ޖަލުގައި ތިބި މީހުން ރީ ރެޖިސްޓްރީއެއް ނުވޭ، ކަރެކްޝަންސްގެ ވެރިޔަކު ބައްދަލެއް ވެސް ނުކުރެއްވި!
ޖަލުގައި ތިއްބެވި ސިޔާސީ ލީޑަރުން އަދިވެސް ރީ ރެޖިސްޓްރީ ނުވޭ
ކުރީގެ ރައީސް މައުމޫން އަބްދުލްގައްޔޫމް (މެދުގައި)، އަދި ކުރީގެ އުއްތަމަ ފަނޑިޔާރު އަބްދުﷲ ސައީދު (ވ) އަދި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދު (ކ)
ޖަލުތަކުގައި ހުކުމް ތަންފީޒު ކުރަމުންދާ މީހުންނާއި ޝަރީއަތް ނިމެންދެން ބަންދުކޮށްފައި ތިބި މީހުންނަށް ވޯޓުލުމުގެ ހައްގު ގެއްލޭ ގޮތަށް، މޯލްޑިވްސް ކަރެކްޝަނަލް ސާރވިސް އިން އަމަލުކުރަމުންދާ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ.
ޖަލުގައި ތިއްބެވި ސިޔާސީ ލީޑަރުންނާއި ކުރިން ދައުލަތުގެ އިސް މަގާމުތަކުގައި ތިއްބެވި ބޭފުޅުން މިހާތަނަށް ރީ ރެޖިސްޓްރީ ވެފައި ނުވާތީ ކަރެކްޝަންގެ އިސްވެރިންނާ ބައްދަލު ކުރެއްވުމަށް އެ އިދާރާއަށް ވަޑައިގެންނެވުުން ވަނީ ބައްދަލުކުރެވޭ ގޮތް ނުވެފަ އެވެ. ކަރެކްޝަންސްގެ އިދާރާ އިން ނިކުމެ ވަޑައިގެން ނޫސްވެރިންނަށް މައުލޫމާތު ދެއްވަމުން ކުރީގެ ރައީސް މައުމޫން އަބްދުލްގައްޔޫމްގެ ގާނޫނީ ވަކީލު މުހައްމަދު ފައިސަލް ވިދާޅުވީ ކަރެކްޝަންގެ އިސްވެރިންނާ ބައްދަލު ކުރެއްވުމަށް ވަޑައިގެންނެވުމުގެ ކުޑަ ވަގުތު ކޮޅެއް ކުރިން ވެސް ޗެކް ކުރިއިރު ވެސް ޖަލުގައި ބަންދުކޮށްފައިވާ ސިޔާސީ ބޭފުޅުން ރީ ރެޖިސްޓްރީކޮށްފައި ނުވާކަމަށެވެ. ނަމަވެސް އެކަމާ ކޮމިޝަނުގެ އިސްވެރިޔަކާ ބައްދަލު ކުރަން އެބޭފުޅުން ވަޑައިގަތުމުން ބައްދަލު ކުރަން ދެކޮޅު ހައްދަވައި، އެޕޮއިންޓްމެންޓަކަށް އެދުމަށް ކަރެކްޝަނުން ބުނެފައިވާ ކަމަށެވެ.
ފައިސަލް ވިދާޅުވީ ޖަލުގައި ބަންދުގައި ތިބި މީހުންގެ ތެރެއިން ރެޖިސްޓްރީ ކުރަން ބޭނުންވާ ފަރާތްތަކުން ރީ ރެޖިސްޓްރީ ފޯމް ހުށަހެޅުމުން އެކަންކުރުމަކީ ކަރެކްޝަނުގެ ޒިންމާއެއް ކަމަށާއި ބައެއް ބޭފުޅުން ފޯމު ލިތާ އެތައް ދަވަހެއް ފާއިތުވެފައިވާއިރު، މިއަދާ ހަމައަށް ރެޖިސްޓްރީ ނުވެ އޮތުމަކީ ވަރަށް ބޮޑު މައްސަލައެއް ކަމަށެވެ. އަދި އެކަމާ ގުޅޭ ގޮތުން ކަރެކްޝަންގެ ވެރިޔަކާ ބައްދަލު ކުރެވޭނީ އެޕޮއިންޓްމެންޓެއް ހައްދައިގެން ކަމަށް ބުނުމަކީ ގަބޫލުކުރެވޭނެ ކަމެއް ނޫން ކަމަށް ވެސް ފައިސަލް ވިދާޅުވިއެވެ.
އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވިދާޅުވީ ޖަލުގައި ހުކުމް ތަންފީޒު ކުރަމުންދާ ފަރާތްތަކާއި އެކި ތުހުމަތު ތަކުގައި ޖަލު ބަންދުގައި ތިބި ފަރާތްތަކުގެ ވޯޓު ލުމުގެ ހައްގު ގެއްލޭ ގޮތަށް ދައުލަތުގެ އިދާރާއަކުން އަމަލު ކުރުމަކީ ގަބޫލު ކުރެވޭނެ ކަމެއް ނޫން ކަމަށާއި ވޯޓުލުމުގެ ހައްގު ލިބިގެންވާ ހުރިހާ ފަރާތްތަކަށް ވެސް ވޯޓުލުމަށް ފުރުސަތު ލިބެންޖެހޭ ކަމަށެވެ. އަދި އަމުދުން ދައުލަތުގެ އިދާރާއެއްގެ އިހުމާލުން ރައްޔިތެއްގެ ވޯޓުލުމުގެ ހައްގު ގެއްލުމަކީ ވަރަށް ބޮޑަށް ކަންބޮޑުވާ ކަމެއް ކަމަށް ވެސް އަނަސް ވިދާޅުވިއެވެ.
ގުޅިފައިވާ ސިޔާސީ ޕާޓީތަކުން ދަނީ ރީ ރެޖިސްޓްރީ ކުރުމުގެ މަސައްކަތްތަކާއި ވޯޓުލުމުގެ ހައްގު ލިބިގެންވާ ފަރާތްތަކަށް ވޯޓު ލެވޭނެ ފަސޭހަ ގޮތްތައް ހަމަޖެއްސުމުގެ މަސައްކަތް ކުރަމުންނެވެ. އެގޮތުން ރީ ރެޖިސްޓްރީ ކުރުމުގެ އިތުރުން، ވޯޓު ފޮށި ބަހައްޓާނެ ތަންތަން އިލެކްޝަނުން މީގެ ކުރިން ކަނޑައެޅި އަދަދު މަދުކަން ފާހަގަކޮށް އެކަމުގެ ކަންބޮޑުވުން ފާޅުކޮށްފައެވެ. އިލެކްޝަނުން ފަހުން ވަނީ ގިނަ ރިސޯޓްތަކެއްގައި ވޯޓު ފޮށި ބެހެއްޓުމަށް ނިންމާ ވޯޓު ފޮށީގެ އަދަދު ވެސް އިތުރު ކޮށްފައެވެ.
