މެމްބަރު އައިބީގެ މައްޗަށް ދައުވާކުރާނެ ކަމަށް އަބްދުﷲ އާއި ސައުދުﷲ ވިދާޅުވެއްޖެ
8 އޯގަސްޓު 2018 | ބުދަ 09:05އޭނާގެ މައްޗަށް ކޮށްފައިވަނީ އެއްވެސް ހަގީގަތެއް ނެތް ސާބިތު ނުހިފޭ ދޮގު މައުލޫމާތު ތަކެއް
ތިނަދޫ ދެކުނު ދާއިރާގެ މެންބަރު އަބްދުﷲ އަހުމަދު އާއި ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ
ރިޝްވަތުގެ ފައިސާގައި ހިއްޕެވި ކަމަށް ފޭދޫ ދާއިރާގެ މެންބަރު އިބްރާހިމްދީދީ (އައިބީ) ތުހުމަތު ކުރެއްވުމާއި ގުޅިގެން އޭނާގެ މައްޗަށް ދައުވާ ކުރައްވާނެ ކަމަށް ތިނަދޫ ދެކުނު ދާއިރާގެ މެންބަރު އަބްދުﷲ އަހުމަދާއި ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވިދާޅުވެއްޖެ އެވެ.
ތިނަދުއަށް ނިސްބަތްވެ ވަޑައިގަންނަވާ ދެ މެންބަރުން ކަމުގައިވާ ސައުދުﷲ ހިލްމީ އާއި އަބްދުﷲ އަހްމަދު (އަބުޅޯ) އިދިކޮޅު ފަރާތްތަކާ ގުޅިވަޑައިގެންނެވީ ރިޝްވަތުގެ ފައިސާގައި ހިއްޕެވުމަށް ފަހު ކަމަށް ބުދަ ދުވަހު "ޗެނަލް 13" ގައި ވާހަކަ ދައްކަވަމުން އައިބީ ވިދާޅުވި އެވެ.
އައިބީ ދެއްކެވީ ހަގީގަތާ ހިލާފު ވާހަކައެއް ކަމަށާއި އަމިއްލަ މަސްލަހަތާއި ޖާހަތަށްޓަކައި އަނެކުންގެ އަބުރު ކަތިނުލުމަށް އައިބީއަށް އަބްދުﷲ ވަނީ ގޮވާލައްވާފައެވެ.
މި ޓްވީޓާއެކު އޭނާ ވަނީ ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގެ ނުވަ ވަނަ މާއްދާގެ (ހ) ހިމަނައިފަ އެވެ.
އެ މާއްދާގައި ވަނީ "މިގާނޫނުގައި ބަޔާންކޮށްފައިވާ އެއްވެސް މީހަކު ރިޝްވަތު ހިފައިފިކަން ނުވަތަ ހިފަން އުޅެފިކަން ނުވަތަ އެއްވެސް މީހަކު ރިޝްވަތު ދީފިކަން ނުވަތަ ދޭން އުޅޭކަން އެނގިއްޖެ ނަމަ ނުވަތަ ރިޝްވަތު ހިފައިފިކަން ހިފަން އުޅޭކަން ނުވަތަ ދީފިކަން ނުވަތަ ދޭން އުޅޭ ކަމަށް ގަބޫލުކުރެވޭ ފަދަ ހާލަތެއް ދިމާވެއްޖެ ނަމަ ކަމާބެހޭ ތަފްސީލާއި އެ އަމަލެއް ހިންގަން އުޅުނު ބައެއްގެ މައުލޫމާތާ އެކު އޭސީސީއާ ހިއްސާ ކުރަންވާނެ އެވެ. އަދި އެކަށީގެންވާ ދިގު މުއްދަތެއްގައި އެކަން ނާންގައި ހުރުމަކީ ކުށެކެވެ."
އައިބީ ދެއްކެވި ވާހަކަތަކާ ގުޅިގެން މެމްބަރު ސައުދުﷲ ކުރައްވާފައިވާ ޓްވީޓެއްގައި ވަނީ އޭނާއާބެހޭ ގޮތުން ޗެނަލް 13 ގައި ދެއްކެވި ވާހަކައަށް ކޯޓުގައި ޖަވާބުދާރީ ކުރުވާނެ ކަމަށެވެ.
ޕީޕީއެމް ދޫކޮށްލީ ރިޝްވަތުގައި ހިފައިގެން ކަމަށް ސާބިތު ކޮށްދެއްވައިފި ނަމަ އޭނާގެ މުޅި އުރުމު އައިބީގެ އަޅަކަށް ވެގެން ހުންނަވާނެ ކަމަށް ސައުދުﷲ ގެ އެހެން ޓްވީޓެއްގައި ވެއެވެ.
އައިބީ ވިދާޅުވެފައިވަނީ އަބްދުﷲ އާއި ސައުދުﷲ އިދިކޮޅު ފަރާތްތަކާއި ގުޅިވަޑައިގެންނެވީ ތިނަދޫ އަށް ކަމެއް ނުކުރެވިގެން ކަމަށް ދައްކަވާ ވާހަކަ އަކީ ހަގީގަތެއް ނޫން ކަމަށެވެ. އަދި އެ ދެ މެންބަރުން އިދިކޮޅު ފަރާތްތަކާއި ގުޅިވަޑައިގެންނެވީ ރިޝްވަތުގެ ފައިސާ ނަންގަވައިގެން ކަމަށެވެ.
