އުމަރާއި ޝުޖާއު އިންތިޚާބުގައި ވާދަ ނުކުރަން ނިންމައިފި
،މި ރިޔާސީ އިންތިޚާބު ބަދަލުވެފައި ވަނީ ފެންނަ ނުފެންނަ ވޯޓަކަށް
ކުރީގެ ހޯމް މިނިސްޓަރ އުމަރު ނަސީރު
އަންނަ މަހު 23 ގައި ބާއްވާ ރިޔާސީ އިންތިހާބުގައި ވާދަ ނުކުރެއްވުމަށް ކުރީގެ ހޯމް މިނިސްޓަރ އުމަރު ނަސީރާއި ލޯކަލް ގަވަރމަންޓް އޮތޯރިޓީގެ ކުރީގެ ނާއިބު ރައީސް ޝުޖާޢު ހުސައިން ނިންމަވައިފިއެވެ.
އުމަރު ރިޔާސީ އިންތިޚާބުގައި ވާދަ ނުކުރައްވާނެ ކަމަށް ވިދާޅުވެ ނެރުއްވާފައިވާ ބަޔާނުގައި ވަނީ ޑްރަގާއި މީހުން މެރުމާއި ކޮރަޕްޝަންގެ އަމަލުތަކުން ދިވެހިން ސަލާމަތްކޮށް އިސްލާމް ދީނުގެ ހަމަތަކުގެ މަތީގައި ގާއިމްވެ އޮންނަ އަމާން ތެދުވެރި މުރާލި މުޖްތަމައުއަކަށް ދިވެހި މުޖްތަމައު ބަދަލު ކުރުމަސް ވަކާލާތު ކުރާތާ ދިހަ އަހަރު ވެފައިވާ ކަމަށެވެ. މި އަހަރުގެ ރިޔާސީ އިންތިޚާބުގައި އޭނާ ވާދަކުރައްވަން ނިންމެވީ އެ މިސްރާބަށް ދިވެހިން ގެންގޮސްދިނުމުގެ މަތިވެރި އުއްމީދުގައި ކަމަށް ބަޔާނުގައި ވެއެވެ.
ނަމަވެސް މިއަދުގެ ސިޔާސީ ހާލަތު އޮތް ގޮތުން ހަރުދަނާ ސިޔާސަތުތަކާއި ގައުމު އަމާން މިސްރާބަކަށް ގެންގޮސްދޭނެ ލީޑަރުން އިންތިޚާބު ކުރުމަށް ވުރެ ބޮޑަށް، މި ރިޔާސީ އިންތިޚާބު ބަދަލުވެފައި ވަނީ ފެންނަ ނުފެންނަ ވޯޓަކަށް ކަމަށެވެ.
އެހެން ކަމުން ވަގުތު އަދި ނުޖެހޭ ކަމަށް ދެކޭތީ އޭނާއާ މެދު އުއްމީދު ކުރައްވާ ހުރިހާ ބޭފުޅުންގެ އަރިހުން މާޢާފަށް އެދޭ ކަމަށާއި ރިޔާސީ އިންތިޚާބުގައި ވާދަ ނުކުރާން ނިންމި ކަމަށެވެ. އަދި އޭނާގެ ސިޔާސީ މަސައްކަތް ކުރިއަށް ގެންދާނެ ކަމަށް އުމަރު ވަނީ ވިދާޅުވިއެވެ.
އިންތިޚާބުގައި ވާދަ ނުކުރައްވަން ނިންމަވާ ޝުޖާއު ނެރުއްވާފައިވާ ބަޔާނުގައި ވަނީ އޭނާ ކުރައްވަމުންގެންދަވާ މަސައްކަތަކީ ރާއްޖެއަށް ހަގީގީ ޑިމޮކްރަސީ އިޔާދަކޮށްދީ ޒުވާނުން ބާރުވެރިކޮށް ގައުމު އައު ފެށުމަކުން ފެށުމަށް ކުރާ މަސައްކަތް ކަމަށެވެ. މި މަސައްކަތަށް ހުރަސް ހެޅުމުގެ ގޮތުން އޭނާއާ އެކު މަސައްކަތް ކުރައްވާ ބޭފުޅުންނަށް މިހާރު މިގައުމުގައި އިތް ސިޔާސީ ފިކުރުތަކުން ކުރާ ދުއްތުރާތަކަކީ ވަރަށް ވެސް ނާތަހުޒީބް ކަންކަން ކަމުގައި ދެކޭ ކަމަށެވެ.
ފާއިތިވި ދިހަ އަހަރު ތެރޭގައި ގައުމުގައި އުފެދުނީ ގޮށްމުށުގެ ބާރުން ހިންގާ ކުދިކުދި ޑިކްޓޭޓަރޝިޕްތަކެއް، އެމްޑީޕީ އާއި އަދާލަތު ޕާޓީ އާއި ޖުމްހޫރީ ޕާޓީ އަދި ޕީޕީއެމްއަކީ އެޕާޓީތަކުގެ އެތެރޭގައި އެއްވެސް ޑިމޮކްރަސީއެއް ނެތް ވަކި ފަރުދުންތަކެއްގެ އަމިއްލަ ސިޔާސީ ހައިހޫނު ކަމަށް ތަސައްލީއެއް ހޯދުމަށް ހިންގޭ ޑިކްޓޭޓަރޝިޕްތަކެއް ކަމަށް ޝުޖާއު ސިފަކުރައްވާފައި ވެއެވެ.
ގައުމުގެ މައްސަލަތަކަށް ހައްލު ހޯއްދަވައިދެއްވާނެ ކަމަށް ވިދާޅުވެ ގައުމުގެ މުޅި ދުސްތޫރީ ނިޒާމް ގަޑުބަޑު ކުރެއްވީ ރައީސް ޔާމީން ކަމަށް ވެސް ޝުޖާއު ވިދާޅުވެފައި ވެއެވެ. އެކަންތައްތައް އެހެން ހުރުމާ އެކު ރައްޔިތުންނާ ހަމައަށް ވާސިލްކޮށްދިނުމަށް ކުރާ މަސައްކަތުގައި ގޮންޖެހުންތައް ހުރި ކަމަށް ވިދާޅުވެ ރިޔާސީ އިންތިޚާބުގައި ވާދަނުކުރައްވާނެ ކަމަށް ބަޔާނުގައި ޝުޖާއު ފާހަގަކުރެއްވި އެވެ.
