ރައީސް އަބްދުﷲ ޔާމީން ގއ. ކޮލަމާފުއްޓަށް ވަޑައިންނަވާތީ އެރަށުގައި ދަމާފައިހުރި ގުޅިފައިވާ ކޯލިޝަންއަށް ނިސްބަތްވާ ދިދަފަތިތަކާއި ބެނާތައް ބާރުގެ ބޭނުންކޮށްގެން ނެގި ނަމަވެސް އެމްޑީޕީގެ ފިކުރު ފުހެނުލެވޭނެ ކަމަށް އެރަށުގެ ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ކޮލަމާފުށީގެ ކައުންސިލަރު އިބްރާހިމް ވަހީދު ވިދާޅުވީ ކޮލަމާފުށީގެ މެޖޯރިޓީ ތާއީދު ރައީސް ޔާމިނަށް ނުލިބޭނެ ކަމަށާއި، މަދުބަޔަކު ބަޔަކު ބޭނުން ކޮށްގެން މުޅި ރަށުގައި ފިޔާތޮށި ކުލަ ލީ ނަމަވެސް އެރަށުން ވޯޓެއް ނުލިބޭނެ ކަމަށެވެ.
ވަހީދު ވިދާޅުވީ ގުޅިފައިވާ ޕާޓީތަކުގެ ކެންޕޭން ފެށުމުގެ ގޮތުން މިމަހު 3 ވަނަ ދުވަހު އެރަށުގެ އެމްޑިޕީގެ އޮފީހުގެ ކުރިމަތީގައި އިދިކޮޅު ކޯލިޝަންގެ ބެނާތަކާއި ދިދަތައް ދަމާފައިވާ ކަމަށެވެ. ނަމަވެސް ރައީސް ޔާމިން ބުދަ ދުވަހު އެރަށަށް ވަޑައިގަންނަވާތީ ކޯޓު އަމުރެއް ނެރެ ގަދަބާރުން ހުރިހާ އެއްޗެއް ނަގާފައިވާ ކަމަށެވެ.
ވަހީދު ވިދާޅުވީ ބާރުގެ ބޭނުންކޮށްގެން ރައީސް ޔާމިންގެ ސަރުކާރުން ހިންގާ މިފަދަ ނާތަހުޒީބީ އަމަލުތަކުގެ ސަބަބުން ރައީސް ޔާމިންގެ ސަރުކާރަށް ރައްޔިތުން ނަފްރަތުކުރާ މިންވަރު އިތުރުވާނެ ކަމަށެވެ. އެގޮތުން މަދު ބަޔަކު ނުކުމެ މިހާރު މުޅި ރަށުގައި ޕީޕީއެމްގެ ދިދަތަކާއި ބިނާތައް ހަރުކޮށްފައިވާ ކަމަށް އޭނަ ވިދާޅުވިއެވެ.
"މިހާރު އެކަމަކު މުޅި ރަށުގަ ޕީޕީއެމްގެ ދިދަތައް. ބަނދަރުމަތީގަ ވެސް. އަޅުގަނޑުމެން ނުދަން އެމީހުންނަށް ޖެއްސުން ކުރާކަށް. އެކަމަކު އެމްޑީޕީގެ އޮފީސް ކުރިމަތީގައި ކޯލިޝަންގެ ދިދަ ހުރީމަ ވެސް ހަޖަމެއް ނުވި" ވަހީދު ވިދާޅުވިއެވެ.
ވަހީދު ވިދާޅުވީ ހޯމަ ދުވަހުގެ ރޭ 23:00 ގައި ކޯޓު އަމުރު ނެރެ، ދަންވަރު ފަސްވަރަކަށް ފުލުހުން ނުކުމެ އިދިކޮޅު ކޯލިޝަންއަށް ނިސްބަތްވާ ދިދަތަކާއި ބެނާތައް ނެގުމަށްފަހު ކުރީގެ ރައީސް މުހައްމަދު ނަޝީދުގެ ފޮޓޯ ނުފެންނަ ގޮތަށް ހުދު ކުލަ ލާފައިވާ ކަމަށެވެ. އަދި މިމަހު 9 ގެ ކުރިން އެއްވެސް އެއްޗެއް އެރަށުގެ މަގުމަތީގައި ނުދެމުމަށް އަންގާފައިވާ ކަމަށެވެ.
ގާނޫނު އަސާސީގެ ކުރިމަތީގައި ދިވެހި ރައްޔިތުންނަކީ ހަމަހަމަ ބައެއްކަން ފާހަގަކުރައްވައި ވަހީދު ވިދާޅުވީ ސިޔާސީ ކެންޕޭން ކުރުމަށް ރައްޔިތުން ހިންގާ ހަރަކާތްތަކުން ވެސް މިސަރުކާރަކީ އިހްލާސްތެރިކަމެއް ނެތް ސަރުކާރެއްކަން ކަށަވަރުވާ ކަމަށެވެ. ކެންޕޭން ކުރުމުގެ ފުރުސަތު އެންމެނަށް ވެސް ލިބެންޖެހޭ ކަމަށާއި، މިގައުމަކީ ހަމައެކަނި ރައީސް ޔާމިނަށް ސަނާ ކިޔާ މީހުން ދިރިއުޅެން އޮތް ބިމެއް ނޫން ކަމަށް އޭނަ ވިދާޅުވިއެވެ. އަދި މިނިވަން އިންތިޚާބަކަށް މިފުރުސަތުތައް ދޭން ޖެހޭ ކަމަށް ވެސް ވަހީދު ވިދާޅުވިއެވެ.
