ރާއްޖޭގައި ފުރަތަމަ ފަހަރަށް ބައިޕާސް އޮޕަރޭޝަން އޭޑީކޭ ހޮސްޕިޓަލުން ކާމިޔާބުކަމާއެކީ ކޮށްފިއެވެ.

އަންގާރަ ދުވަހާއި ބުދަ ދުވަހު ބައިޕާސް އޮޕަރޭޝަން ކޮށްފައިވަނީ އުމުރުން 54 އަހަރު ފިރިހެނެއްގެ ކަމަށް އޭޑީކޭ ހޮސްޕިޓަލުން ބުންޏެވެ. އަދި އޮޕަރޭޝަން ޓީމްގައި އެންމެ އިސްކޮށް ހަރަކާތްތެރިވެފައިވަނީ ދިވެހިންނެވެ.

އޭޑީކޭ ހޮސްޕިޓަލުން ބުނީ އޮޕަރޭޝަން ކާމިޔަބުވި ނަމަވެސް އެމީހާގެ ހާލު އެއްކޮށް ރަނގަޅު ނުވާ ކަމަށާއި އެ މީހާ އެއްކޮށް ރަނގަޅުވާން ދުވަސްކޮޅެއް ނަގާނެ ކަމަށެވެ.

އޭޑީކޭ ހޮސްޕިޓަލްގެ މެނޭޖިން ޑިރެކްޓަރ އަހްމަދު އަފްއާލް ވިދާޅުވީ ސިއްހީ ހިދުމަތް ރާއްޖޭގައި ކުރިއެރުވުމަށް ކުރާ މަސައްކަތުގެ ތެރެއިން ރާއްޖޭގެ  ސިއްހީ ދާއިރާއެހެން ހަރުފަތަކަށް ގެންދެވިއްޖެ ކަމަށެވެ.

"ރާއްޖޭގެ ސިއްހީ ހިދުމަތް ސިއްހީ ހިދުމަތް ރާއްޖޭގައި ކުރިއެރުވުމަށް ކުރާ މަސައްކަތުގެ ތެރެއިން ރާއްޖެ އެހެން ހަރުފަތަކަށް ސިއްހީ ދާއިރާ ގެންދެވިއްޖެ، މުސްތަޤްބަލުގައި މިފަދަ އެތައް ކަމެއް ހިދުމަތެއް ތައާރަފު ކުރާނެ" އަފްއާލް ވިދާޅުވިއެވެ.  

ބައިޕާސް އޮޕަރޭޝަނަކީ ހިތް ހުއްޓުމުގެ ނުރައްކާ ކުރިމަތިވެފައިވާ މީހުން ކުރާ އޮޕަރޭޝަނެކެވެ. މި އޮޕަރޭޝަނަކީ ހަށިގަނޑުގެ އެހެން ގުނަވަންތަކުން ނާރުތައް ނަގައި ހިތުގެ ނާރުތައް ބަދަލުކޮށް ކުރެވޭ އޮޕަރޭޝަނެކެވެ.

އޭޑީކޭގެ ކާޑިއޮލަޖީ ޑިޕާޓްމަންޓް މި އަހަރުގެ މާރޗް މަހު ހުޅުވުމަށްފަހު ކެތުލެބުން މިހާތަނަށް 56 އެންޖިއޯ ގްރަފީ ހަދާފައިވާއިރު 14 އެންޖިއޯ ޕްލާސްޓީ ހަދާފައިވެއެވެ.

މީގެ އިތުރުން ބައިޕާސް އޮޕަރޭޝަންތަކާއި ކާޑިއެކް ސެންޓަރުން ހިންގާ ހުރިހާ ހިދުމަތްތަކަށް ވެސް ޕެކޭޖް ގޮތުގައި އަގު ހަދާފައިވާ ކަމަށް އޭޑީކޭ އިން ބުންޏެވެ. އެންޖިއޯ ގްރަފީ އަދި އެންޖިއޯ ޕްލާސްޓީ ފަދަ ހިދުމަތްތަކުގައި ޕެކޭޖްގެ 75 އިންސައްތަ އާސަންދައިން ކަވަރު ކުރާނެ ކަމަށް އޭޑީކޭ އިން މައުލޫމާތުދެއެވެ.