ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ޢަބްދުﷲ ރިޔާޒަށް ކޮށްފައިވާ ހުކުމްގެ އިސްތިއުނާފާމެދު ގޮތެއް ނިމެންދެން ކަފާލާތުގެ ދަށުން އޭނާ ދޫކޮށްލުމަށް އެދި ސުޕްރީމް ކޯޓަށް ހުށަހަޅައިފިއެވެ.
ޢަބްދުﷲ ރިޔާޒްގެ ޤާނޫނީ ވަކީލުން ނެރެފައިވާ ބަޔާނެއްގައި ބުނެފައިވަނީ 24 އޭޕްރީލް 2018 ވަނަ ދުވަހު ދިވެހިރާއްޖޭގެ ހައިކޯޓުން ޢަބްދު ﷲ ރިޔާޒު 4 މަހާއި 24 ދުވަހަށް ޖަލަށްލުމަށް ކޮށްފައިވާ ޙުކުގެ މުއްދަތުން، 3 މަހާއި 24 ދުވަސް މިހާރު ވަނީ ތަންފީޒުކޮށް ނިމިފައި ކަމަށާއި އެމައްސަލަ އިސްތިއުނާފު ކުރުމުގެ ގޮތުން ދިވެހިރާއްޖޭގެ ސުޕްރީމް ކޯޓަށް ހުށަހެޅި މައްސަލައާ ގުޅިގެން އެކޯޓުން މިހާތަނަށް އެއްވެސް ފިޔަވަޅެއް އަޅުއްވާފައި ނުވާ ކަމަށެވެ. އެހެންކަމުން ޢަބްދުﷲ ރިޔާޒުގެ މައްޗަށް ކޮށްފައިވާ ޙުކުމުން ތަންފީޒުވެފައިވާ މިންވަރަށް ރިޢާޔަތްކޮށް، އެޙުކުމުގެ ބާކީ އޮތް މުއްދަތުގައި އިސްތިއުނާފާމެދު ގޮތެއް ނިންމެންދެން، ދިވެހިރާއްޖޭގެ ސުޕްރީމް ކޯޓުގެ ޤަވައިދުގެ 106 ވަނަ މާއްދާއިން ލިބިދޭ ބާރުގެ ދަށުން ޢަބްދު ﷲ ރިޔާޒު ކަފާލާތުގެ އުސޫލުން ބަންދުން ދޫކޮށްދިނުމަށް، މިމަހުގެ 13 ވަނަ ދުވަހު ދިވެހިރާއްޖޭގެ ސުޕްރީމް ކޯޓަށް ހުށަހަޅާފައިވާ ކަމަށެވެ.
އަދި ޢަބްދު ﷲ ރިޔާޒު 2 މާރޗް 2018 ވަނަ ދުވަހު ފުލުހުން ހައްޔަރުކޮށް، އެއްވެސް ސަބަބެއް އެންގުމެއް ނެތި 12 ދުވަހު ޖަލުގައި ގެންގުޅުމަށް ފަހު، ތޭރަވަނަ ދުވަހު ތުހުމަތެއް އިއްވައި ފުލުހުން ތަޙްޤީޤު ކުރި މައްސަލާގައި ޖިނާއީ ދަޢުވާއެއް ކުރެވެން އޮތް ކަމަށް ނުފެންނަ ކަމަށް ޕްރޮސިކިއުޓަރ ޖެނެރަލްގެ އޮފީހުން ނިންމަވާފައި ވާތީ، މައްސަލަ ފައިލް ކޮށްފައިވާ ކަމަށް، 14 އޮގަސްޓް 2018 ވަނަ ދުވަހު ލިޔުމުން ފުލުހުން އަންގަވާފައިވާ ކަމަށް އެބަޔާނުގައި ވަނީ ބުނެފައެވެ.
ވަކީލުންގެ ބަޔާނުގައި ބުނެފައިވަނީ 2 މާރޗް 2018 ވަނަ ދުވަހު ޢަބްދު ﷲ ރިޔާޒު ހައްޔަރުކޮށްގެން އެއްވެސް ސަބަބެއް އެންގުމަކާ ނުލައި ފުލުހުން ގެންގުޅުނު ގެންގުޅުމާއި 13 ވަނަ ދުވަހު ހިންގި ތަޙްޤީޤަކީ އެހައްޔަރު ޤާނޫނުގެ ތެރެއަށް ފެއްތުމަށް ކޮށްފައިވާ މަސައްކަތެއްކަން ޕްރޮސިކިއުޓަރ ޖެނެރަލްގެ އޮފީހުން ނިންމި ނިންމުމުން ކަށަވަރުވެގެން ގޮސްފައިވާތީ، ޤާނޫނާ ޚިލާފަށް ޢަބްދު ﷲ ރިޔާޒު ހައްޔަރުކޮށްގެން ގެންގުޅުމުގައި ފުލުހުންގެ ތެރެއިން ބައިވެރިވެފައިވާ ފަރާތްތައް ހޯދައި މައްސަލަ ތަޙްޤީޤުކުރުމަށް، މޯލްޑިވްސް ނޭޝަނަލް އިންޓެގްރިޓީ ކޮމިޝަނަށާއި ހިއުމަންރައިޓްސް ކޮމިޝަނަށް އިލްތިމާސްކޮށް ދަންނަވާ ކަމަށެވެ.
