އިންސާފުވެރި އިންތިޚާބެއްގެ ސީލަކީ އދ އިން ކުއްލިއަކަށް ޖަހައިދޭނެ އެއްޗެއް ނޫން: މާރިއާ
16 އޯގަސްޓު 2018 | ބުރާސްފަތި 09:43މިނިވަން އިންތިޚާބެއް ކަށަވަރުކޮށްދިނުމަކީ އީސީގެ ކަމެއް
ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހުގެ ތަރުޖަމާނު މާރިއާ އަހުމަދު ދީދީ
ރާއްޖޭގައި ބާއްވާ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބެއްކަމުގެ ސީލަކީ، ބައިނަލް އަޤުވާމީ ޖަމިއްޔާތަކުން ކުއްލިއަކަށް އައިސް ޖަހައިދޭނެ އެއްޗެއް ނޫން ކަމަށް ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހުގެ ތަރުޖަމާނު މާރިއާ އަހުމަދު ދީދީ ވިދާޅުވެއްޖެއެވެ.
އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގެ އެއްވެސް ކަމެއްގައި އދ. އިން ބައިވެރިނުވާން ނިންމާފައިވާތީ އެކަމަށް އިޝާރާތް ކުރައްވާ، ނޫސްވެރިންނަށް މައުލޫމާތު ދެއްވަމުން މާރިއާ ވިދާޅުވީ، އދ އާއި އީޔޫ ފަދަ ބޮޑެތި ޖަމިއްޔާތަކުން، މިނިވަން އިންސާފުވެރި އިންތިޚާބެއްކަމުގެ ސިލް ޖަހައިދެނީ ވޯޓުލާ ދުވަހު ރާއްޖެއައިސް ބަލާބެލުމަކަށް ނޫން ކަމަށެވެ.
"މި ބޭއްވޭ އިލެކްޝަނަކީ މިނިވަން އިންސާފުވެރި އިންތިޚާބެއް ކަމުގެ ސީލް އެމީހުން ޖަހައިދޭނީ އެދުވަހު އައިސް ބަލާ ބެލުމަކަށް ނޫން، އެ ސީލު ޖަހައިދޭނީ ކުރިއްސުރެ އެފަރާތްތަކުން ބަލާބެލުމަކަށް، އެހެންވީމަ އަޅުގަނޑުމެން ދަންނަވަމުން މިދަނީ އިލެކްޝަންސް ކޮމިޝަނަށް ވެސް، އެބޭފުޅުން މިތާގައި ހަރަކާތްތެރި ނުވިކަމުގައި ވިޔަސް ތިޔަ ބޭފުޅުންގެ އަތްޕުޅުގައި އޮތް ކަމެކޭ އެއީ މިނިވަން އިންސާފުވެރި އިންތިޚާބަކަށް ހެއްދެވުން" މާރިއާ ވިދާޅުވިއެވެ.
މާރިއާ އިތުރަށް ވިދާޅުވީ ރިޔާސ އިންތިޚާބުގެ މިނިވަންކަމާއި އިންސާފުވެރިކަން ކަށަވަރު ކޮށްދިނުމަށް، އިލެކްޝަންސް ކޮމިޝަނުގައި އެދެމުންދާތާ އަހަރަކަށް ވުރެ ގިނަ ދުވަސްވެފައިވާ ކަމަށެވެ.
މާރިޔާ ވިދާޅުވީ މިނިވަން އިންސާފުވެރި އިންތިޚާބެއް ބޭއްވުމަށް ބޭރުގެ ބޮޑެތި ޖަމިއްޔާ ޖަމާއަތްތަކާއި ގުޅިގެން މަސައްކަތް ކުރުމަށް އެތަކެއް ފަހަރު އިލެކްޝަންސް ކޮމިޝަނުގައި އެދުނީ މިފަދަ ހާލަތެއް މެދުވެރިޔަ ނުދިނުމަށް ކަމަށެވެ.
ކުއްލި އަކަށް އެންމެ ފަހު ދުވަހު އިންތިޚާބުގެ ކަންކަން ބަލާލުމަށް ފަހު އެއީ މިނިވަން އިންސާފުވެރި އިންތިޚާބެއް ކަމަށް އދ އަދި އީޔޫ އަކުން ނުބުނާނެ ކަމަށް މާރިއާ ވިދާޅުވިއެވެ.
މާރިއާ ވިދާޅުވި ގޮތުގައި އދ ފަދަ ޖަމިއްޔާތަކުގެ ބައިވެރިވުމެއް ނެތި ބޭއްވޭ އިންތިޚާބެއް ސަބަބުން، ރާއްޖޭއާ މެދު އަޅާ ފިޔަވަޅުތައް އެހެން ބަޔެއްގެ ބޮލުގައި އެޅުވުމަށް ރައީސް ޔާމީން މަސައްކަތްކޮށްގެން ނުވާނެއެވެ.
