އިބޫ، ޑރ. ޒާހިރު ހުސައިނާ ބައްދަލުކުރައްވައިފި
ޒާހިރަކީ ރައީސް މައުމޫންގެ ގާތް އެކުވެރިޔާ
ރައީސް މައުމޫންގެ ޒަމާންވި އެކުވެރިޔާ ޒާހިރުގެ އަރިހުގައި އިބޫ
ރައީސް މައުމޫން އަބްދުލް ގައްޔޫމުގެ ވެރިކަމުގައި ވަޒީރުކަން ކުރެއްވި އަދި އިސްލާމިކް ޔުނިވާސިޓީގެ ކުރީގެ ޗާންސެލަރު ޑރ. ޒާހިރު ހުސައިނާ ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ) ބައްދަލު ކުރައްވައިފިއެވެ.
ޒާހިރު ހުސައިނާ, އިބޫ ބައްދަލު ކުރެއްވީ ހުކުރު ދުވަހު މާލޭގެ ގެތަކަށް "ދޮރުން ދޮރަށް" ހިންގެވުމަށް ކުރިއަށް ގެންދިޔަ ހަރަކާތްތަކުގެ ތެރެއިންނެވެ. ރައީސް މައުމޫންގެ ގާތް އެކުވެރިޔާ ޒާހިރުގެ ގެކޮޅު ހ. ނީލް ވިލާއަށް ވަޑައިގެން، އިބޫ ވަނީ ޒާހިރުގެ އާއިލީ މެމްބަރުންނާ ވެސް ބައްދަލު ކުރައްވާފައެވެ.
ޒާހިރަކީ ނިޝާން އިއްޒުއްދީނުގެ އިއްޒަތްތެރި ވެރިޔާގެ ލަގަބު ލިބިވަޑައިގެންފައިވާ ބޭފުޅެކެވެ. ދުވަހު ނޫސް "ހަވީރު"ގެ ޗެއާމަންކަން ވެސް ކުރެއްވި ޒާހިރު، ނޫސްވެރިކަމަށް ކޮށްދީފައިވާ މަސައްކަތުގެ އަގުވަޒަންކޮށް، މޯލްޑިވްސް މީޑިއާ ކައުންސިލް (އެމްއެންސީ) އިން ވަނީ ނޫސްވެރިކަމުގެ ގައުމީ އިނާމު ވެސް ދެއްވާފައެވެ. އަދި ރާއްޖޭގެ ގައުމީ ޔުނިވާސިޓީގެ ދެ ވަނަ ޗާންސެލަރުކަން ވެސް ކުރެއްވީ ޒާހިރެވެ. އެ އަށް ފަހު، ޒާހިރު ވަނީ އިސްލާމިކް ޔުނިވާސިޓީގެ ޗާންސެލަރުކަން ވެސް ކުރައްވާފައެވެ. އިސްލާމިކް ޔުނިވާސިޓީގެ ފުރަތަމަ ޗާންސެލަރަކީ ޒާހިރެވެ.
އިސްލާމިކް ޔުނިވާސިޓީގެ ޗާންސެލަރު ކަމުން ޒާހިރު ވަކިކުރައްވާފައި ވަނީ 2016 ވަނަ އަހަރުގެ އޮގަސްޓް މަހުގެ ތެރޭގައެވެ. ޒާހިރު އެ މަގާމުން ވަކިކޮށް އެޑިއުކޭޝަން މިނިސްޓްރީގެ އެޑްވައިޒަރަކަށް ބަދަލުކުރެއްވުމަށް ފަހު އެ މަގާމަށް އިސްކުރައްވާފައި ވަނީ ރައީސްގެ މިހާރުގެ ރަނިންގ މޭޓް ޑރ. މުހައްމަދު ޝަހީމް އަލީ ސައީދެވެ.
އިބޫ، ޒާހިރާ ބައްދަލު ކުރެއްވި އިރު ޒާހިރުގެ ޒަމާންވީ އެކުވެރިޔާ ކުރީގެ ރައީސް މައުމޫން ހައްޔަރުކޮށް، ޖަލުގައި ބަންދުކޮށްފައިވާތާ ހަ މަހަށް ވުރެ ގިނަ ދުވަސްވެއްޖެއެވެ.
