އިދިކޮޅު ފަރާތްތަކާ ޕީޕީއެމް މެންބަރުން ގުޅުނީ ފައިސާގެ ދަޅައަށް:ޕީޕީއެމް ފަލާހް
ފަލާހް މިހެން ވިދާޅުވީ އެޕާޓީގެ ޕީޖީ ގުރޫޕްގެ ބައްދަލުވުމަށްފަހު
އިނގުރައިދޫ ދާއިރާގެ މެންބަރ ފަލާހް
ގުޅިފައިވާ އިދިކޮޅު ޕާޓީތަކާ ގުޅުނު ވެރިކަން ކުރާ މައި ޕާޓީ ޕީޕީއެމްގެ ރައްޔިތުންގެ މަޖިލީހުގެ މެންބަރުން އެޕާޓީ ދޫކޮށް އިދިކޮޅު ފަރާތްތަކާ ގުޅިފައިވަނީ ފައިސާގެ ދަޅައަށް ކަމަށް ޕީޕީއެމް ޕީޖީ ގުރޫޕްގެ ނައިބު ލީޑަރ އިނގުރައިދޫ ދާއިރާގެ މެންބަރ އިބްރާހީމް ފަލާހް ވިދާޅުވެއްޖެއެވެ.
ފަލާހް މިހެން ވިދާޅުވީ ހޯމަ ދުވަހުގެރޭ ޕީޕީއެމް އޮފީހުގައި ބޭއްވި އެޕާޓީގެ ޕީޖީ ގުރޫޕްއާއި ރައީސް ޔާމިންއާ ބައްދަލު ކުރެއްވުމަށްފަހު އެއޮފީހުގެ ބޭރުގައި ނޫސްވެރިންނަށް މައުލޫމާތު ދެއްވަމުންނެވެ.
ފަލާހް ވިދާޅުވީ ރައްޔިތުންގެ މަޖިލީހުގެ ރައީސް ޢަބްދުﷲ މަސީހުގެ އިތުބާރު ނެތްކަމުގެ މައްސަލައިގާ އިދިކޮޅު ފަރާތްތަކުން ފައިސާގެ ދަޅަ ދެއްކުމުން ޕީޕީއެމްގެ ބައެއް މެންބަރުން ވަނީ އިދިކޮޅު ފަރާތްތަކާ ގުޅިފައިވާ ކަމަށެވެ.
ފަލާހް ވަނީ ޕީޕީއެމް ޕީޖީ ގުރޫޕްގެ ބައްދަލުވުމުގައި ބައިވެރިވެވަޑައިގެންނެވި ހުރިހާ މެންބަރުންވެސް ވަނީ ރައީސް ޔާމީނާއެކު ސާބިތުވެ ތިބެ އެމަނިކުފާނުގެ ފަހަތްޕުޅުގައި ތިއްބަވައިގެން ވެރިކަން ސަލާމަތް ކުރެއްވުމަށް އިއްތިފާގްވެފައި ކަމަށެވެ. އަދި 2018 ގައި އޮންނަ ރިޔާސީ އިންތިޚާބުގައި އެމަނިކުފާނަށް އިންތިޚާބު ކާމިޔާބު ކޮށްދިނުމަށްޓަކައި ހުރިހާ މެންބަރުންވެސް އަތުކުރި އޮޅާލައިގެން ތިއްބެވުމަށްވެސް އިއްތިފާގް ވެފައިވާ ކަމަށެވެ.
ފަލާހް މިހެން ވިދާޅުވެފައިވާއިރު މިހާތަނަށް އެންމެ ގިނަ އަދަދެއްގެ ރައްޔިތުންގެ މަޖިލީހުގެ މެންބަރުން އެއްފަހަރާ އެމެންބަރުންގެ ސިޔާސީ ޕާޓީން ވަކިވަޑައިގެންފައިވަނީ ހޯމަ ދުވަހު ޕީޕީއެމުންނެވެ. އެގޮތުން ހޯމަދުވަހު އެކަނިވެސް ޕީޕީއެމުން ވަނީ 7 މެންބަރުން ވަކިވެވަޑައިގެންފައެވެ.
