ތޮއްޑޫއިން ޖިންސީ ފުރައްސާރަ ކުރި ބިދޭސީއަކު ހައްޔަރުކޮށްފި
9 އޯގަސްޓު 2018 | ބުރާސްފަތި 17:34ބިދޭސީ މީހާ ވަނީ ކުޑަ ކުދިންނާއި ދިމާލަށް އަގަބަހުން ހަޑިހުތުރު ބަހުން މުއާމަލާތްކޮށް ބައެއް އަންހެނުންގެ ފަހަތުން ދުވެފައި
އއ.ތޮއްޑޫ މަތިން ނަގާފައިވާ ފޮޓޯއެއް
އއ. ތޮއްޑޫގައި ދިރިއުޅޭ މީހުންނަށް ޖިންސީ ފުރައްސާރަ ކުރި ބިދޭސީއަކު ހައްޔަރުކޮށްފިއެވެ.
ރާއްޖެއެމްވީއަށް މައުލޫމާތު ދެއްވަމުން ތޮއްޑޫ ކައުންސިލުގެ ރައީސާ ހަދީޖާ ނިއުޝާ ވިދާޅުވީ، ބިދޭސީ މީހާ ކުޑަ ކުދިންނާއި ދިމާލަށް އަގަބަހުން ހަޑިހުތުރު ބަހުން މުއާމަލާތްކޮށް އާންމުންނަށް ވެސް އެކި ގޮތްގޮތުން މިމީހާ ޖެއްސުން ކުރި ކަމަށެވެ. އަދި މަގުމަތިން ބައެއް އަންހެނުންގެ ފަހަތުން ދުވެ ހަދާފައިވާ ކަމަށް ވެސް ނިއުޝާ ވިދާޅުވިއެވެ.
ނިއުޝާ ވިދާޅުވީ މިމައްސަލަ ބޮޑުވުމާއި ގުޅިގެން މިބިދޭސީ މީހާ ކައުންސިލުން ހައްޔަރު ކުރީ މިމަހު 5 ވަނަ ދުވަހު ކަމަށާއި، އޭގެ މާކުރިން ފުލުހުންނަށް މިމައްސަލަ ހުށަހަޅާފައިވާ ކަމަށެވެ. ނަމަވެސް ރައްޔިތުންނަށް މާބޮޑަށް އުނދަގޫވުމާއި ގުޅިގެން ރައްޔިތުންގެ އެދުމުގެ މަތިން ކައުންސިލުން އެމީހާ ހައްޔަރުކުރީ ކަމަށް އޭނަ ވިދާޅުވިއެވެ.
ކައުންސިލުން މިބިދޭސީމީހާ ހައްޔަރުކުރުމަށްފަހު ވެސް ފުލުހުންނަށް ރިޕޯޓުކުރިކަން ފާހަގަކުރައްވައި ނިއުޝާ ވިދާޅުވީ ވީއެންމެ އަވަހަށް ފުލުހުން މިމީހާ ބަލާއައުމަށް އެދުނު ކަމަށާއި، ނަމަވެސް ފުލުހުން އައީ ކައުންސިލުން އެމީހާ ހައްޔަރުކުރިތާ ދެދުވަސް ފަހުން ކަމަށެވެ.
މިމައްސަލައަށް ފުލުހުންގެ ފަރާތުން އެކަށީގެންވާ ސަމާލުކަމެއް ލިބިފައި ނުވާތީ ކަންބޮޑުވުންފާޅު ކުރައްވައި ނިއުޝާ ވިދާޅުވީ އެމީހާ ފިލާފާނެ ކަމުގެ ބިރު އޮތުމާއެކު ކައުންސިލްގެ މަސައްކަތްތައް ކުރިއަށްގެންދިޔައީ ވަރަށް ޕްރެޝަރުގައި ކަމަށެވެ.
"މީ އަސްލު ވަރަށް ސީރިއެސް މައްސަލައެއް. އާދިއްތަ ދުވަހު މިމީހާ ހައްޔަރުކޮށްގެން ކައުންސިލް އިދާރާގައި ބަންދުކޮށްފައި ބެހެއްޓީ. އެއްދުވަހު ބެހެއްޓިފަހުން ފުލުހުން މީނަ ބަލާއައީ. މީ ސީރިއެސް ކަމަކަށްވީއު ހިއެއްނުވޭ ފުލުހުން އެހާ ސީރިއެސް ކަމަކަށް ދެކުނު ހެނެއް. މިރަށުގަ އެމްޑީޕީ ދިދިއެއް ނަގާފިއްޔާ ހަމަ އެދުވަހު ފުލުހުން އަންނާނެ އެދިދަ ނަގަން. އެކަމަކު ސީރިއެސް މައްސަލައެއްގަ ހައްޔަރު ކުރި މީހަކު ބަލައެއް ނާދެވުނު" ނިއުޝާ ވިދާޅުވިއެވެ.
ތޮއްޑޫއަކީ ފުލުހުން ގާއިމުވެ ތިބޭ ރަށެއް ނޫންކަން ފާހަގަކުރައްވައި ނިއުޝާ ވިދާޅުވީ އެބިދޭސީ މީހާ ގެންދިޔައީ ރަސްދޫ ފުލުހުން އައިސް ކަމަށެވެ. އެރަށަކީ ދަނޑުވެރިކަމަށް ޚާއްސަ ރަށަކަށްވާއިރު މަސައްކަތް ކުރުވުމަށް ގިނަ އަދަދެއްގެ ބިދޭސީން އެރަށުގައި މިހާރު ދިރިއުޅެމުން ގެންދެއެވެ. އަދި ދޭތެރެ ދޭތެއިން މިފަދަ މައްސަލަތައް ދަނީ ފެންމަތިވަމުންނެވެ.
މިމައްސަލައާ ގުޅިގެން ފުލުހުންގެ ބަހެއް ވަނީ ލިބޭގޮތް ނުވެފައެވެ.
