ސަރުކާރުން އުޅެނީ މީޑިއާ ކޮންޓްރޯލްކޮށް 80ގެ އަހަރުތަކާ ހަމައަށް ގެންދަން: މޫސަ
16 އޯގަސްޓު 2018 | ބުރާސްފަތި 14:45ފިޔަވަޅު އަޅާނީ ކޮން އިރަކު ކަމެއް ނޭނގޭ، ތިބެން ޖެހެނީ ބިރުވެރިކަމެއްގައި
ރާއްޖެ ޓީވީގެ އަބުރުފުޅު ފަންޑަށް މިހާރު ނޫހުގެ ފަރާތުން މޫސާ ލަތީފު އެހީދެއްވަނީ
ސަރުކާރުން މަސައްކަތް ކުރަނީ މީޑިއާ ކޮންޓްރޯލްކޮށް 80 ގެ އަހަރުތަކާ އެއް ހަމައަކަށް ގެންދަން ކަމަށް މިހާރު ނޫހުގެ އެޑިޓަރ މޫސާ ލަތީފް ވިދާޅުވެއްޖެއެވެ.
ބްރޯޑްކާސްޓިން ކޮމިޝަނުން ރާއްޖެޓީވީ ދެ މިލިއަން ރުފިޔާއިން ޖޫރިމަނާކުރުމާ ގުޅިގެން ހުޅުވާފައިވާ އަބުރުފުޅު ފަންޑަށް މިހާރު ނޫހުގެ ފަރާތުން ފައިސާގެ އެހީވުމަށް ފަހު މޫސާ ލަތީފް ވިދާޅުވީ ބްރޯޑްކޮމްއިން ކަންކުރަމުންދާ ގޮތުން ވަރަށް ބޮޑަށް ކަންބޮޑުވާ ކަމަށެވެ.
ސަރުކާރުން އަބުރުގެ ޤާނޫނު ގެނައުމާ ގުޅިގެން އޭރުވެސް ހާމަކުރަމުންދިޔަ ކަންބޮޑުވުންތަކަށް އިޝާރާތް ކުރައްވާ މޫސަ ވިދާޅުވީ އަބުރުގެ ޤާނޫނު ދިފާއު ކުރުމަށްޓަކައި މިނިވަންކަމާއެކު ވާހަކަ ދެކެވޭނެކަމާއި ފިޔަވަޅެއް ނާޅާނެ ކަމަށް ޕީޕީއެމްގެ ބޭފުޅުން ވިދާޅުވި ނަމަވެސް ފެންނަމުން މިދަނީ އެ ޤާނޫނު ފާސްކުރަން އުޅުނު އިރު ނޫސްވެރިން ދެއްކި ކަންކަން ވަމުންދާ ތަން ކަމަށެވެ.
މޫސަ ވިދާޅުވީ އޭރުވެސް ދައްކަމުންދިޔައީ ފިޔަވަޅު އަޅާނީ ކޮން އެއްޗެއް ލިޔެގެންކަމާއި ކޮން އިންޓަރވިއުއެއް ނަގައިގެން ކަން ނޭނގޭނެ ކަމަށާއި އަބަދުވެސް ނޫސްވެރިން ބިރުވެރިކަމެއްގެ ތެރޭގައި ތިބެން ޖެހޭނެ ކަމަށެވެ.
"އެހެންވީމާ މީގެން މިއެނގޭ އެއްޗަކީ ގަސްދުގައި ނޫސްވެރިކަމުގެ މިނިވަންކަން ، ރާއްޖޭގައި މީގެ 80 ގެ ނުވަތަ 90 ގެ ކުރީކޮޅު އޮތް ފެންވަރަށް ގެންދަން، ސަރުކާރުން މުޅިން ކޮންޓްރޯލް ކުރާ ފެންވަރަކަށް ގެންދަން ވެގެން ކުރާ ކަމެއްގެ ގޮތުގައި،"ހަވީރު ނޫހުގެ އެޑިޓަރުކަންވެސް ކުރެއްވި މޫސަ ވިދާޅުވިއެވެ.
މޫސަ ވިދާޅުވީ ކުރިއަށް އޮތްތަނުގައިވެސް ކަންވާނެ ގޮތެއް ނޭނގޭ ކަމަށާއި ފިޔަވަޅު އަޅާނީ ކޮންބަޔަކާމެދު ކޮން އިރަކުންކަން އެއްވެސް ވަރަކަށް ނޭނގޭ ކަމަށެވެ. ނޫސްވެރިން ތިބެން ޖެހެނީ ބިރުވެރިކަމެއްގެ ތެރޭގައި ކަމަށާއި އެކަން ރައްޔިތުންނަށްވެސް އެނގެން ޖެހޭ ކަމަށެވެ.
"ކުރިއަށް އޮތްނަގައިވެސް އަޅުގަނޑުމެންނަކަށް ނޭނގޭ މިއަދު ކަމެއް މާދަމާ ކަމެއް ނޫސްވެރިއަކު ލިޔާ އެއްޗަކުން ނޫސްވެރިއަކަށް މިހާ ބޮޑު ޖޫރިމަނާއެއް އަންނާނީ. އެހެންވީމާ ވަރަށްބޮޑު ބިރެއް އަޅުގަނޑުމެންނަށް އެބައޮތް. ރައްޔިތުންނަށްވެސް އެބަ އެނގެންޖެހޭ މީކަން ބިރަކީ،" މޫސަ ވިދާޅުވިއެވެ.
