ގުޅިފައިވާ ޕާޓީތަކުން ގއ ވިލިނގިލީގައި ގިނަ އަދަދެއްގެ ވެހިކަލްތަކާއެކު ބޮޑު ވެހިކަލް ބުރެއް ބާއްވައިފިއެވެ.
ގއ ވިލިނގިލީގައި ވެހިކަލް ބުރު ބާއްވާފައިވަނީ އާދީއްތަ ދުވަހު ހަވީރުއެވެ. މިވެހިކަލް ބުރުގައި ވަރަށް ގިނަ އަދަދެއްގެ ސައިކަލާއި ކާރު އަދި ޕިކަޕް ބައިވެރިވެފައިވާއިރު ބޮޑެތި މަގުތަކާއި ބަނދަރު ސަރަހައްދުގައި ވެހިކަލްތައް ވަނީ ބުރު ޖަހާފައެވެ.
ގުޅިފައިވާ ޕާޓީތަކުގެ ދިދަތަކާއެކު ކުރިއަށް ގެންދިޔަ މި ވެހިކަލް ބުރުގައި ގުޅިފައިވާ ޕާޓީތަކުގެ ގިނަ އަދަދެއްގެ ބަޔަކު ބައިވެރިވެފައިވާއިރު، ވެރިކަން ކުރާ ޕީޕީއެމްއެގެ ގިނަ ބަޔަކުވެސް މިވެހިކަލް ބުރުގައި ބައިވެރިވެފައިވެއެވެ.
ގއ އަތޮޅު ކައުންސިލްގެ ރައީސް އަހުމަދު ފުއާދު ރާއްޖެ.އެމްވީއަށް ވިދާޅުވީ މިއީ ވަރަށް ކާމިޔާބު ވެހިކަލް ބުރެއްކަމަށާއި ޚާއްޞަކޮށް ގިނަ އަދަދެއްގެ ޕީޕީއެމް މެންބަރުން މިވެހިކަލް ބުރުގައި ބައިވެރިވެފައިވާ ކަމަށެވެ.
ފުއާދު ވިދާޅުވީ ގުޅިފައިވާ ޕާޓީތަކުގެ ހަރަކާތްތަކުގައި މީގެ ކުރިން ބައިވެރިވެފައި ނުވާ އެތައް ބަޔަކު ބައިވެރިވެފައިވާކަމަށާއި ސަރުކާރުގެ ވަޒީފާ ތަކުގައިތިބި ޕީޕީއެމްގެ އެތައް ބަޔަކު މި ވެހިކަލް ބުރުގައި ބައިވެރިވެފައިވާކަމަށެވެ.
