޯޑުން ހުއްދަ ދީފައިވާއިރު، ކުންފުނި ވިއްކާލުމަށް ސޮޑާސްޓްރީމްގެ ބޯޑުންވެސް ވަނީ ފެހި ސިންގަލް ދީފައެވެ. ކަމާއި ބެހޭ އިދާރާތަކުން މިިވިޔަފާރި ކުރިއަށް ގެންދަން ހުއްދަ ދިނުމުން ސޮޑާސްޓްރީމްގެ ހިއްސާދާރުންގެ ރުހުން އެކަމަށް އަދި ހޯދަން ޖެހެއެވެ. އެހެންކަމުން މި ޑީލް އެއްކޮށް ނިމޭނެކަމަށް ބެލެވެނީ އަންނަ އަހަރުގެ ޖެނުއަރީ ހިސާބުގައެވެ.
ސޮޑާސްޓްރީން އެންމެ ފުރަތަމަ ފެށިގެން އައީ 1903 ވަނަ އަހަރު އިނގިރޭސިވިލާތުގައެވެ. އެކި މެނޭޖްމަންޓްތަކުގެ ދަށުން ހިންގުމަށްފަހު 1985 ވަނަ އަހަރު ކެޑްބަރީ ޝްވެޕްސްއިން އެކުންފުނި ގަތެވެ. އެހެންނަމަވެސް 1998 ވަނަ އަހަރު އިސްރާއީލުގެ ސޮޑާ-ކްލަބް ކުންފުނިން ސޮޑާސްޓްރީމް ގަތެވެ.
