މޯލްޑިވްސް ހައްޖު ކޯޕަރޭޝަންގެ ލިމިޓެޑްގެ ބެލުމުގެ ދަށުން މިއަހަރު ހައްޖަށްދާ ފުރަތަމަ ފްލައިޓް މިއަދު ފުރުމަށް ހަމަޖެހިފައިވާ ކަމަށް އެ ކޯޕަރޭޝާނުން ބުނެފިއެވެ.

ރާއްޖެ އެމްވީއަށް މައުލޫމާތު ދެއްވަމުން ހައްޖު ކޯޕަރޭޝަންގެ އޮފިޝަލަކު ވިދާޅުވީ މި އަހަރުގެ ހައްޖުގެ މަތިވެރި އަޅުކަން އަދާކުރުމަށްޓަކައި އެކޯޕަރޭޝަންގެ ހަވާލުގައި ޖުމްލަ 600 މީހުން ހައްޖަށް ފުރާ ކަމަށެވެ.

އެގޮތުން ފުރަތަމަ ފްލައިޓް ފުރުމަށް ހަމަޖެހިފައިވަނީ ބުރާސްފަތި ދުވަހު ހަވީރު 5:10 ގައެވެ. މި ފްލައިޓްގައި 248 ހައްޖާޖީން ދަތުރުކުރުމަށް ހަމަޖެހިފައިވާ ކަމަށް އޮފިޝަލް ވިދާޅުވިއެވެ.

ހުކުރު ދުވަހު ފުރާ ފަލްއިޓްގައި 150 ހައްޖާޖީން ދަތުރު ކުރާއިރު މި ފްލައިޓް ފުރުމަށް ހަމަޖެހިފައިވަނީ ހުކުރު ދުވަހުގެ ރޭ 8:00 ގައެވެ.

ހައްޖު ކޯޕަރޭޝަންގެ ފަރާތުން ހައްޖަށް ފުރާ އެންމެ ފަހު ފަލައިޓް އަންނަ އާދިއްތަ ދުވަހުގެ ހަވީރު 5:10 ގައި ފުރުމަށް ހަމަޖެހިފައިވާއިރު މި ފްލައިޓުން 202 ހައްޖާޖީން ދަތުރުކުރާނެ ކަމަށް އޮފިޝަލް ވިދާޅުވިއެވެ.

ހައްޖުގެ މަތިވެރި އަޅުކަން ނިންމުމަށް ފަހު ހައްޖު ކޯޕަރޭޝަންގެ ފަރާތުން ހައްޖަށް ދިޔަ މީހުން މާލެ އައުމަށް ހަމަޖެހިފައި ވަނީ އަންނަ ސެޕްޓެމްބަރު މަހުގެ 7, 8 އަދި 10 ގައެވެ.