ތަހުޤީޤާއި ޝަރީޢަތް އިންސާފުވެރިވުމުގެ އުއްމީދު ވަނީ ޖިނާއީ އިޖުރާއަތު ގާނޫނާ ގުޅިފައި: ރިޔާޒް
ގާނޫނަށް އަމަލުރަން ފެށީ މިއަދު
ޢަބްދުﷲ ރިޔާޒް އެބޭފުޅާގެ މައްޗަށް ކޮށްފައިވާ ތުޙުމަތެއްގެ ޝަރީޢަތަށް ވަޑައިގަންނަވަނީ
ތަހުޤީޤާއި ޝަރީޢަތް އިންސާފުވެރިވުމުގެ އުއްމީދު ވަނީ ޖިނާއީ އިޖުރާއަތުގެ ގާނޫނާ ގުޅިފައި ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ޢަބްދުﷲ ރިޔާޒް ވިދާޅުވެއްޖެއެވެ.
ރާއްޖޭގައި އަލަށް އެކުލަވައިލި ޖިނާއީ އިޖުރާއަތުގެ ޤާނޫނަށް އަމަލުކުރަން ފެށުމާ ގުޅިގެން، ހޮނިހިރު ދުވަހުގެ ރޭ ރިޔާޒް ކުރެއްވި ޓްވީޓެއްގައި ވިދާޅުވީ ޖިނާއީ އިޖުރާއަތުގެ ޤާނޫނަށް މިއަދު (2 ޖުލައި 2017) އަމަލުކުރަން ފެށުމުން ތަހުގީގާއި ޝަރީއަތްތައް އިންސާފުވެރި ވާނެކަމަށް އުއްމީދު ކުރައްވާ ކަމަށެވެ.
ރައްޔިތުންގެ މަޖިލީހުގައި ގިނަ ދުވަސްތަކެއް ވަންދެންކުރި މަސައްކަތުން ފާސްކުރި، ޖިނާއީ އިޖުރާއަތުގެ ގާނޫނޫ ތަސްދީގު ކުރައްވާފައިވަނީ 2 މެއި 2016 ގައެވެ. ގާނޫނުގައި ބުނާގޮތުން އެ ގާނޫނަށް އަމަލުކުރަން ފަށަން ހަމަޖެހިފައި އޮތީ، ގާނޫނު ތަސްދީގު ކުރިތާ 8 މަސްފަހުން މި އަހަރުގެ ޖަނަވަރީ މަހުގެ 2 ވަނަ ދުވަހެވެ. ނަމަވެސް އޭގެ ފަހުން މި ޤާނޫނަށް އަމަލުކުރަން ފަށަންޖެހޭ މުއްދަތަށް ހަމަސް އިތުރުކޮށް، ގާނޫނަށް އަމަކުރަން ފަށަފައިވަނީ މި ޖުލައި މަހުގެ ދެވަނަ ދުވަސް ފެށުމާއިއެކުއެވެ.
ގާނޫނީ ބޭފުޅުން ވިދާޅުވާ ގޮތުގައި މި ގާނޫނަށް އަމަލުކުރަން ފެށުމާއި ގުޅިގެން ބަދަލު އަންނާނީ މައިގަނޑު 4 ކަމަށެވެ. އޭގެ ތެރޭގައި ހިމެނެނީ މައްސަލައެއްގެ ތަހުގީގު މަރުހަލާގައި އަމަލުކުރާނެ އުސޫލުތައް މި ގާނޫނުގެ އޮނިގަނޑުގެ ތެރެއިން އެކަށައެޅިގެން ދިއުމާއި، ކުށެއްގެ ތުހުމަތުގައި މީހެއްގެ މައްޗަށް ދައުވާކުރާނަމަ ވަކި މުއްދަތެއްގެ ތެރޭގައި ދައުވާ ކުރުމަށް ޕީޖީއަށް ލާޒިމުވުމާއި، ކުށް ކުރީ ފުރަތަމަ ފަހަރު ކަމުގައި ވެފައި، އެކުށަކީ ކުޑަ ކުށެއްނަމަ، ދައުވާނުކޮށް ދޫކޮށްލުމުގެ ބާރު ޕީޖީއަށް ދިނުމުގެ އިތުރުން، ރަސްމީ ޝަރީއަތް ފެށުމުގެ ކުރިން އިބްތިދާއީ އަޑުއެހުމެއް ބޭއްވުމާއި، ކުރެވޭ ޝަރީއަތް ވީއެންމެ އަވަހެއް ކުރަން ޖެހުމާއި، މައްސަލައިގެ އަޑުއެހުންތައް ނިމުމުން ވަކި މުއްދަތެއްގެ ތެރޭގައި ހުކުމްކޮށް އަދަބު ދިނުމެވެ.
ޖިނާއީ އިޖުރާއަތުގެ ގާނޫނަށް އަމަލުކުރަން ފެށިއިރު، މި ގާނޫނުގެ ސަބަބުން ރާއްޖޭގެ އަދުލު އިންސާފުގެ ދާއިރާއަށް ޒަމާނީ، ބޮޑެތި ހެޔޮ ބަދަލުތަކެއް އަންނާނެ ކަމަށް ފަނޑިޔާރުންނާއި ވަކީލުންވެސް އިއްތިފާގުވެވަޑައިގަންނަވައެވެ.
