މިދިޔަ އާދީއްތަ ދުވަހު އިންޑޮނޭޝިއާގެ ރަށެއް ކަމަށްވާ ލޮމްބޮކް އަށް ބިންހެލުމުގައި މަރުވި މީހުންގެ އަދަދު 387 އަށް އަރާފައިވާ ކަަަމަށް ރިޕޯޓުތައް ބުނެފިއެވެ.

6.9 މެގްނިޓިއުޑް ގައި އައި ބިންހެލުމުގައި ޒަޚަމްވެފައިވާ މީހުންގެ އަދަދު 13000 އަށް އަރާފައިވާއިރު 387000 މީހުން ވަނީ ރައްކާތެރި ހިސާބުތަކަށް ބަދަލުކުރަން ޖެހިފައެވެ. އަދި އެތައް ހާސް އިމާރާތްތަކެއް ހަލާކުވެފައިވާ ކަމަށް ރިޕޯޓުތައް ބުނާއިރު މަރުވި މީހުންގެ އަދަދު ގިނަވާނެ ކަމަށް ރިޕޯޓުތައް ބުނެއެވެ. އޭގެ ސަބަބަކީ އަދިވެސް ބައެއް މީހުން އިމާރާތްތަކުގެ ދަށުގައި ތާށިވެފައިތިބުމާއި އަދި ބިންހެލުމާއި ގުޅިގެން އައި ބިންގަނޑު ކަނޑައިގެން ދިޔުމުގެ ހާދިސާތަކުގެ ސަބަބުން މީހުން ވަޅުލެވިފައި ވުން ކަމަށެވެ. 

ބިންހެލުމާއި ގުޅިގެން އެންމެ ގިނަ މީހުން މަރުވީ އުތުރު ލޮމްބޮކް ގައި ކަމަށްވާއިރު، އުތުރު ލޮމްބޮކް ގައި 334 މީހުން މަރުވެފައިވެއެވެ. 

ދުނިޔޭގެ އެކި ކަންކޮޅުތަކުގެ ޓޫރިސްޓުން ޝައުގެވެރިވާ ލޮމްބޮކް އޮންނަނީ ޓޫރިސްޓް މަންޒިލެއް ކަމަށްވާ ބާލީގެ އިރުން 40 ވަރަކަށް ކިލޯމީޓަރު ދުރުގައެވެ.

ބާލީ އާއި ލޮމްބޮކްގެ އާބާދީ ގާތްގަނޑަކަށް ހަތަރު މިލިއަނަށް އަރާ އިރު، އަހަރެއްގެ ތެރޭގައި ދެ ރަށަށް ޒިޔާރަތްކުރާ މީހުންގެ އަދަދު އެތައް މިލިއަނަކަށް އަރައެވެ.

ean.