ފޯރލޫޕް ކޯޑިންގ އެކަޑަމީގެ ފަރާތުން ރާއްޖޭގައި ރޮބޮޓިކްސް ބޫޓް ކޭމްޕެއް ބާއްވައިފިއެވެ. މި ބޫޓް ކޭމްޕް ކުރިޔަށް ގެންގޮސްފައިވަނީ ތިން ދުވަހުގެ މުއްދަތަށް ދުވާލަކު ފަސް ގަޑި އިރަށެވެ. ޖުމްލަ 15 ގަޑި އިރުގެ މިކޭމްޕަކީ އުމުރުން ހަތް އަހަރާއި 14 އަހަރާ ދެމެދުގެ ކުދިންނަށް އަމާޒުކޮށްގެން ކުރިޔަށް ގެންދިޔަ ކޭމްޕެކެވެ.

ފޯރލޫޕް ކޯޑިން އެކަޑަމީގެ ޑީން އަބްދުﷲ މުސްތަފާ މީޑިޔާއަށް މަޢުލޫމާތު ދެމުން ބުނީ، ރޮބޮޓިކްސް ކޭމްޕްގެ މައިގަނޑު މަގުސަދަކީ ރާއްޖޭގައި ކިޔަވަމުންދާ ކުދިންގެ ހިތްތަކުގައި ކޮމްޕިއުޓަރ ސައިންސް، އިންޖިނިއަރިން، އަދި މެތަމެޓިކްސް ފަދަ މުހިންމު މާއްދާތަކަށް މިހާރަށްވުރެ ބޮޑަށް ސަމާލުކަން ދިނުމަށް ހިތްވަރު ދިނުން ކަމަށެވެ. އަދި މިކޭމްޕަކީ ރޮބޮޓިކްސް ކިޔަވަދިނުމަށް ރާއްޖެއިން ބޭރުގެ ތަޖުރިބާކާރު ބަޔަކާ ފޯރލޫޕް ކޯޑިން އެކަޑަމީ އާ ގުޅިގެން ކުރިޔަށް ގެންދިޔަ ކޭމްޕެކެވެ. ތިން ދުވަހުގެ މުއްދަތަށް ކުރިޔަށް ގެންދިޔަ މިކޭމްޕުން ކުދިން އަމިއްލަޔަށް ރޮބޮޓް އަދި ރޮބޮޓް ކޮންޓްރޯލްކުރުމަށް ބޭނުންކުރާ ރިމޯޓްވެސް ރާވާ ރޮބޮޓް މަސައްކަތް ކުރާ ގޮތް ކުދިންނަށް ދެނެގަނެވިފައިވާނެ ކަމަށް މައުލޫމާތު ދެމުން މުސްތަފާ ވަނީ ބުނެފައެވެ.

އެޑިއުކޭޝަންގައި ރަޖިސްޓަރ ކޮށްގެން ކިޔަވަދެމުން ގެންދާ ފޯރލޫޕް ކޯޑިންގ އެކަޑަމީ އަކީ މިހާތަނަށް ކުޑަކުދިންނަށް ފަހުގެ ޓެކްނޮލަޖީ ކިޔަވަދިނުމަށް ރާއްޖޭގައި އެންމެ ފުރަތަމަ ހުޅުވުނު ސެންޓަރެވެ. މިވަގުތު ފޯރލޫޕް ކޯޑިންގ އެކަޑަމީގައި ކޮމްޕިއުޓަރ ސައިންސާއި އިލެކްޓްރޯނިކް އިންޖިނިއަރިން ކިޔަވަދެމުންދަނީ އެމެރިކާގައި ކުޑަކުދިންނަށް ކިޔަވަދިނުމަށް ތައްޔާރުކޮށްފައިވާ ސިލަބަހަކަށެވެ.

ފޯރލޫޕަކީ ކުޑަކުދިންނަށް ސްޓެމް އަދި ކޮމްޕިއުޓަރ ސައިންސް އެޑިއުކޭޝަން ކިޔަވަދިނުމަށް ރާއްޖޭގައި ފުރަތަމަ ގާއިމު ކުރެވުނު މަރުކަޒެވެ.

ރާއްޖޭގައި ފުރަތަމަ ފަހަރަށް އިންޓަނޭޝަނަލް ރޮބޮޓިކްސް ޕްރިމިއަ ލީގެއް މިއަހަރު ބެއްވުމަށް ފޯރލޫޕުން ވަނީ ނިންމާފައެވެ.