އިންޑިއާ ކަނޑުގެ މަސްލަހަތު ގެއްލޭ އެއްވެސް ކަމެއް ނުކުރާނަން: އިބޫ
7 އޯގަސްޓު 2018 | އަންގާރަ 17:57ލ. އަތޮޅަކީ ރާއްޖޭގެ މުހިންމު ހިސާބެއްގައި އޮތް އަތޮޅެއް
ގުޅިފައިވާ ޕާޓީތަކުން ލ. އަތޮޅުގައި ބޭއްވި ޖަލްސާގައި އިބޫ ވާހަކަދައްކަވަނީ
ރާއްޖެ ތަރައްޤީކޮށް ކުރިއަރުވާ އިރު، އިންޑިއާ ކަނޑުގެ މަސްލަހަތު ގެއްލޭ ފަދަ އެއްވެސް ކަމެއް ނުކުރައްވާނެ ކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވިދާޅުވެއްޖެއެވެ.
ލ. ގަމުގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން އިބޫ ވިދާޅުވީ، ލ. އަތޮޅު އޮތީ ރާއްޖޭގެ މުހިންމު ހިސާބެއްގަ އި ކަމަށެވެ. އަދި ލ. އަތޮޅަކީ ކަނޑު ދަތުރުފަތުގެ މުހިންމު ހިސާބެއްގައި އޮތް އަތޮޅެއް ކަން އިބޫ ފާހަގަކުރެއްވިއެވެ. އެހެން ނަމަވެސް ލ. އަތޮޅު ތަރައްޤީކުރާ އިރު، ގިނަ ކަންތައްތަކަށް ވިސްނަން ޖެހޭނެ ކަމަށާއި، އަދި އެކަން ކުރާ އިރު އިންޑިއާ ކަނޑުގެ ސަލާމަތާއި ރައްކާތެރި ކަމަށް ބުރޫ އަރާނެ ފަދަ އެއްވެސް ކަމެއް ނުކުރައްވާނެ ކަމަށް އިބޫ ވިދާޅުވިއެވެ.
"އަދި މި ރާއްޖޭގެ މިނިވަންކަމާއި ސިޔާދަތަށް އެއްވެސް ބައެއްގެ ނުފޫޒު ފޯރުވާ ގޮތަކަށެއް މި ސަރަހައްދު ތަރައްޤީކޮށްގެނެއް މި ޗެނަލްގެ ބޭނުުމެއް އަޅުގަނޑުމެންނެއް ނުކުރާނެ. އެކަމުގެ ޔަޤީންކަން މިރޭ ތިޔަ ބޭފުޅުންނަށް އަރުވަން،"
އިބޫ ވިދާޅުވީ ގުޅިފައިވާ ސިޔާސީ ޕާޓީތަކުގެ ވެރިކަމުގައި ރާއްޖޭގެ ސިޔާދަތާއި މިނިވަންކަން ގެއްލޭނެ ފަދަ އެއްވެސް ކަމެއް ވެސް ނުކުރައްވާނެ ކަމަށެވެ.
އިތުރަށް ވާހަކަ ދައްކަވަމުން އިބޫ ވަނީ ގަމަށް ދިމާވެފައިވާ މައްސަލަތަކަށް ހައްލެއް ހޯދަވައިދެއްވާނެ ކަމަށް ވައުދުވެ ވަޑައިގެންފައެވެ. އެގޮތުން އިބޫ ވިދާޅުވީ ގަމުގެ ރައްޔިތުންނަށް ވެސް ކުރިމަތިވެފައިވާ އެންމެ ބޮޑު ދަތިކަމަކީ ބޯހިޔާވެހިކަމުގެ ދަތިކަން ކަމަށާއި، އެކަން ހައްލުކޮށްދިނުމަށް އެ ރަށުން ވެސް ގޯތު ދޫކުރައް ފައްޓަވާނެ ކަމަށެވެ. އަދި ގޯތި ދޫކުރިކަމުގައި ވީނަމަވެސް އިމާރަތް ކުރާނީ ކިހިނެއްތޯ ރައްޔިތުން ސުވާލުކުރާ ކަމަށާއި، އެކަމަށް ވެސް ގުޅިފައިވާ ޕާޓީތަކުގެ ވެރިކަމުގައި ހައްލު ހޯދައިދެއްވާނެ ކަމަށް އިބޫ ވިދާޅުވި އެވެ.
އެ މޭރުމުން ވާހަކަދައްކަވަމުން އިބޫ ވިދާޅުވީ ގޯތީގައި އިމާރަތްކުރުމަށް ބޭނުންވާ ފައިސާ ހަމަޖެއްސުމަށް ހާއްސަ ލޯން ސްކީމެއް ތައާރަފްކުރައްވާނެ ކަމަށެވެ. އަދި އެ ސްކީމަކީީ އިންޓްރެސްޓް ރޭޓް ކުޑަ ސްކީމަކަށް ހައްދަވާނެ ކަމަށް ވެސް އިބޫ ވައުދުވެވަޑައިގެންނެވިއެވެ.
އޭގެ އިތުރުން އިބޫ ވަނީ ލ. އަތޮޅުން ގެސްޓް ހައުސް ތަރައްޤީކުރުމަށް ބިން ދޫކުރައްވާނެ ކަމަށް ވެސް ވައުދުވެ ވަޑައިގެންފައެވެ. އަދި ލ. އަތޮޅަކީ އާރބަން ސެންޓަރަކަށް ހައްދަވާނެ ކަމަށާއި، އެފަދަ ސެންޓަރެއް ޤާއިމްކުރުމަށް އެންމެ އެކަށޭނެ އެއް އަތޮޅަކީ ވެސް ލ. އަތޮޅު ކަމަށް އިބޫ ވިދާޅުވިއެވެ.
