ރައީސް އަބުދުﷲ ޔާމީން ހދ.ކުޅުދުއްފުއްޓަށް ވަޑައިގަތުމަށް ހަމަޖެހިފައިވާތީ އެމަނިކުފާނަށް މަރުހަބާ ދެންނެވުމަށް ބަނދަރު ސަރަހައްދުގައި ގަވާއިދާ ހިލާފަށް ދިދަ ދަނޑި ޖަހަމުންދާތީ ކައުންސިލުން ކަންބޮޑުވުންފާޅުކޮށްފިއެވެ.
ރާއްޖެއެމްވީއަށް މައުލޫމާތުދެއްވަމުން ކުޅުދުއްފުށީގެ ކައުންސިލްގެ ރައީސް އަބްދުއްލަތީފް ހަސަން ވިދާޅުވީ މިމަހުގެ 22 ވަނަ ދުވަހު ރައީސް ޔާމިން އެރަށަށް ވަޑައިގަތުމަށް ހަމަޖެހިފައިވާތީ ފީޕީއެމްގެ ސަޕޯޓަރުން ކައުންސިލްގެ ގަވާއިދާ ހިލާފަށް އަމަލުކުރަމުންދާ ކަމަށާއި، މިއީ ކަންބޮޑުވާ މައްސަލައެއް ކަމަށެވެ.
އަބްދުއްލަތީފް ވިދާޅުވީ ބަނދަރު ސަރަހައްދުގައި ދިދަ ދަނޑި ޖަހަމުންދަނީ ޕޭވްމަންޓްގެ ގައުތައް ނަގައި ކަނޑައިގެން ކަމަށާއި، ޕޭމަންޓްގެ ގައުނެގުމަކީ ކައުންސިލުން ފާސްކޮށްފައިވާ ގަވާއިދަކުން މަނާކޮށްފައިވާ ކަމެއް ކަމަށެވެ. މި ދިދަ ހޮޅިދަނޑިތަކުގައި ގައުމީ ކުލަތަކުގެ ފޮތި ހަރުކޮށްފައި ހުރިއިރު މަގުމައްޗަށް އަލިކުރަން ހަރުކޮށްފައި ހުރި ހޮޅިދަނޑިތަކުގައި ވެސް ފޮތި ދަމާފައިވާ ކަމަށާއި، އެއީ ވެސް މަނާ ކަމެއް ކަމަށް އޭނަ ވިދާޅުވިއެވެ.
އަބްދުއްލަތީފު ވިދާޅުވީ ޒަމާނީ ފެންވަރަށް މަގުތައް ތަރައްގީ ކުރަން ފެށުމާއެކު ކުރީގެ ކައުންސިލުން އަމަލުކުރާނެ ގަވާއިދެއް ހަދާފައިވާ ކަމަށާއި، އެގަވާއިދަކީ ކަމާބެހޭ މުއައްސަސާތަކާއެކު މަޝްވަރާ ކުރުމަށްފަހު ފާސްކޮށްފައިވާ އެއްޗެއް ކަމަށެވެ. އަދި މިހުރިހާ ދުވަހު އައީ މިގަވާއިދުގެ ދަށުން އަމަލުކުރަމުން ކަމަށް އޭނަ ވިދާޅުވިއެވެ.
"އާންމު ފަރާތަކުން ދޭން ބުންޏަސް އެގޮތަށް ގާތަށް ކޮނެ ނަގާކަށް ހުއްދައެއް ނުދެން. ކައިވެނި ޕާޓީތަކާއި އެނޫން ވެސް ހަފްލާތައް ބާއްވަންވެގެން ހުއްދައަށް އެދޭނެ. ރަށުގެ މަގުތައް ރީތިކޮށް ބޭއްވުމަށް ކައުންސިލުން ނިންމާފަ އޮތް ވަރަށް މުހިންމު ނިންމުމެއް މިއީ" އަބްދުއްލަތީފު ވިދާޅުވިއެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު ކުޅުދުއްފުއްޓަށް ވަޑައިގެން ދުވަހު ކަންތައްތައް ހިނގައިދިޔަ ގޮތްތަކަށް އަލިއަޅުއްވައި ލައްވަމުން އަބްދުލްލަތީފު ވިދާޅުވީ އެދުވަހު އިދިކޮޅު ފަރާތްތަކުން ގަވާއިދާ ހިލާފު އެއްވެސް އަމަލެއް ހިންގާފައި ނުވާ ކަމަށެވެ. އަދި ޖަލްސާ ވެސް ބޭއްވީ އެކަމަށް ކައުންސިލުން ދިން ސަރަހައްދުގައި ކަމަށް އޭނަ ވިދާޅުވިއެވެ.
ނަމަވެސް މިއާ ހިލާފަށް ރައީސް ޔާމިނަށް ތާއިދުކުރައްވާ ފަރާތްތަކުން ގަވާއިދާއި ހިލާފަށް އަމަލުކުރަމުންދާތީ އާންމު ރައްޔިތުންގެ ޝަކުވާބޮޑުކަން ފާހަގަކުރައްވައި އަބްދުއްލަތީފު ވިދާޅުވީ ފުލުހުންނަށް މައްސަލަ ހުށަހެޅި ނަމަވެސް ހައްލު ނުލިބޭ ކަމަށެވެ. ހައުސިން މިނިސްޓްރީގެ ބެލުމުގެ ދަށުން ކުރިއަށް ގެންދާ މަސައްކަތެއް ކަމަށް ބުނެ އެކަން ނުހުއްޓުވޭނެކަމަށް ފުލުހުން ބުނެފައިވާކަމަށް އަބުދުލްލަތީފް ވިދާޅުވިއެވެ.
"ފުލުހުންނަކީ ޔުނީފޯމެއްލާފައި ގާނޫނާއި ގަވާއިދު ތަންފީޒު ކުރަން ތިބޭ ބައެއް. އެކަމަކު އެމީހުންނަށް ވެސް މިކަން ނުވި.ރައްޔިތުންނަށް މިދެނީ ވަރަށް ނުބައި މެސެޖެއް ނުންތޯ. ގަވާއިދު މިހިނގަނީ ނިކަމަތި މީހާއަށް. ބާރު ހުރި މީހުންނަށް އެއްވެސް އެއްޗެއް ދެން ނެތް. އެއުސޫލު ތެދެއްތޯ މިއީ" އަބްދުލްލަތީފު ވިދާޅުވިއެވެ.
އަބްދުލްލަތީފު ވިދާޅުވީ ބަނދަރުގެ ޕޭވްމަންޓަށް ވެހިކަލެއް އަރުވައިފިނަމަ އެ ރައްޔިތުން ފުލުހުން ޖޫރިމަނާކުރާއިރު މިފަދަ ކަންކަން ކައުންސިލުން އެދުމުންވެސް ފުލުހުން ނުހުއްޓުވުމުން ހިތާމަކުރާކަމަށެވެ. މިކަން ހުއްޓުވުމަށް ފުލުހުން ނުކުޅެދުމުން ގިނަ ރައްޔިތުންތަކެއްގެ ފާޑުކިޔުން ފުލުހުންނަން އަމާޒުވެފައިވާ ކަމަށް ވެސް އޭނަ ވިދާޅުވިއެވެ.
މީގެއިތުރުން އަބްދުލްލަތީފު ވިދާޅުވީ ރައީސް ޔާމިން އެރަށަށް ވަޑައިގަތުމަށް ހަމަޖެހިފައިވާތީ މަރުހަބާ ދެންނެވުމުގެ ކަންކަމަށް ކައުންސިލުން ވެސް ފުރިހަމަ އެއްބާރުލުންދޭ ކަމަށާއި، ކައުންސިލްގެ ވަސީލަތްތައް މިހަރަކާތްތަކަށް ދޫކުރަމުންދާ ކަމަށެވެ. ނަމަވެސް ގަވާއިދާ ހިލާފަށް ކުރާ ކަންކަމަށް އެއްބާރުލުން ނުދެވޭނެ ކަމަށް އޭނަ ވިދާޅުވިއެވެ.
