ޢަދާލަތު ޕާޓީއިން ކަންކަން ނިންމަނީ އެޕާޓީގެ މަޝްވަރާ މަޖިލީހުގައި މަޝްވަރާކުރުމަށް ފަހު، އެ މަޖިލީހުގެ އަޣުލަބިއްޔަތުން ކަމަށް އެޕާޓީއިން ބުނެފިއެވެ.
ޢަދާލަތު ޕާޓީއިން ކަންކަން ނިންމަނީ އެޕާޓީގެ ލީޑަރޝިޕްގައި ތިބި ދެތިން ބޭފުޅަކު ބޭނުންފުޅުވާ ގޮތަށް ކަމަށް ޢަދާލަތު ޕާޓީގެ ޢާއްމު މެމްބަރުން ނަމުގައި ބަޔަކު ވާހަކަ ދައްކާފައިވަނިކޮށް އެޕާޓީގެ މީޑިއާ ކޮމިޓީގެ މުޤައްރިރު ޢަލީ ނަޒީރު ވިދާޅުވީ، ޢަބްދުﷲ ޔާމީންގެ ވެރިކަން މަގުއޮޅިގެން ދިޔަ ފަހުން ޢަދާލަތު ޕާޓީއިން ނިންމާފައިވާ ކޮންމެ ނިންމުމަކީވެސް ޕާޓީގެ މަޝްވަރާ މަޖިލީހުގައި ފުޅާ ދާއިރާއެއްގައި މަޝްވަރާ ކުރެވިގެން، ތަނަވަސް އަޣުލަބިއްޔަތަކުން ނިންމާފައިވާ ކަންކަން ކަމަށެވެ.
އަލީ ނަޒީރު ކުރެއްވި ޓުވީޓްތަކެއްގައި ވިދާޅުވީ ޢަދާލަތު ޕާޓީއިން ނިންމާ ކަންކަމާއި ގުޅޭ މައުލޫމާތު ވަގުތުން އެއްވެސް ހިފެހެއްޓުމެއް ނެތި މީޑިއާތަކަށް ހާމަކޮށްފައިވާނެ ކަމަށެވެ.
މީގެ އިތުރުން ޢަދާލަތު ޕާޓީގެ އާއްމު މެމްބަރުން ކަމަށް ބުނެ، ޕާޓީގެ ނަން ބޭނުން ކޮށްގެން ބަޔަކު އެޕާޓީ ބަދުނާމުކޮށް ވާހަކަ ދެއްކުމާއި ގުޅިގެން އަލީ ނަޒީރު ވިދާޅުވީ ކޮން ބައެއްކަން ނޭނގޭ ބަޔަކު އާއްމުންނަށް އެނގެން ހުރި މައުލޫމާތު އޮޅުވާލައި، މީޑިއާގައި ދޮގު ޚަބަރު ފަތުރަނީ ރިޔާސީ އިންތިޚާބާއި ދިމާކޮށް ސިޔާސީ ފަރާތްތަކުގެ ސަމާލުކަން ހޯދަން ކަމަށެވެ.
އަދި ޢަދާލަތު ޕާޓީއަށް ގިނަ އަދަދަކަށް ފައިސާ ލިބޭ ކަމަށާއި، ލިބޭ ފައިސާއަށް ވާނުވާ ނޭނގޭ ކަމަށް ގޮތް ނޭނގޭ ބަޔަކު ދެއްކި ވާހަކަތަކަށް ވެސް އަލީ ނަޒީރު ވަނީ ރައްދު ދެއްވާފައެވެ. އޭނާ ވިދާޅުވީ ޢަދާލަތު ޕާޓީއަށް ލިބޭ ފައިސާއާއި، ލިބޭ ފައިސާ ޚަރަދު ކުރެވޭ ގޮތް، ބައިނަލްއަޤްވާމީ އޮޑިޓް ފާރމްއަކުން އޮޑިޓްކުރުމަށް ފަހު، ކޮންމެ އަހަރަކު ވެސް އިލެކްޝަންސް ކޮމިޝަންގައި ފައިލް ކުރާކަމަށެވެ. އަދި އެޕާޓީގެ ރައީސް ޝައިޚް އިމްރާން އަބްދުﷲ އާއި ނައިބު ރައީސް އަލީ ޒާހިރުގެ ލީޑަރޝިޕްގައި ޕާޓީގެ ހިސާބުތައް ބަލަހަައްޓާފައިވާނީ ޤާނޫނުތަކާއި ބައިނަލްއަޤްވާމީ ބެސްޓް ޕްރެކްޓިސްއާއި އެއްގޮތަށްކަމަށް ވެސް އޭނާ ވިދާޅުވިއެވެ. ހަމައެހެންމެ، ޢަދާލަތު ޕާޓީގެ ލީޑަރޝިޕަށް ނޭނގި ވަކި ފަރުދަކު ޕާޓީގެ ނަމުގައި މާލީ މަންފާއެއް ހޯއްދަވާފައިވާނަމަ އެކަން އެންމެ ރަނގަޅަށް އެނގިވަޑައިގަންނަވާނީ ޕާޓީގެ އިސް ތަރުޖަމާނުގެ މަޤާމާއި، ޚާރިޖީ ގުޅުންތަކާއި ބެހޭ ކޮމިޓީގެ މުޤައްރިރުގެ މަޤާމާއި، އަދި އެމަޤާމުތަކުގެ ހައިސިއްޔަތާއިއެކި ވަޒީރެއްގެ ގޮތުގައި ހުންނަވައިގެން އެތެރެއާއި ބޭރުގެ ވިޔަފާރިވެރިންނާއި މުއާމަލާތް ކުރެއްވި އެޕާޓީގެ ކުރީގެ މެމްބަރު ޑރ. މުހައްމަދު ޝަހީމް އަލީ ސަޢީދަށް ކަމަށް އަލީ ނަޒީރު ވިދާޅުވިއެވެ.
އަލީ ނަޒީރު މިހެން ވިދާޅުވިއިރު، ޑރ. ޝަހީމް ޢަދާލަތު ޕާޓީގެ ސްލޮޓެއްގައި މިސަރުކާރުގެ އިސްލާމިކް މިނިސްޓަރު ކަމުގައި ހުންނަވަނިކޮށް އެމަނިކުފާނުގެ އަނބިކަނބަލުން ބޭރުގެ ވިޔަފާރިވެރިޔަކާއިއެކު ވިޔަފާރިއެއް ރަޖިސްޓްރީކުރި މައްސަލަ ބަލައި، ދައުވާ ކުރުމަށް ޕީޖީ އޮފީހަށްވެސް ފޮނުވިއެވެ. އެހެން ނަމަވެސް އެމައްސަލައިގައި އެމަނިކުފާނުގެ އަނބިކަނބަލުންގެ މައްޗަށް ދައުވާކޮށްފައެއް ނުވެއެވެ. ބޭރުގެ އެ ވިޔަފާރިވެރިޔަކީ ޒަކާތު ފަންޑަށް އެހީވާނެ ކަމަށް އިއުލާންކުރި، ރަނުގެ ވިޔަފާރިކުރާ ވިޔަފާރިވެރިއެކެވެ.
ޑރ. ޝަހީމް މިހާރު ހުންނެވީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ޓިކެޓްގައި ރިޔާސީ އިންތިޚާބަށް ކުރިމަތިލައްވާ ކެންޑިޑޭޓް ރައީސް އަބްދުﷲ ޔާމީން އަބްދުލްޤައްޔޫމްގެ ރަނިންގމޭޓްގެ ގޮތުގައެވެ. އަލީ ނަޒީރު ވިދާޅުވީ ފައިސާއާއި ބެހޭ ގޮތުން އެޕާޓީއަށް އެފަދަ ތުުހުމަތެއް ކުރެއްވުމުން އެސުވާލު ކުރައްވަން ޖެހޭނީ ޑރ. ޝަހީމްއާއިކަމަށެވެ.
