އަޅުގަނޑުމެންގެ ސަރުކާރެއްގައި ތެލުން ނަގާ ޑިއުޓީ ކަނޑާލާނަން: އިބޫ

ކޯލިޝަން ސަރުކާރެއްގައި ޕެޓްރޯލާއި ޑީސަލުން މިހާރު ނަގަމުން އަންނަ ޑިއުޓީ ކަނޑާލާނެ ކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ބުރާސްފަތި ދުވަހު ކ. ގުރައީދޫއަށް ވަޑައިގެން އެރަށުގައި ހުރި ކޯލިޝަންގެ ޖަގަހަ ހުޅުވާދެއްވުމަށް ފަހު ވާހަކަފުޅު ދައްކަވަމުން އިބޫ ވިދާޅުވީ ރަށްރަށުގެ ވިޔަފާރީގެ ތަކުންނާއި ގެސްޓް ހައުސްތަކުގެ ކަރަންޓް ފީ ބޮޑުވުމުގެ ސަބަބުން އެ ވިޔަފާރީތަކަށް ދަތިތަކެއް އެބަހުރި ކަމަށެވެ. އެހެން ނަމަވެސް އެމަނިކުފާނުގެ ސަރުކާރެއްގައި ރަށްރަށުގައި ހިންގަމުންދާ ވިޔަފާރިގެތަކާއި ގެސްޓް ހައުސްތަކުން ނަގާ ކަރަންޓް ފީ ކުޑަ ކޮށްދެއްވާނެ ކަމަށް ވައުދު ވެވަޑައިގެންނެވި އެވެ.

ކަރަންޓް އަގު ހެޔޮ ކުރެވިދާނެ ގޮތްތަކެއް އެބަ ހުރިކަމަށް ފާހަގަ ކުރައްވައި އިބޫ ވިދާޅުވީ އެއްގޮތަކީ ސޯލާއިން ކަރަންޓް އުފެއްދުން ކަމަށެވެ. އަދި އަނެއް ގޮތަކީ ތެލުން ނަގާ ޑިއުޓީ ކަނޑާލުން ކަމަށް ފާހަގަ ކުރެއްވި އެވެ. މި ސަރުކާރުން ވަނީ އިތުރު ބާވާތްތަކުން ޑިއުޓީ ނަގަން ފަށާފައިކަން ފާހަގަ ކުރައްވައި އެމަނިކުފާނު ވިދާޅުވީ ދުނިޔޭގެ ތެލުގެ އަގަށް އަންނަ ބަދަލުތައް ސަރުކާރުން ހާމަ ކުރަމުން ނުދާ ކަމަށެވެ.

ތެލުން ނަގާ ޑިއުޓީ ކަނޑާލުމުން ޕެޓްރޯލާއި ޑީސަލް ބޭނުން ކޮށްގެން ވިޔަފާރީގެ މުއަމާލަތް ކުރާ ފަރާތްތަކަށް އޭގެ ހެޔޮ ބަދަލު އަންނާނެ ކަމަށްވެސް އިބޫ ވިދާޅުވި އެވެ.

ގުރައިދޫގައި ވެސް އޮތް އެންމެ ބޮޑު މައްސަލައަކީ ގޯތިގެދޮރު ބޭނުންވެފައިވާ މީހުނަށް ގޯތިނުލިބުމުގެ މައްސަލަ ކަމަށް ފާހަގަ ކުރައްވާ އިބޫ ވިދާޅުވީ ބޯހިޔާވަހިކަމުގެ މަޝްރޫއުގައި ރަށުގެ ރައްޔިތުންނަށް ދިމާވެފައިވާ އެ މައްސަލައަށް ހައްލު ހޯދާ ދެއްވާނެ ކަމަށެވެ. އަދި ގުރައިދޫގެ ބަނދަރު ބޭނުން ކުރުމަށް ހުރި ދަތިތައް ކައުންސިލްގެ މަޝްވަރާއާއެކު ހައްލު ހޯދާ ދެއްވާނެކަމަށް ވެސް އިބޫ ވިދާޅުވި އެވެ.

އިތުރަށް ވާހަކަދައްކަވަމުން އިބޫ ވިދާޅުވީ އިންސާފު ނެތީ ހަމަ އެކަނި އަދުލު އިންސާފުގެ ދާއިރާގައި ނޫން ކަމަށާއި ވަޒީފާތަކުން މީހުން ވަކި ކުރުމުގައި ވެސް އެއްވެސް އިންސާފެއް ނެތް ކަމަށެވެ. އަދި ވިދާޅުވީ ސިޔާސީ ފިކުރު ތަފާތުވުމަކީ މައްސަލައެއް ނޫން ކަމަށާއި ވަޒީފާގެ ކުރިއެރުން ދިނުމުގައި އެ މީހެއްގެ ފިކުރަށް ނުބައްލަވާނެ ކަމަށެވެ.

"އަޅުގަނޑުމެންނާއެކު ކުރިއަށް ވަޑައިގަންނަވާ. އަޅުގަނޑުމެންގެ ފަރާތުން މިރަށުގެ އެއްވެސް ރައްޔިތަކަށް ދެރަ ގޮތެއް ނުވާނެ،" އިބޫ ވިދާޅުވި އެވެ.