އިދިކޮޅު ފަރާތްތަކުގެ ކެމްޕެއިން މެޓީރިއަލް އެޑިޓް ކުރާތީ ޕީޕީއެމް އެމްޕީއިންނަށް ފާޑުކިޔުން އަމާޒުވެއްޖެ
އެމައްސަލަ ފުލުހަށް ހުށަހެޅުމަށް މެމްބަރު ރޮޒައިނާ ވަނީ ގޮވާލައްވާފައި
އެޑިޓްކޮށްފައިވާ ވީޑިއޯ ޝެއަރކުރި އެއް ބޭފުޅަކީ ވެލިދޫ ދާއިރާގެ މެމްބަރު އަބްދުﷲ ޔާމީން
ގުޅިފައިވާ ޕާޓީތަކުން ތައްޔާރުކުރާ ބައެއް ކެމްޕޭން މެޓީރިއަލް އެޑިޓްކޮށް، އޭގެ ނަހަމަ ގޮތުގައި އެންޓިކެމްޕެއިނަށް ވާގޮތަށް ޕީޕީއެމްއަށް ނިސްބަތްވާ މަޖިލިސް މެމްބަރުން ބޭނުންކުރަމުންދާތީ ގިނަ ބަޔަކު ފާޑުކިޔަމުން އެބަދެއެވެ.
ވެރިކަންކުރާ ޕާޓީ ޕީޕީއެމްއަށް ނިސްބަތްވާ ބައެއް މެމްބަރުންނަށް ފާޑުކިޔުން އަމާޒުވެފައިވަނީ އިދިކޮޅު ޕާޓީތަކުގެ ޒުވާނުން ތައްޔާރުކޮށްފައިވާ ކެމްޕެއިން ވީޑިއޯތަކެއް އެޑިޓްކޮށްގެން ސޯޝަލް މީޑިއާގައި ދައުރުކުރަމުންދާތީއެވެ. އެގޮތުން މިފަހަރުގެ ރިޔާސީ އިންތިޚާބުގައި ވޯޓުލާނެކަމަށާއި ވޯޓު ލާނީ އިދިކޮޅު ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އަށް ކަމަށް ބުނާ ބައެއް ވީޑިއޯތައް އެޑިޓްކޮށް، އެ ޒުވާނުން އިބޫއާއި ދެކޮޅަށް ވޯޓު ދޭނެކަމަށް ފެންނަ ގޮތަށް އޮޅުވާލައިގެން ވީޑިއޯތައް އެޑިޓްކޮށްފައިވެއެވެ.
ރައްޔިތުންގެ މަޖިލީހުގެ ޕީޕީއެމް މެމްބަރު ވެލިދޫ ދާއިރާގެ އަބްދުﷲ ޔާމީންވެސް އެވިޑިއޯ ޝެއަރކުރައްވާފައިވާއިރު، އެމްޑީޕީއަށް ނިސްވަތްވާ އައްޑޫ މީދޫ ދާއިރާގެ މެމްބަރ ރޮޒައިނާ އާދަމް އެކަން ސިފަކުރެއްވީ ދަށު ދަރަޖައިގެ އަމަލެއްގެ ގޮތުގައެވެ. އަދި ވީޑިއޯ ކްލިޕްތައްފަދަ ފިކުރީ މުދަލުން ވައްކަންކުރުމަކީ ޤާނޫނީ ކުށެއްކަން މެމްބަރު ޔާމީނަށް އެނގިވަޑައިނުގަންނަވަނީތޯ ރޮޒައިނާ ސުވާލުކުރެއްވިއެވެ. މީގެ އިތުރުން އެވީޑިއޯއިން ފެންނަ ޒުވާނުން އެމައްސަލަ ފުލުހުންނަށް ހުށަހެޅުމަށް ގޮވާލައްވަމުން ރޮޒައިނާ ވިދާޅުވީ މިއަދު އެމައްސަލަ ނުބެލުނަސް ސެޕްޓެމްބަރ 23 ގެ ފަހުން މައްސަލަ ބެލޭނެކަމަށެވެ.
އިދިކޮޅު ފަރާތްތަކުގެ ކެމްޕެއިން މެޓީރިއަލްތަކަށް އުނިއިތުރު ގެނެސްގެން މެމްބަރު ޔާމީން ސޯޝަލް މީޑިއާގައި ފެތުރުއްވިއިރު، ބ. ކުޑަރިކިލަށް ޕީޕީއެމްގެ ކެމްޕޭންގައި ވަޑައިގަތުމުން ޔާމީނަށް އެރަށު އަންހެނަކު ބަހުގެ ހޫނު ހަމަލާތަކެއް ދޭ ވީޑިއޯއެއް ދަނީ ސޯޝަލް މީޑިއާގައި ދައުރުވަމުންނެވެ.
ޕީޕީއެމްގެ މަޖިލިސް މެމްބަރުން އިދިކޮޅު ފަރާތްތަކުގެ ކެމްޕެއިން ވީޑިއޯއެއް އެޑިޓްކޮށްގެން އޭގެ އަސްލު ގެއްލޭ ގޮތަށް ފަތުރަމުންދާއިރު، އިދިކޮޅު މައި ޕާޓީ އެމްޑީޕީގެ މެނިފެސްޓޯއަށް ހަޖޫޖަހައި، މެނިފެސްޓޯގައި ނެތް ކަންތައްތަކެއް ހުރި ކަންތައްތަކެއްކަމަށް ދައްކަން ޕީޕީއެމްގެ ޕާލަމެންޓްރީ ގްރޫޕްގެ ލީޑަރ އަހުމަދު ނިހާން ހުސައިން މަނިކުވެސް ވަނީ މަސައްކަތްކުރައްވާފައެވެ. އެކަމަށްވެސް ގިނަ ބަޔަކު ވަނީ ފާޑުކިޔާފައެވެ. އެމްޑީޕީގެ މެނިފެސްޓޯގެ ޖަޒީރާ ރާއްޖެ ކޮންސެޕްޓަށް ނިހާން ހަޖޫ ޖެއްސެވިއިރު، އަދިވެސް ޕީޕީއެމްއިން އެޕާޓީގެ މެނިފެސްޓޯ އިއުލާންކޮށްފައެއް ނުވެއެވެ.
