ފިޝަރީޒް މިނިސްޓްރީން ދައުލަތައް 50 މިލިއަނަށް ވުރެ ގިނަ ރުފިޔާ ނުލިބިވާކަން ފަޅާއަރައިފި
2016 ވަނަ އަހަރުގެ އޮޑިޓް ރިޕޯޓުގައި ފާހަގަ ކުރުމުން ވެސް އިސްލާހެއް ނުކުރި
ޑރ. ޝައިނީ: ފިޝަރީޒް މިނިސްޓްރީގެ އިހުމާލުން 50 މިލިއަނަށް ވުރެ ގިނަ ރުފިޔާ ވަނީ ނުލިބި
ސަރުކާރުގެ ފަރާތުން އެންމެ ބާރަށް ބަސް ވިދާޅުވާ އެއްވަޒީރު ކަމުގައިވާ ޑރ. މުހައްމަދު ޝައިނީގެ މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ދައުލަތައް ލިބެންޖެހޭ 50 މިލިއަނަށް ވުރެ ގިނަ ދިވެހި ރުފިޔާ ނުލިބިވާކަން ފަޅާއަރައިފިއެވެ.
އެކަން ހާމަވެފައި ވަނީ އޮޑިޓަރ ޖެނެރަލް ނެރުއްވި އެ މިނިސްޓްރީގެ މިދިޔަ އަހަރުގެ އޮޑިޓް ރިޕޯޓުންނެވެ.
އޮޑިޓަރ ޖެނެރަލް ނެރުއްވާފައިވާ އެއޮޑިޓް ރިޕޯޓުގައި ހާމަކުރައްވާފައިވާ ގޮތުގައި ޅ. ފެލިވަރުގައި ޤާއިމްކޮށްފައިވާ އައިސް ޕްލާންޓަށް 31 ޑިސެމްބަރ 2016 ގެ ނިޔަލަށް ކުއްޔާއި ޖޫރިމަނާގެ ގޮތުގައި ލިބެންޖެހޭ ޖުމްލަ 7847131 (ހަތް މިލިއަން އަށް ސަތޭކަ ސާޅީސް ހަތް ހާސް އެއް ސަތޭކަ ތިރީސް އެކެއް) ރުފިޔާ ހޯދުމަށް މިނިސްޓްރީން އެކަށީގެންވާ ފިޔަވަޅުތަކެއް އަޅާފައި ނުވުމުގެ ސަބަބުން 31 ޑިސެމްބަރ 2017 ގެ ނިޔަލަށް އެއަދަދު 10831380 (ދިހަ މިލިއަން އަށް ސަތޭކަ އެއް ހާސް ތިން ސަތޭކަ އަށްޑިހަ) ރުފިޔާއަށް އިތުރުވެފައިވާކަން ފާހަގަ ކުރެވޭ ކަމަށެވެ.
މީގެ އިތުރުން ގދ. ތިނަދޫގައި ޤާއިމްކޮށްފައިވާ އައިސް ޕްލާންޓުން ގަވާއިދުން ކުލި ދައްކަމުންދިޔަ ނަމަވެސް 2016 ވަނަ އަހަރުގެ ތިން ވަނަ ކުއާޓަރުގައި ދައްކަންޖެހޭ ކުލި، ދައްކަންޖެހޭ މުއްދަތަށް ވުރެ ފަހުން ދެއްކުމުގެ ސަބަބުން ޖޫރިމަނާގެ ގޮތުގައި އައިސް ޕްލާންޓް ކުއްޔަށް ހިފާފައިވާ ފަރާތުން ދައްކަންޖެހޭ 19911 (ނަވާރަ ހާސް ނުވަ ސަތޭކަ އެގާރަ) ރުފިޔާ ހޯދާފައި ނުވާ ކަމަށް 2016 ވަނަ އަހަރު އޮޑިޓްގައި ފާހަގަކޮށްފައި ވިޔަސް 2017 ވަނަ އަހަރުގެ ނިޔަލަށް ވެސް އެ ފައިސާ ލިބިފައި ނުވާ ކަމާއި އެފައިސާ ހޯދުމަށް މިނިސްޓްރީން އެކަށީގެންވާ ފިޔަވަޅުތަކެއް އަޅާފައި ނުވާކަން ފާހަގަ ކުރެވޭ ކަމަށެވެ.
މީގެ އިތުރުން ތ. އަތޮޅު ގުރައިދޫގައި ޤާއިމްކޮށްފައިވާ އައިސް ޕްލާންޓްގެ ކުއްޔާއި ޖޫރިމަނާއަށް 2016 ވަނަ އަހަރު އަހަރުގެ ނިޔަލަށް 8173817 (އަށް މިލިއަން އެއް ސަތޭކަ ހަތްދިހަ ތިންހާސް އަށް ސަތޭކަ ސަތާރަ) ރުފިޔާ ހޯދުމަށް 2017 ވަނަ އަހަރު މީރާއަށް މިނިސްޓްރީން ފޮނުވިއަސް މީރާ އިން އެފައިސާ ބަލައިގަންނަމުން ދޭތޯ މިނިސްޓްރީން ބަލާފައި ނުވާ ކަމަށް އޮޑިޓަރ ޖެނެރަލް ވަނީ ފާހަގަ ކުރައްވާފައެވެ.
ރާއްޖޭގެ މަސްވެރިކަން ތަރައްޤީކޮށް ކުރިއެރުވުމުގެ ގޮތުން ދިގުމުއްދަތުގައި އަގު ދައްކައި ނިންމާ ގޮތަށް އެގްރީމެންޓްކޮށް މަސްދޯނި ފަހަރާއި މަސްދޯނިފަހަރުގެ އިންޖީނު، މިނިސްޓްރީން އަމިއްލަ ފަރާތްތަކަށް 1997 ވަނަ އަހަރާއި 2001 ވަނަ އަހަރާ ދެމެދު ދޫކޮށްފައި ވެއެވެ. އެ އެއްބަސްވުންތަކުގައި ބަޔާންކޮށްފައިވާ ގޮތުން އެފައިސާ ފިނޭންސް މިނިސްޓްރީއަށް ނުވަތަ ފިޝަރީޒް މިނިސްޓްރީން އަންގާ ފަރާތަކަށް ދައްކަން ޖެހެއެވެ.
ނަމަވެސް 2017 ވަނަ އަހަރުގެ ނިޔަލަށް 36 ދޯންޏެއްގެ ކުއްޔާއި ޖޫރިމަނާއަށް ދައްކަން ޖެހޭ 22572131 (ބާވީސް މިލިއަން ފަސް ސަތޭކަ ހަތްދިހަ ދެހާސް އެއް ސަތޭކަ ތިރީސް އެކެއް) ރުފިޔާ އާއި 19 މަސް ދޯންޏެއްގެ އިންޖީނުގެ ކުއްޔާއި ޖޫރިމަނާއަށް ދައްކަން ޖެހޭ 10024777 (ދިހަ މިލިއަން ސައުވީސް ހާސް ހަތް ސަތޭކަ ހަތްދިހަ ހަތެއް) ރުފިޔާ ދައްކާފައި ނުވާކަން އެއޮޑިޓް ރިޕޯޓުގައި ފާހަގަ ކުރައްވާފައި ވެއެވެ.
އެ އޮޑިޓް ރިޕޯޓުގައި ހާމަކޮށްފައިވާ ގޮތުގައި މަސްދޯނި ފަހަރާއި މަސްދޯނި ފަހަރުގެ އިންޖީނު ދޫކޮށްފައިވާ ފަރާތްތަކުން އެފައިސާ ގަވާއިދުން ދައްކަމުން ގެންގޮސްފައި ނުވި ނަމަވެސް މިނިސްޓްރީގެ ފަރާތުން އެފައިސާ ހޯދުމަށް އެކަށީގެންވާ ފިޔަވަޅެއް އަޅާފައެއް ނުވެއެވެ. އެގޮތުން 2017 ވަނަ އަހަރު 16 ފަރާތަކަށް މިނިސްޓްރީން ނޯޓިސް ފޮނުވާފައި ވީ ނަމަވެސް ނޯޓިސްގެ މުއްދަތު ހަމަވުމުން 2017 ވަނަ އަހަރުގެ ތެރޭގައި އިތުރު ފިޔަވަޅެއް އަޅާފައި ނުވާ ކަމަށާއި މިމައްސަލަ ވާނީ 2016 ވަނަ އަހަރުގެ އޮޑިޓް ރިޕޯޓުގައި ވެސް ހިމަނާފައި ކަމަށް އޮޑިޓަރ ޖެނެރަލް ވަނީ ވިދާޅުވެފައެވެ.
