މަސްވެރިކަމަށް ނިކުމެ އުޅުނު މީހަކު ކަރަންޓްގައި ޖެހިގެން މަރުވެއްޖެ
ކަރަންޓުގައި ޖެހިގެން މަރުވީ 34 އަހަރުގެ ބިދޭސީ ފިިރިހެނެއް
ގއ. ގެމަނަފުށި
ގއ. ގެމަނަފުށީގައި މަސްވެރިކަމަށް ނިކުމެ އުޅުނު ދޯންޏެއްގައި ހުރި މީހަކު ކަރަންޓްގައި ޖެހިގެން މަރުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިސަރު ވިދާޅުވީ މަސްވެރިކަމަށް ނުކުމެ އުޅުނު މީހެއްގެ ގައިގައި ކަރަންޓު ޖެހިގެން މަރުވި ހަދިސާ މިއަދު ހެނދުނު 6 ޖެހީއިރު ފުލުހުންނަށް ރިޕޯޓު ކޮށްފައިވާ ކަމަށާއި، މަރުވީ އުމުރުން 34 އަހަރުގެ ބިނދޭސީ ފިރިހެނެއް ކަމަށެވެ. އަދި މިހާރު ބިދޭސީ މީހާގެ ހަށިގަނޑު މާލެ ގެނެއުމުގެ މަސައްކަތް ކުރަމުން އަންނަ ކަމަށް އޮފިސަރު ވިދާޅުވިއެވެ.
މައުލޫމާތު ލިބިފައިވާ ގޮތުގައި ބިދޭސީ މީހާ މަރުވީ އެންދަމަން ދިއްލާފައި ހުރި ލައިޓުން ކަރަންޓްގައި ޖެހިގެންނެވެ. ކަރަންޓް ޖެހުނު އިރު އޭނާ ހުރީ ލައިޓްގައި ހިފަހައްޓައިގެން ކަމަށާއި، ކަރަންޓުގައި ޖެހުމާ އެކު އޭނާ މަރުވި ކަމަށް ވެސް މައުލޫމާތު ލިބެއެވެ.
ކަރަންޓުގައި ޖެހުނު ބިދޭސީ މީހާ ސަލާމަތް ކުރުމަށް ގައިގައި ހިފެހެއްޓި ދިވެހި މީހާ ވެސް ކަރަންޓްގައި ޖެހިފައިވާ ކަމަށާއި، ނަމަވެސް އޭނާއަށް ސީރިއަސް މައްސަލައެއް ދިމާ ނުވާ ކަމަށް މައުލޫމާތު ލިބެއެވެ.
