ވޯޓް ނުލާ ފަރެއް ނުޖެއްސޭނެ، ކުރިން ކަންކުރި ގޮތަށް ދެނެއް ކަންކަމެއް ވެސް ނުކުރެވޭނެ: އަލީ ޒާހިރު
12 އޯގަސްޓު 2018 | އާދީއްތަ 19:47ކުރިން ގާނޫނާ އަދި އިސޫލްތަކާއި ހިލާފަށް ކަންކަން ކުރިއަސް ދެނެއް އެފުރުސަތެއް ނެތް
މަކުނުދޫގައި ބޭއްވި ޖަލްސާގައި އަދާލަތު ޕާޓީގެ ނައިބު ރައީސް އަލީ ޒާހިރު ވާހަކަ ދައްކަވަނީ
މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބު އޮންނާނެ ކަމަށާއި އިންތިހާބު ނުބާއްވަން މި ސަރުކާރުން ކިތަންމެވަރެއް ކުރިއަސް އިންތިހާބު ޖެހޭނީ ބާއްވަން ކަމަށް އަދާލަތު ޕާޓީގެ ނައިބު ރައީސް އަލީ ޒާހިރު ވިދާޅުވެއްޖެ އެވެ.
ގުޅިފައިވާ ސިޔާސީ ޕާޓީތަކުން ހދ. އަތޮޅަށް މިހާރު ކުރަމުންދާ ކެމްޕެެއިން ދަތުރުގެ ތެރެއިން. އެ އަތޮޅު މަކުނުދޫގައި އާދިއްތަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން އަލީ ޒާހިރު ވިދާޅުވީ މީގެ ކުރިން ގާނޫނާ ހިލާފަށް ގިނަ ކަންކަން މިސަރުކާރުން ކުރިނަމަވެސް ރިޔާސީ އިންތިހާބު ނުބާއްވާ ހެދޭނެ އެއްވެސް ގޮތެއް މިސަރުކާރަށް ނެތް ކަމަށެވެ.
"އަޅުގަނޑުމެން ހަމަ ވިސްނާވިސްނާ ނުވިސްނުނު، ރައީސް ދެން ކޮންމެވެސް ގޮތެއް ހައްދަވާނެ އެވިދާޅުވާ ގޮތެއް އަޅުގަނޑުމެންނަކަށް ނޭނގުނު. ކޮންމެވެސް ގޮތެއް ހައްދަވައިގެން ވެރިކަމުގައި ރައީސް ޔާމީން ރައީސޭ ހުންނަވާނީ ދެން ދައުރެއްގައިވެސް، ހަމަ އެއްގޮތަކަށްވެސް އަޅުގަނޑުމެންނަކަށް ނުވިސްނުނު. ދެން މީގެކުރިން ކުރިކަންކަން އެއީ އަޅުގަނޑުމެންނަށް އާކަމެއް ނޫން. ކުރި އެއްވެސް ކަމަކީ ގާނޫނާ އޮންނަ އުސޫލުގެ ތެރެއިން ކޮށްފައިވާ ކަންކަމެއް ނޫން. އެގޮތަކަށެއް ދެން ކުރިއަށް އޮތްތަނުގައި ކަންކަމެއް ނުގެންދެވޭނެ،" އަލީ ޒާހިރު ވިދާޅުވި އެވެ.
ރާއްޖޭގެ ރިޔާސީ އިންތިހާބާ ގުޅިގެން ހިނގަމުންދާ ކަންކަން ދިވެހި ރައްޔިތުންނާއި ދައުލަތުގެ ހުރިހާ މުއައްސަސާތަކާއި މުޅި ދުނިޔެ ބަލަމުން އެދަނީ ވަރަށް ގާތުން ކަމަށާއި މިސަރުކާރުން އިންތިހާބު ފަސްކޮށް، ނުވަތަ އިންތިހާބު ނުބާއްވަން ނިންމައިފި ނަމަ ދެން ވާނެގޮތް ބަލަން ތިބުމަށް އަލީ ޒާހިރު ވިދާޅުވި އެވެ.
"ނިކަން ކެރޭ ކަމުގައި ވަނީނަމަ، އިންތިހާބު ލަސްކުރަންވީ، ނިކަން ކެރޭ ކަމުގައި ވަނީނަމަ އިންތިހާބު ނުބާއްވަންވީ. އަޅުގަނޑުމެން ދެންވާގޮތް ބަލަން ތިބޭނަން. އިރާދަ ކުރެއްވިއްޔާ އެއީކީ އަންނާނެ ދުވަހެއް ނޫން، އަދި ވާނެކަމެއް ވެސް ނޫން،" އަލީ ޒާހިރު ވިދާޅުވި އެވެ.
